ေနာက္ဆံုးမင္းနဲ႔ / နောက်ဆုံးမင်းနဲ့

61

Erabarenakereba erabeba ii...

(ရွေးချယ်ခြင်းမခံရဘူးဆိုရင်...ကိုယ်ကိုယ်တိုင်ကရွေးချယ်ပစ်လိုက်...)...တဲ့...။

Demon Slayer ထဲက Aimer ရဲ့ Zankyou Sanka သီချင်းကိုစျာန်လေးက ရေချိုးရင်းအော်ဆိုနေတယ်...။

"စျာန်လေး...စျာန်လေး...နောက်ကျမယ်ဟ...
မင်း...ဆံပင်ပုံသွင်းအုံးမှာမလား..."

ကျနေတဲ့ရေသံနဲ့ ဆိုနေတဲ့သီချင်းသံတွေကြားမှာ ဂင်းဂျိ အတော်အော်ပြောလိုက်ရတယ်...။

"အေး...ပြီးပြီ...အခုပဲ..."

"မြန်မြန်ထွက်လာတော့..."

ဒီည...ကျောင်းသားတွေဂုဏ်ပြုပွဲမှာ စျာန်လေးကသီချင်းဆိုဖို့ရှိတယ်...။
နယ်အဆင့် under 15 ကျောင်းသားဗိုလ်လုပွဲမှာ သူတို့အဖွဲ့က ဂိုးပြတ်နဲ့အနိုင်ရခဲ့တာမို့...
ဒီညအတွက် စားသောက်ပွဲလုပ်ကြရင်းနဲ့..မိုက်ခဲရမှာ...။

ကာရာအိုကေပေမယ့် စင်ပေါ်တက်ရမယ်ဆိုလို့ သားသားနားနားပြင်ချင်ကြောင်းပြောထားလို့ ဂင်းဂျိက ဆံပင်ပြင်ပေးဖို့စောင့်နေတယ်...။
ကျောင်းထဲမှာလုပ်တဲ့ပွဲဆိုတော့လဲ စင်ကသိပ်မကြီးကျယ်ပေမယ့်...ဆယ်ကျော်သက်မို့လည်း နည်းနည်းလေးကဲချင်၊ သဲချင်တဲ့အမျိုး။

သိပ်မရှည်တဲ့ဆံပင်ငုတ်တွေကို ဂျယ်လ်အပီအပြင်လိမ်းပြီး အကင်ကင်တဲ့ခဲစက္ကူနဲ့ပတ်ပြီးထောင်လိုက်တယ်...။
punk ဆိုတာကို သိပ်ပြီးဝါသနာမကြီးပေမယ့်...
စျာန်လေးကတော့...ပထမဆုံးသီချင်းဆိုရင် အဲဒီလိုလေးဆိုချင်တယ်ဆိုလို့ ဂင်းဂျိကမရရအောင်ကြံဖန်ပေးဖြစ်တယ်...။
ဟိုးအရင် သူ့အဖေရှိတဲ့အချိန်တုန်းက show ပွဲတွေရဲ့အရံအကဖွဲ့တွေမှာ ဒီလိုလုပ်ကြတာကိုမြင်ဖူးပြီးသားမို့...လက်တွေ့မှာသိပ်မခက်ခဲခဲ့ဘူး...။

"ဂင်း...မင်း ငါ့ကိုအသံကြည်အောင်ရိုက်ပေးဖို့မမေ့နဲ့နော်..."

"အေး...မင်းလဲ...သေချာဆိုနော်...
မေးရိုးတွေစေ့မထားဘဲအော်ထုတ်...ကြားလား...
သွားတော့...ခါးကိုမတ်မတ်ထား..."

ဝါသနာကြီးတာတို့၊ ဘာတို့မဟုတ်ကြသေးပေမယ့်...
မိုက်ကလေးခဲပြီး စင်ပေါ်တက်ကြည့်ချင်တဲ့ ဆယ်ကျော်သက်စိတ်ကူးလေးက သိပ်ကိုကြီးကျယ်နေတယ်...။
ချိုချဉ်လေးတစ်လုံးရလိုက်တာကိုကမ႓ာကြီးတစ်ခုလုံးရလိုက်သလိုထင်နေမိတဲ့ အရွယ်လေးဆိုတော့လည်း...
ကာရာအိုကေအဆင့်လောက်ကိုပဲ ရှိုးပွဲနီးပါးထင်နေကြပြန်တာ...
စျာန်လေးလဲ မိုက်ကိုင်ပြီးသီချင်းဆိုရော...
အောက်ကလူတွေပါထ,က ကုန်တယ်...။