الحلقة الخامسة والأربعون
عمتي:: سامحني ياحاج كان ف يوم زعلتك سامحني يادنيتي كلها
انس:: امي خلاص
وشويه هكي خشو مراد ومحمد ورفعوا التابوت هما وانس وسليم وعمتي واخذه بناتها ف حضنها ويتباكن ويودعن ف باتهن وااااو مشناها الدنيا محد عارف امتا ماشي مر قدامي شويط وفاة بابا وايهم كلللله وقعدت منسندة علي رتاج ونبكي وطلعوا من الصالون ووصلوا ف الجنان. وتخش ابتسام ( اخت انس اللي تسكن ف طرابلس ) ووراها بناتها 2 وقعدت تبحت ف التابوت ومصدومة وعيونها حمر من البكاء ووجها مخبش
ابتسام:: قعدت تعيط ويييين ماشييين بييييه ويييين رجعووووه بالله عليكم رجعوووه
انس:: شير المنذر يجي يمسك بداله ومشا هوا لابتسام ومسكها. ودموعه ف عيونه خشي سلم خيتي خلينا نمشو
ابتسام:: تبكي بعبرتها هضاا بابا يااانس تقول حاس ان بيعدي امس يكلم فياا ويقولي مراايف عليكي ياسومه جيبي البنات وتعالي ليييش هكي ياااربي ليش
انس:: حضنهاا وحدي الله واسترجعي سلم خيتي ماتعذبيش بكلامك هضاا ادعيله
عمتي:: تبحت ف ابتسام وهياا بروحها مش قادرة تصبر
ابتهال:: حضنت بنات اختها وقعدت تبكي معاهن
انس:: وخري خلينا انطلعوه هياا
ابتسام:: تحاول تقوي روحها نبي نشوفه باهي لاخر مره خلوني نشوفه
انس:: بحت فيهم عشان ينزلو التابوت
ابتسام:: قربت من التابوت وقمعزت علي ركبيها وقلبها قابضها وحطت يدها علي وجه باتهاا ودموعها ينزلن سامحني ياغالي كان فيوم زعلتك مني ولا غلطت ف حقك سامحني
سليم:: حط يده علي كتفها
ابتسام:: برمت عليه ودموعها ينزلن وصبت وحضناته وقعدت تبكي وصوت شهقاتها يشق القلب
ورفعوا التابوت وطلعوا بيه وانقلب العزا عياااط وبكاء وطلعنا ف الخيمة وقعدوا عاد الناس خاشيين طالعين ونا مع عمتي ونحاول نهديهاكان فعلاً صدمة موته لان ماكان فيه شي ودفنوا عمي وبعد ماحطوا عليه التراب وعدو قمعز انس علي قبره وقعد يبكي كيف العيل الصغير وقعد يكر فيه سليم كر بيش شاله معاه للعزا
( أحياناً تكون انت منهار ومش متقبل المصيبه اللي صارت بس بعد تشوف هلك ضاعفين لازم تقويهم وهضاا اللي صار مع سليم شافهم كلهم محد صابر ف حاول يقوي روحه )
وف الليل روحو هلي وشالو معاهم ماري لان مش حنقدر نعانيها ف الزحمة هذي ومازالت صغيرة
ومرن ثلاث ايام العزا علينا كآبه في كآبه وطول الايام هذينا ماشفتش انس بكل كنت نبات مع عمتي وف الصبح نمشي نغير دبشي ونوتيله دبشه ونطلع وسليم كان يخش علي عمتي ويشوف فيها بس انس ماجش وموبايله كان ديما مقفل وفكو الخيمة وخفت زحمة الناس بس حرقة قلوب عمتي وصبياتي مازالت والعه
ماما:: شن اخباارها عمتك
نا:: تعبانه ياماما مش صابرة بكل
ماما:: لا حول ولا قوة الا بالله ربي يكون ف عونها ويصبرها
نا:: شن اخبار ماري. متعبتكم
ماما:: لا كويسه ماتخافيش عليهاا مريم راده بالها منها تقول بنتها
نا:: معناها حنخليها عندكم لعند يمر اسبوع ع الاقل ويقعدروا يتقبلوا الفكرة شويه
ماما:: خلاص براحتك تو نمر عليكي بعدين انس كيف حاله
نا:: حسيت بغصه ف قلبي علمي علمك
ماما:: كيف هامله راجلك وماتندريش عليه
نا:: مش هكي ياماما بس قعدت لاهيه مع عمتي معش نمشي لحوشي الا ف الصبح نغيرر ونجي وهوا فونه ومقفل ومايجيش هناا
ماما:: قولي لسلفك يكلمه لكي ولا اطلعي شوفيه
نا:: سألت سليم عليه قالي مجرد مايروحوا الناس يطلع وميروحش الا تاني يوم
ماما:: افطني لراجلك هضاا اكثر وقت محتاجك فيه
نا:: حاضر
ماما:: سلام وردي بالك من روحك
نا:: حاضرر
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romansaرواية ليبية شرقاوية مميزة بقلم الكاتبة Bent_benghazi
