The Ultimate Business Lady [Myanmar Translation ]

Chapter 45

Unicode

Ch-45 မတရားခံရခြင်း

'' အစ်မဝမ်းကွဲ.. ညီမကစီးပွားရေးလုပ်တဲ့ မိန်းကလေးတစ်ယောက်ပါ။ ယွင်အိမ်မှာလဲ အကြီးအကဲတစ်ယောက်မှမရှိတော့ဘူး။ ဒါကြောင့်မျက်နှာပျက်တာက မပြောပလောက်တဲ့ကိစ္စပဲ။ ဒါပေမဲ့အရာရှိအိမ်တော်က သခင်မလေးဖြစ်တဲ့ အစ်မကတော့ အဲ့လိုကိစ္စတွေကိုနားလည်နေမှဖြစ်မယ်လေ။ နို့မို့ဆိုအစ်မလူပုံအလယ်မှာအရှက်ရခဲ့ရင် ဦးလေးပါမျက်နှာပျက်ရလိမ့်မယ်။ အဲ့ဒါကြောင့် နောက်ဆို အစ်မဒီလိုပုံစံမျိုးနဲ့ စကားမပြောသင့်ဘူး!'' တစ်ယောက်ယောက်ကို ကိုယ်ကျင့်တရားကောင်းမွန်အောင် ဆုံးမတာမျိုးက
လုံးဝကိုလင်းရွှမ်ရဲ့ပုံစံပဲလေ။

စစချင်း ရှန့်ကွမ်ယန်လန်က သူကို အကောက်ကြံဖို့လုပ်နေပေမဲ့ အဆုံးမှာတော့ အဲ့တာနဲ့ပြောင်းပြန် လင်းရွှမ်ဆီကနေသင်ခန်းစာပေးတာခံလိုက်ရတယ်။ နောက်ပြီးသူပြောတာကလဲအမှန်တွေဖြစ်နေတယ်။ ရှန့်ကွမ်ယန်လန်ရဲ့ဒေါသကို မနည်းထိန်းချုပ်ထားရတဲ့ပုံစံကိုမြင်ရတာ တကယ့်ကိုစိတ်ကျေနပ်စေတယ်။

'' အမေ '' ရှန့်ကွမ်ယန်လန် မြင်းလှည်းပေါ် ရောက်တဲ့အချိန်မှာတော့ ခက်ခဲစွာချုပ်တည်းထားရတဲ့မျက်ရည်တွေက သူမရဲ့နူးညံ့ဖြူဥနေတဲ့ မျက်နှာပေါ်စီးကျလာတော့သည်။

'' လန်အာ မငိုနဲ့နော်။ ယွင်လင်းရွှမ် အဲ့မကောင်းတဲ့ဟာလေး! သူ့ကိုယ်သူ ဘာထင်နေလဲမသိဘူး '' အနိုင်ကျင့်ခံရလို့ဝမ်းနည်းနေတဲ့သမီးဖြစ်သူကိုကြည့်ပြီး သခင်မကျောက်လဲရင်နာရတယ်။ သမီးကိုချော့မော့ရင်း ပါးစပ်ကနေလဲ ဒေါသတကြီးကျိန်ဆဲနေ၏။
'' သူက ဘယ်လိုအမှိုက်မျိုးဆိုတာ သမီးမသိဘူးလား? ရူနမ်အိမ်တော်က မင်းသမီးလေးရဲ့မွေးနေ့ကိုတက်ဖို့ သူကအဆင့်မီလို့လား? သမီးရယ်!သမီးကစိတ်ကောင်းရှိလွန်းနေတာ သူ့ကိုဘာလို့သွားပြောနေတာလဲ? ''

သူမ့အမေရင်းက သူမ့အတွေးတွေကို လုံးဝ သဘောမပေါက်တာကိုမြင်တော့ ရှန့်ကွမ်ယန်လန်ပိုလို့တောင်ဒေါသထွက်သွားတယ်။

သူကဘယ်တုန်းကများ ယွင်လင်းရွှမ်ကို တကယ်ကြီး ပွဲတက်စေချင်လို့တုန်း? ယွင်လင်းရွှမ်ရဲ့လက်ဝတ်ရတနာတွေကို ယူဝတ်ချင်လို့အဲ့လိုပြောလိုက်တာ။ အဲ့ဒါမှ ပွဲတော်ကျရင် လူပုံအလယ်မှာ ကျော်ကြားနိုင်မှာလေ။
ဒါပေမယ့် အရင်ကအရမ်းကိုစိတ်ထားကောင်းပြီး စကားနားထောင်တဲ့ယွင်လင်းရွှမ် တစ်ယောက် သူ့ဦးလေးနဲ့ဒေါ်လေးတို့ ကွယ်လွန်အပြီးမှာ မထင်မှတ်ဘဲ ဒီလိုမျိုးဖြစ်သွားတာက တကယ့်ကိုမနှစ်မြို့စရာပဲ။