الـحلقـة الًتـاسـعـة
وقمعزنا نهدرزو نا وماما ومعاذ ومنذر ومؤيد ورم موبايل معاذ ومريم كانت دوبها طالعه من دارها
معاذ:: ايوا يااشرف كيف امتا صاار والله باهي اهو جايك اين مستشفى خلاص تم مسافة الطريق اهو معاياا منذر قاعد خلاص سلام منذر:: شن في كنه اشرف
معاذ:: قالي باته تاعب من يومين وشالوه للمستشفى بس محد مهتم بيه ويبيك تجي بيش تشوفله صرفه
مريم:: نزلت دمعتهاا دغري
نا:: بحتت فيهاا وصبيتلها قبل مايشوفوها خوتي
منذر:: هي فيش تراجي باهي صبي
معاذ:: هيااا نجيب جاكتي والمفتاح ونجيك وصبا
منذر:: امي تبي حاجة
ماما:: سلامتك
نا:: مسكت مريم وخششتها للدار كنك انتي جاية تبكي قدامهم
مريم:: حضنتني مش قتلك في حاجة كنت حاسه اصلاً هوا لصقة
نا:: باهي اس خلاص اهوو كويس ومافيه شي غير درتي فلم هندي ف الفاضي
مريم:: تي باته هضاا كنك انتي
نا:: اس باهي خلاص واغسلي وجك واطلعي ماما من امبدري وهياا شاكة ف موضوعك ونا نقوللها مريضة
مريم:: باهي
وصبيت طلعت قمعزت جنب ماما وصبت مريم غسلت وجهها وطلعت معانا ف الصالة
ماما:: وينك اليوم
مريم:: مريضة شويه
ماما:: بس يعني
نا:: عارفتيها ياماما بعد تمرض متطلعش من الدار
ماما:: سمعتن علي بات اشرف مسكين وجعني
نا:: اهاا ربي يشفيه ان شاء الله
ماما:: كان صاحب باتك الله يرحمه وغالي عليه
مريم:: ربي يشفيه
رؤية:: السلام عليكم
ماما:: وعليكم السلام وين راجلك
رؤية:: طلع للمحل قال من امبدري مخليه مسكر
ماما:: اهاا
رؤية:: شخبارك يامهيوه
نا:: الحمدلله تمام
ماما:: كلمي نرجس يامهاا تجي تهدرز معندها عليش قاعده بروحها
مريم:: حاضر وصبت
نا:: كيف وين مراد
ماما:: من الصبح طلع للمكتب قال عندي قضايا واجد معش روح
رؤية:: اندير قهوة ياعمتي
ماما:: حاجة الخير ماتبيش سؤال
مريم:: جت قمعزت
ماما:: كلمتيها
مريم:: اهاا قالت نعطي العيال حاجة ياكلوها ونجي
ماما:: وين عيالك
رؤية:: سارة تلعب مع سجى ف شقتي وتوحه مع عيال مراد ف حوشهم
نا:: فرحانين عاد عطلة نص السنة
رؤية:: مش غيرر قريب يطيروا
ماما:: كيف صار مش تبي اديري قهوة
رؤية:: هياا مصبيه اهوو وصبت
نا:: بحتت ف مريم عشان تصبي وراها
مريم:: صبت معاها
نا:: ماما مش تقول زودتيها مع رؤية شويه
ماما:: شن درتلها
نا:: ماسكتيلها ع الوحده منعرفكش هكي انا
ماما:: انتي ناسيه ان هياا السبب ف الي صار معاكي
نا:: عيوني تعبن دموع لا مش ناسيه و الي صار معاياا قدر ربي ومش رؤية السبب خلاص عاد المرا تحملت واجد تحس حتي هياا انسانه تشوف فيكي كيف تعاملي ف نرجس وكيف تعاملي فيهاا هياا
ماما:: كان قعدتي ساكته خير بعد حكيتي مسلمنش من لسانك
نا:: وجعتني ف قلبي بدرجة مش عاديه ودمعتي نزلت ومسحتها دغري بارك الله فيك يالغالية خلاص معش حنحكي من جديد ونريحكم مني مره وحده
وصبيت خشيت لداري وسكرتها عليااا وقمعزت قدام الباب قعدت نبكي للحظة حسيت اني مش مرغوب بياا ف الحوش وجعني خاطري وتمنيت ايهم عايش عشان نرتمي ف حضنه ونبكي ويقعد يهدي فياا كسرتلي ظهري يااحبيبي وييينك ياااريتك معايااا واعره الحياة بلاك واعره علي قد ماهضااا. حوش هلك وعشتي فيه سنين عمرك بس مجرد ماتطلعي منه خلاص معش ينحسب حوشك وتقعدي تجيه ظيفه يابال ترديله وانتِ مكسورة وخاسرة اعز انسان علي قلبك تقعدي تحسي ف روحك ظيفه ثقيلة ومش مروحه قاعده وابسط كلمة ولو بلا قصد تزعلك وتقعد هياا متزعلش بس بعد الي صارلي من حاجات تافهة نزعل حاجه جواا مش ملمومه جرح كبير مازال مفصول موعرها وحق ربي موعرها
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romansaرواية ليبية شرقاوية مميزة بقلم الكاتبة Bent_benghazi
