-
مع نسمات الهوا البارد والغيوم المتراكمه الي تنذر بأن المطر جاي ، وقف قدام المسجد وهو يتأمله بسرحان تام
قاطعه الي وقف جنبه وهو يضرب كتفه بخفه : بتزين ياخوك بتزين بحول الله .. لا تهوجس
لف عليه بتنهيده حارقه : مرت عشر سنين يابهاج.. عشر ولا قدرنا نسوي شيء
بهاج بحزم : أمش نصلي قبل يقيمون والموضوع هذا لا تشيل همه
سحب اخوه معه وهم يشيلون جزمهم قبل يركضون بخطوات متسارعه يدخلون المسجد من هطول المطر بشكل غزير
دخلو المسجد وهم يحسون بالراحه أنسكبت بأجسادهم من أصوات المُصلين الي يقرون قرآن والي يذكرون الله قبل بداية الإقامه
طلعو من المسجد بعد ما انتهو من الصلاة وقراءة القرآن والدعاء
بهاج وهو يغطي اخوه معاه بجاكيته : قايل لك البس جاكيت لكن لازم ماتسمع الكلام !
وهاج بضحكه وهو يحشر نفسه بجاكيت بهاج : وافقد حنان اخوي الكبير وهو يغطيني معاه ؟ طبعًا لا
بهاج بابتسامه خفيفه : بيّاع كلام ! .. خلنا نعدي بسرعه لا نتغرق
وهاج بحماس : خل نروح الخيمه العيال فيها بيجي خالد بالعود
بهاج : على هواك
ركضو بسرعه تحت المطر وهم يضحكون بصوت عالي بسبب وهاج الي كان يدف بهاج عن الجاكيت بخفه
وقفو قدام الخيمه الي كانت بأخر الديره وصاده عن الديره وبيوتها ومحلاتها .. كانت بسيطه وقدامها دكه بزوليات حمرا
وما كان موجود الا سهاج الي كان يسوي القهوه داخل القز الي بنص الخيمه
رفع نظره وابتسم يوم شافهم : يالله حي بهيج ووهيج اول الواصلين كالعاده
بهاج وهو يدف وهاج عنه بتكشيره وهو ينفض ثوبه الي تملى ماء : انقلع عني هذا وانا اغطيك معي بجاكيتي يالخايس
وهاج بضحكه وهو يروح يجلس جنب سهاج : عادي ماء المطر زين ماعليك شر
رمى عليه سهاج فروته الي كانت بجنبه : تغط بها جاكيتك خفيف
بهاج وهو يجلس بجنبهم : مدري من اخوي انت ولا هو
سهاج بتمثيل للزعل : افا يعني منب اخوك !
بهاج تعدل بجلسته : يارجال تدري ما اقصد كذا صه ياحبك للتهاويل
وهاج وهو يدفي يدينه بالضو : الا وين العيال غريب محد جا
سهاج : ظني انهم هونو يوم شافو المطر مابه الا حن
وهاج : يعني ماهوب جاي خويلد وعوده! لا عاد
سهاج : تحرى له ربع ساعه عشر دقايق ان ما جا فجواب سؤالك لا
وهاج بضحكه وهو توه يستوعب : هو الطبيعي ان العرب في المطر يقرون ف بيوتهم الا حنا
سهاج وهو يستنشق ريحة المطر : بالله عليك احد يقعد في البيت والمطر يطّق ؟ شوف المنظر بالله
لفو كلهم يتأملون المطر وهو يطّق ويغرق الدكه والنخل الي قدامها والشجر الي حولها وخضار الأرض الي يشرح الصدر
اخذ بهاج الشاهي من يد سهاج : عشت ما كان ناقص هالاجواء الا شاهي النعناع
وهاج : الا رباح هو بيعود الديره هالاسبوع ولا .. ماقال لنا شي
سهاج : الا اظن بيجي قبل وهو يقول بيعود كل ويكند ولا بدت الدوامات عود للبلاد
بهاج : الله يعينه ماعند شيبانه الا هو وولا عنده الا حنا .. مكانه خالي والله
دخل نياف وهو يركض بسرعه وشكله مبهذل من الما وبغى يطيح من الحصى الي قدام الخيمه لو مافز بهاج وهو يمسكه بسرعه : اسلم وش بلاك يارجال بالهون
نياف وهو يلهث : صاحي انت وش بالهون هذا وانا جايكم ركض وتمليت ماء وش عاد لوني جاي بالهون على قولك
وهاج بضحكه عاليه : الشعر نياف مقدر مقدر
نياف كشر وهو ينفض شعره ويرجع عليه الغتره : خف علينا يالي شعرك حريري ناعم
سهاج : جا نياف وجت الصرقعه والطفاقه والمشاكل معه كملت
نياف وسع عيونه : توني جالس قل لا اله الا الله وشني مسوي
وهاج بطفش : ماني متحمس الا لخويلد اربه يجي عاد
نياف : ماشفت احد الديره طاخّه كلن متكرفس فبيته مابه الا حنا
سهاج بضحكه : يوه لو يشوفنا ابو فهد بس بيثبّت علينا أننا سرابيت الديره
نياف بتكشيره : يارجال اسكت مو رادني عنه الا انه كبر جدي
وهاج بنص عين : على اساس انك ساكت عنه؟ من الي سارق حذيانه بصلاة الظهر اجل؟
نياف فز : وش دراك انه انا؟
سهاج : من غيرك يعني
بهاج بحده : منجدك انت سارق حذيان الشايب! صاحي ولا مهبول
نياف بلا اهتمام وهو يشرب من القهوه : روّقنا عطاه ورعه فهيدان حذايينه ماماتو
دخل عليهم خالد بعوده الي كان مغطيه بجاكيته وظل هو بدون غطا
سهاج بضحكه اول ماشافه : مدري نرحب فيك ولا نهاوشك يالخبل مغطي العود ومهمل عمرك
لفو العيال وضحكوا على منظر خالد الي كان مغرّق ماء حتى نظارته مليانه وثوبه الأسود تمامًا وجاكيته الزيتي الغامق الي يلّف العود ما سلم هو بعد من الماء
جلس جنبهم وهو يدخل يدينه عند الضو بفك مرتجف : هذا اغلى مني صاحي تبيني اخليه يتغرّق
سحبه بهاج وهو يحط الفروه عليه : تدّف لا تمرض
وهاج بحماس وهو يصفق بيدينه : يلا يلا بسرعه دق لنا
خالد : وأنت ماهمك الا الدق سلم على الاقل
وهاج : توني شايفك بصلاة العصر اسلم لوش
خالد : السلام لله يا جاهل
وهاج قلب عيونه : انت الي داخل علينا مفروض انت الي تسلم
نياف : ياكثر بربرتكم وانت يابو نظاره عجل دق ولا كسرت عودك
سهاج : انا قايل ما وراك الا المشاكل
نياف ابتسم بشر : شوف تراي سارق حذيان الشويب ومفقع كفارات ابو راس حميدان وكاتب على جدار ابو حصه لا تخليني اكمل عليك
خالد بتعجب : اعوذبالله يالشر الي في عروقك الله يحمانا
مسك خالد بيدينه النحيفه الي كانت ترتجف آثار البرد وهو يثبّتها على العود الي كان باللون البني الفاتح : هذا عاد اهداء لربيّح بما أنه مرت علينا أول سهره بدونه بدا يدّق ألين ابتسمو الشباب لمن عرفو هذا لحن أي أغنية، و بدو يغنون بصوت واحد : اشتقنا ياحلو والله اشتقنا لكن الزّمان مفارقنا
وهاج بحماس وهو يرفع جواله ويصور لرباح كان خالد بالوسط قدام الضو يدّق بالعود وفروة سهاج على اكتافه وجنبه من اليسار نياف الي كان بجنب وهاج ويصفق بحماس بثوبه الزيتي الغامق الي كان مليان ماء والغتره الي ملفوفه بإهمال على شكل عصبه على راسه بينما وهاج كان بثوبه بدون جاكيت والقبعه السودا فوق راسه .. وبهاج من اليمين كان يشاركهم الغناء بصوت خفيف وابتسامه جانبيه بثوبه الاسود وجاكيته الاسود وهو ماد يدينه للضو بينما سهاج كان بثوبه الابيض بما ان كان عليه فروه وبيده دلال القهوه والشاهي وأكواب الشاهي والقهوه حقتهم حول الضو قدامهم .. والأجواء وراهم من باب الخيمه المفتوح بأكمله المطر الي كان غزير وصار الحين خفيف
قضو سهرتهم مابين طرب وقصايد وشاهي نعناع وهم بعد التصوير رباح كلمهم فيديو
وهاج بضحكه : هلا ورحّب ومطر وسحب
نياف بصوت عالي : ارحببووو ياحي هالوجه حياه
سهاج : والله ان مكانك خالي ياربيّح ماتوقعت بشتاق لك كذا
رباح بتكشيره : ايه العبو علي بكم كلمه وانتم مجتمعين وفالينها!
خالد : افا هذا وانا مغني خصيصي لك وبادي سهرتنا باغنيه لك
بهاج : بعدين شف هذا انت معنا مافاتك شي
رباح وقف وهو يركض للمطبخ : اصبرو اجل بسوي لي شاهي معكم
سهاج : لحد يحرق المطبخ بس
رباح وقف وهو يحك شعره بورطه : ياعيال هذا كهربائي ماعرف له والله البلشه
نياف عقد حواجبه : وش كهربائي وش البليه ذا
بهاج : فر بس حق العين وبيشتغل
سهاج ناظره بشك : انت تلعب عليه تبيه يحترق ولا وش عرفك
بهاج : افا وش العب عليه به .. يوم كنت ادرس السكن كان فرنه كذا
رباح بابتسامه عريضه : الا والله اشتغل كفو يا بهجة قلبي انت
سوا الشاهي ورجع الصاله وهو يفتح الشباك كان هوا بارد بس بدون مطر .. قعد يغني معهم وكملو سهرتهم مع بعض وهم مبسوطين لأنهم من زمان ما تجمعو كذا بوجود رباح حتى لو كان من خلف الشاشه ..
تعريف بعيال الديره /
بهاج بن خلف / أكبر عيال خلف ولد ال شجاع .. يشتغل بالتجاره بعد دراسته لتخصص ادارة الاعمال وله سلسلة محلات سيوف معروفه عمره ٢٧ سنه
وهاج بن خلف / أخ بهاج الأصغر منه .. يدرس طب جراحه عمره ٢٢ سنه
سهاج بن صالح / صديق العيال ورئيس الشله لأنه كان السبب بتجمعهم وهو أكبرهم ماسك محلات ابوه الي في الديره عمره ٢٨ سنه
رباح بن بتال / مهندس يشتغل بشركه معروفه بالبلاد ولا تم تعيينه الا مؤخرًا .. عمره ٢٧ سنه
نياف بن سعود / يشتغل في شركه عاديه بعد التوسّط له في منطقه قريبه من ديرتهم.. عمره ٢٦
خالد بن لافي / اخر سنه جامعه تخصصه لغات وترجمه .. عمره ٢٣ سنه
..
