بيت مهنـا /
بخرو وهاج وراسل مجلس الرجال وجهزو غرفة الضيوف لبادي ونياف الي حلف عليهم مهنا يباتون عنده لين يخلص ترميم بيتهم،
بينما عند الحريم كانو يرتبون الصاله لاجل يستقبلون هيا
اشعار بعد ما حطت الدلال: خلصنا وجمايل وتباهي جهزو الغرفه الي جنب المطبخ
مزون: زين ياامي يعطيكم العافيه اجل روحو واستانسو
الزين: ايه روحو انا والهنوف وسلوى موجودين هنا
دخلت اشعار المطبخ عند تذكار ورسن الي كانو ياكلون باقي الحلا وهم يحشون في جميع الكائنات على وجه الارض
مسكت اشعار راسها: يالله بس بس بسكم قراض في المسلمين حلوقكم ماجفت؟ اهب
تذكار بتكشيره رمت عليها علبة الماء الفاضيه: اذكري ربك علينا وش عليك فينا مالك دخل
رسن: الا اقول هاه متى نطلع
اشعار ناظرت ساعتها: اصبرو شوي تو باقي على العشا نص ساعه نصلي ونطلع
تذكار: وين تباهي؟ ابي اخذ سلك شاحني حاطته في شنطتها
اشعار وهي تطلع الخضروات عشان تسوي سلطه: تلاقينها مع جمايل في غرفة الضيوف
نطت اشعار من فوق تيبل المطبخ وهي تطلع بينما رسن ركضت لاشعار وهي تسحبها من كمها
اشعار: ايي وجع وش فيك عليك
رسن: وين رحتي الظهر؟
اشعار بارتباك: وين رحت؟ دخلت المطبخ اجيب الماء
رسن ضيقت عيونها: لا ياشيخه؟ والحين باصدق انا يعني!
اشعار بنرفزه دفتها: والله عاد تصدقين ولالا شي راجع لك اذلفي عن وجهي
رسن بحده: تراك تماديتي وكثير يا اشعار بهالحب .. انتبهي على نفسك قبل تغرقين
اشعار غمضت بقوه: ثاني مره اقولك مالك دخل .. أتهجى لك الحروف ؟
رسن وهي طالعه: انا الي بتهجى لك حروف "انتبهي" يا اشعار
زفرت اشعار بقوه وهي ترمي الخيار على القطاعه : والله عشنا وشفنا حتى رسنوه بتنصح.. اخر زمن
تباهي رمت على تذكار السلك: هاك امسكيه بس ازعجتينا وصجيتينا كلها سلك
تذكار وهي تمسكه: هذا يا حبيبتي اهم منك للمعلوميه
طلعت وهي تدندن وتلعب بسلك الشاحن بس استغربت وقت شافت رسن جالسه على الدرج وهي سرحانه
جلست بجنبها وهي تسحب شعرها: بووه
دفتها رسن بانزعاج: وجع يا سخيفه
تذكار شهقت بتمثيل: الله يا الدنيا الحين تذكار سخيفه يا رسن ؟ والله ما عندك سالفه
رسن تنهدت بدون ترد عليها
تذكار : خير وش فيك ؟ ليش عاقده النونه توك ما فيك شي!
رسن بغبنه: قاهرني حال اشعار ! احسها تبالغ وكثير في حبها وانا ما ادري وش تالية هالحب وقرادة الحظ
تذكار : وبس؟ هذا الي مضيقك يعني .. وش عليك منها خليها تحب وتستانس دامها صاينه عمرها وبهاج رجال والنعم فيه وولا واحد فيهم تمادى بحق الثاني ابد حدهم سلام وكلام عابر
رسن بجديه: هالكلام وهالسلام وهالحب قاعد ياخذ من اعمارهم كثير ولا صار بينهم شي بيطيحون طيحه قويه .. بيهوون من سابع سما لسابع ارض عشان كذا انا خايفه عليها !
تذكار بقشعريره: اعوذبالله منك ومن فالك ومن حكيك .. ماعليك في العرب ولا عليك في الجاي خليك في اللحظه وبس لا تعقدين الامور ماندري بكره حنا على الارض ولا في قبورنا وشوله تضييق الصدر والتفكير الزايد جاتنا تباهي الثانيه
رسن وهي توقف: كنت مثلك وانقّد على تباهي لكن الحين معطيتها كل الحق صدقيني لأن كسرة النفس توجع وحيل!
-
خيمة سهاج /
ارتكز بهاج بوسطها وهو يشد فروته عليه وماد يدينه للضو الي قدامه ومركّز نظره عليه بشرود ،
حّس بخطوات تقترب ورفع راسه وهو يشوف وهاج ورباح مقبلين عليه
وهاج بتفاجئ : بهاج ! انت هنا مو في الرياض؟
بهاج بنفسيه قافله : مدري عنك انت وش تشوف
وهاج بتكشيره : يالطيف على الاخلاق مدري عنك مب عادتك لاجيت تقعد هنا الخميس بالعاده مستنّر ببيت جدتي لازق
مارد وهاج ورباح همس لوهاج: اسكت عنه واضح النفسيه صفر
وهاج بعناد : ليش وش فيك اخ بهاج ولا ماتسمع احد يتكلم؟
بهاج بصبر : اسمعني انت وياه أن كان عندكم شيٍ يسليني ياجعله مرحبا وأن كان عندكم مايزيد ضيقتي فلا تقبلون
دخل سهاج على كلامه وهو يردف بتعجّب : افا يا بهاج وش هالكلام الكبير وش صايبك !
وهاج بزعل : انا ادري عنه ولا من متى حنا الي نزيد ضيقته الظاهر خرف
بهاج تأفأف وهو يشوف سهاج دخل : كملت الحين
سهاج برفعة حاجب : اقول يا الطيب تراك بخيمتي لا تغلط !
ما رد بهاج وهو يفرك يدينه ببعض بينما رباح جاه إتصال ووقف : انا بروح مع ابوي لعشا آل ظافر احد منكم بيجي ؟
وهاج : انا بجي بروح مع راسل .. مفروض اني هالحين مع هباب وخوالي وهم يقنصون بس قعدت عشان بعض الناس وليت بعض الناس يقدّر
ابتسم بهاج بجانبيه وهو يسمع نغزات وهاج ولا رد
رباح بضحكه : اجل خل بعض الناس بالطقاق الي يطقهم من جينا وهم مالهم خلقنا حتى انا ماسلم علي وهو ماشافني من اسبوع
بهاج رمش بسرعه وهو توه يستوعب وفز وهو يسحب رباح ناحيته : ياخوك اعذرني والله اني كنت اهوجس ولا حسيت ولا انتبهت اني ماسلمت عليك
رباح شد على حضنه وهو يهمس له: عسى الي ماخذ البال يتهنى
بهاج بتكشيره : الا جعله ما يتهنى يارب!
بعّد عنه رباح : لا هذي يبي لها جلسه اجل !
بهاج بسرعه : لا لا مابه الا الزين ان شاءلله رح وجّب مع الشايب همن تعال يمنا
رباح : يلا اجل راجع لكم ياويلكم ارجع والقى الخيمه تهوي ! .. وهيج تمشي معي؟
وهاج وهو يوقف: ايه اجل وش يقعدني عند هالناس
بهاج بضجر: يالله عليك وعلى لسانك ياوهاج
ناظره وهاج ببرود وطلع مع رباح الي كاتم الضحكه على وهاج الي يسب في بهاج جنبه وهم بطريق الجيّه كان قلقان عليه
رباح ضحك بصخب : ياخوي طيب قل لا اله الا الله على طول استلمته سب واضح الرجال فيه شي مضايقه ماهو بهاجنا الاولي
وهاج بتكشيره : لا يا شيخ وحنا الي يحّط فينا ضيقته؟ *ناظر رباح بتفكير* يعني انت ممكن نقول يحط فيك حرته كيفه بس انا اخوه خير يابوي!
رباح وسع عيونه : الا يا قليل الخاتمه انا عادي وانت لا ليه على راسك ريشه احسن جعله يكمل عليك لا عودنا بعد
خزه وهاج وهو يلف عنه ويحس طاقته بدت تنفذ لهذا اليوم .. مزاجه تعدّل وبكثييير بعد ما نام و بعد وصول راسل لكن مازال الى الآن يغلبه تفكيره
في الخيـمه /
سهاج حط يده على خده بملل : ما ودك تتكلم يعني؟
بهاج : وانت من معينك مصلح اجتماعي فوق روسنا؟ خلصت من نياف وجاي تكمل علي
سهاج وهو يتعبّث في الحطب : هذا جزاي خايفن عليكم مالت عليكم وعلى الي بيخاف عليكم
بهاج : يقولون اذا تبي تعرف الملقوف حطه عند الضو
سهاج بذهول وهو يترك الحطب : انت وش فيك متفلت علينا اليوم!
بهاج بتنهيده مسح على وجهه: ولا شي مالي خلق تزعل انت بعد كفايه وهاج وهم كيف اراضيه
سهاج : لا تخاف مانيب زعول مثل اخوك
بهاج : اقول حدّك على اخوي عاد !
سهاج بضحكه : محد قال شي والله الي متفلت صدق
بهاج بشرود : كلمني عمي ورحت له
سهاج فز : وش تقول انت !!!
بهاج بضيقه : ضايقه فيني يا سهاج .. والله انها ضايقه ولاني لاقي من يدلني ولا يطلعني من هالشور
سهاج بحميه : افا بس تضيق وسهاج اخوك ! علمني وابشر بعزك والله لا افزع لك حتى لو هو بروحي
بهاج ابتسم : جعلك تبطي حي لا عدمناك .. لكن خل هالموضوع وانا بحاول احله بطريقتي ان كان به طب يستطاب به
سهاج بحزم : دامك بديت الموضوع فلا انت منهيه لين تعلمني بكل شي !
تنهد بهاج قبل يبدأ يحكي له عن موضوع وصية أبوه الي يحاول ينفذها من عشر سنين .. و تنفيذها كان بيد فاهد الي شرّط عليه يتزوج المى لأجـل يعطيه الي يبيه
سهاج بتفكير : هو يبي منك تاخذها عشانه بيسافر ويبيها تحت حماية رجالن كفو؟
بهاج بطفش : وشني اقول لك من اليوم اجل تستهبل سهاج!
سهاج بجديه : اجل جاها سهـاج !
بهاج بذهول : سهاج وش تقول أنت!!!
-
إنتهـى.
