တိမ်စိုင်ဖုံးတဲ့ ကြိုးမဲ့လေတံခွန် (Z & U ) (Complete)

အပိုင်း (၃၈)

Unicode

          " 'ကောင်းကင်မနှိုင်း' နဲ့ 'ရွှန်းလဲ့အိန္ဒြေ' က Officail တွဲနေကြပြီတဲ့........"

          " ခွမ်း! "

                    ရှေ့ဆင့်နောက်ဆင့်ထွက်ပေါ်လာတဲ့ အသံအဆုံးမှာ တစ်ဆိုင်လုံးရဲ့ အာရုံက အရှေ့မှ Coffee Bar ဆီကို စုပြုံရောက်ရှိလာကြသည် ။ ဖုန်းကိုကြည့်ကာ တီးတိုးပြောနေကြတဲ့ ကောင်မလေးတွေကလဲ စကားဆက်မပြောနိုင်‌သေးပဲ တစ်စစီ ပြန့်ကြဲနေတဲ့ ခွက်ကွဲစတွေနဲ့ အတူ စီးကျနေတဲ့ ကော်ဖီတွေကိုသာ ကြောင်အစွာ ငေးကြည့်နေကြသည် ။

          " အာ S-Sorry နော် ၊ ကျွန်တော် ပြန်ဖျော်ပေးပါ့မယ် "

                    'သော်' ကအရှေ့မှ Customer ကို ပြာပြာသလဲ တောင်းပန်လိုက်ရင်း ကော်ဖီခွက် အကွဲစတွေကို ဗန်းထဲ ပြန်ကောက်ထည့်နေသည် ။

          " 'သော်'! "

          " အကို 'သော်'.......ကျွန်တော် ရှင်းလိုက်ပါ့မယ် "

                     'သော့်' အနားကို အပြေးအလွှားရောက်လာကြတဲ့ 'မှီ' နဲ့ ဝန်ထမ်းအချို့က လက်ထဲတွင်လည်း ကြမ်းတိုက်ဝတ်တွေ ကိုင်ထားကြသည် ။ 'သော်' ကတော့ ဘာစကားမှ ပြန်မပြောနိုင်သေးပဲ တုန်ရီနေတဲ့ လက်အစုံနဲ့ ခွက်အကွဲတွေကိုသာ လိုက်ကောက်နေသည် ။

          " ရ ရပါတယ်.......အာ့! "

          " 'သော်'!!! "

                     ကွဲနေသော ခွက်အပိုင်းအစတွေကို ကောက်ထည့်နေရင်းမှ ခွက်ကွဲစတစ်စက 'သော့်' လက်ကို ရှသွားခြင်းဖြစ်သည် ။

          " ရရဲ့လား 'သော်'......၊ သွေးတွေ အများကြီး ထွက်နေတယ် "

                      'မှီ' က 'သော့်' လက်ကို ကိုင်ကာ စိုးရိမ်တကြီး ပြောလာသည် ။ ခွက်ကွဲစက လက်သုံးချောင်းလုံးကို ရှမိသွားသောကြောင့် သွေးများက အဆက်မပြတ် စီးကျလာသည် ။ ရုတ်တရက်မို့ အကုန်လုံးကလည်း ဘာလုပ်ပေးရမှန်းမသိစွာ ကြောင်ကြည့်နေကြသည် ။

          " ဆေး ဆေးထည့်မှ ရမယ် မမမှီ ၊ အကိုသော့်ကို အနောက်ထဲ ခေါ်သွားလိုက်ပါလား ၊ ဒါတွေကို ကျွန်တော်တို့ ဆက်ရှင်းလိုက်မယ် "