ေနာက္ဆံုးမင္းနဲ႔ / နောက်ဆုံးမင်းနဲ့

50

Unicode

ကိုနဲ့ပတ်သက်တဲ့အရာဆိုလို့ မြူတစ်မှုန်လေးတောင်မရှိတဲ့နေရာ၊ သူတို့နှစ်ယောက်ရဲ့အမှတ်တရတွေလည်း တစိုးတစိမျှမရှိတဲ့ ဒေသ။
အကြောင်းတိုက်ဆိုင်မှုဖြစ်ပွားနိုင်ချေ 0.009% ပဲရှိမယ်ဆိုတဲ့ နေရာအသစ်လေးမှာ ရင်ဘတ်တစ်ခုလုံးအသစ်အတိုင်းပြန်ဖြစ်သွားဖို့က အင်မတန်မှခဲယဉ်းနေတယ်။

လှပသစ်ဆန်းတဲ့သဘာဝတရားတို့နဲ့ ဘယ်နေရာကိုကြည့်ကြည့်မျက်တောင်ဖျားတစ်ဆုံးမှာ အသစ်အသစ်သောအရာတွေချည်း။
အိမ်အသစ်၊ ခြံအသစ်။
လမ်းအသစ်၊ ရပ်ကွက်အသစ်။
မြို့နယ်အသစ်၊ နိုင်ငံအသစ်။
အရာရာ...အသစ်နဲ့ အသစ်။
အဲဒီအရာတွေအားလုံးဟာ...ညစ်နွမ်းနေတဲ့စိတ်နှလုံးကို တဖန်ပြန်လည် သန့်ရှင်းလတ်ဆတ်စေနိုင်တယ်လို့ပြောပေမယ့် သူ့...ဦးနှောက်ကတော့ ဟောင်းနွမ်းနေတုန်းပဲ။

ထည့်လက်စကော်ဖီခွက်ကလေးကိုငေးကြည့်ရင်း ရိပေါ်ရဲ့နှုတ်ခမ်းသားလေးတွေက တဆတ်ဆတ်တုန်ရီလာတယ်။
သကြားနဲ့နို့မပါတဲ့ကော်ဖီကြည်ကြည်ခပ်အေးအေးလေးက ကို့အကြိုက်မို့လား။
မနက်ဆိုလည်းမနက်ခင်းမို့၊ အလုပ်ပင်ပန်းတဲ့အချိန်ဆိုလည်း ပင်ပန်းနေလို့...
ကဖင်းဓာတ်အပြည့်ပါတဲ့ကော်ဖီတစ်ခွက်က စိတ်တင်မက၊ လူတစ်ကိုယ်လုံးကို လန်းဆန်းတက်ကြွစေတယ်ဆိုပြီး သောက်တတ်တဲ့အကျင့်ရှိတဲ့...အဲဒီလူသား...
အခုဆို...ကော်ဖီကောင်းကောင်းလေးတောင်သောက်နေရပါ့မလား...။
သူ...မမြင်ရတဲ့ တစ်ပါးသောအရပ်မှာ...အဆင်တွေမှပြေနေရဲ့လား...။

"ခွမ်း...!..."

မှုန်ရီဝေဝါးလာတဲ့အမြင်တွေကြောင့် ကြမ်းပြင်ပေါ်ကိုလွတ်လွတ်လပ်လပ်ကြီးကျကွဲသွားတဲ့ကော်ဖီခွက်နဲ့အတူ မျက်ရည်နှစ်ပေါက်ကလည်း အတားဆီးမဲ့စွာ ကျဆင်းပြန်တယ်။
သူ..ငိုနေမိပြန်တာပါလား။

"ရိပေါ်...ဘာဖြစ်တာလဲ..."

လေသာခန်းထပ်ခိုးဆီကနေတစ်ခုခုကျကွဲတဲ့အသံကြားတော့ အပြေးတပိုင်းနဲ့ရောက်လာတဲ့ ကိုတာတာကအမောတကော။
ရိပေါ်ရဲ့အနီးနားရောက်လာမှ မျက်ရည်တွေနဲ့မျက်ဝန်းကိုသတိထားမိပြီး ကိုတာတာကဘာမှဆက်မမေးတော့ဘဲ...ရိပေါ့်ခြေထောက်တွေဆီမှာ ဒဏ်ရာရသွားမသွားကိုပဲအသံတိတ်စစ်ဆေးတယ်။
ပြီးမှ ဖန်ခွက်အကွဲစတွေဆီကိုအာရုံပို့တယ်။
ခြေအိတ်လဲမပါဘဲ ဗလာဖြစ်နေတဲ့ခြေဖျားနုဖတ်ဖတ်နီရဲရဲက အကွဲစတွေနဲ့နီးနီးကပ်ကပ်။