ديرة بهّج الليل ، تحديدًا بيت مهنـا |
تجمعو حول الصحن ومحد منهم كان ياكل الا هباب وراجح، مهنا اخذ لقمتين وقام بينما وهاج كان يلعب بالرز وبهاج مركز نظره عليه
راجح بإستغراب : وهاج علامك ما تاكل! انت وضعك ماهو طبيعي اليوم ماش
وهاج بابتسامه صفراء : مافيني شي ياخالي بس ماكل انا وخالد بالجامعه .. بالعافيه عليكم
قام بسرعه مو تارك لهم مجال للأسئله بينما بهاج تنهد بهّم، وقطب جبينه بتفكير إلى متى بيستمّر هالحال ؟
وعّى على حلطمة هباب الي كان يهاوشه راجح : يابوي وش فيك قلبت علي فجأة طيب اكل انا
راجح وهو يوقف : قم معي نشوف الرجال من صبح وانت تاكل ولا عشرين لقمه واصل
هباب وسع عيونه : يبه تعد لقماتي بعد!!!
راجح : اعقب بتحاسبني يا ولد زمانك
هباب وقف بتبويز: أصلًا انسدت نفسي خلاص هذاني قمت
راجح ضيق عيونه : انسدت نفسك اجل لو ما انسدت بتاكل الي حوالينك
هباب شوي وينجلط : يبه منجدك انت !!
رائد دخل بضحكه : امش ياهباب مدري وش فيهم الاباء متسلطين علينا اليوم حتى انا ابوي قالي امش بدون غدا
بهاج شاركهم الضحك وهو يشيل السفره : اجل بدخلهم ونطلع
رائد اخذها منه : لا خلكم الهنوف على وصول خل البنيات ياخذون راحتهم
رجّف قلب بهاج وهو يحاول يكبح إبتسامته : ابشر بعزك ما طلبت شي سم
رائد ناظره بريبه : وش فيك قلبت فجأه!
هباب ضحك بصخب وهو يدخل بعد ما غسل يدينه بالمغاسل الي كانت قريب من المجلس : طاري الهنوف غير مزاجه شكله
راجح رفس ولده على جنب : اعقب يا ذا الولد وش الهنوف اصغر بناتك هي ! عمتك ذي ولها احترامها ثاني مره تقول عمتي الهنوف
زفر هباب وهو يمسح على وجهه بهمس : صبرًا جميلًا والله المستعان
راجح رفع حاجب : خير قلت شيء ؟
هباب بإبتسامه بلاستيكيه : اقول ابشر على خشمي
بهاج مر من جنبه وهو يهمس : تستاهل عسى خالي القوه فيك
بينما رائد مضيّق عيونه عليهم بشك : وش يدور بينكم انتم !
كشر هباب بدون رد لانه خايف لو يرد يصفقه ابوه الي اشتّط فجأه بينما بهاج ضحك : يا حلو المؤدبين
ما كمل كلامه بسبب انهم فزو بقوه لمن سمعو رجفة الباب الي ما كانت الا من مهنا وهو يصرخ بغضب ويسفل فيهم
بهاج ركض للمغاسل وهو ماسك شماغه بيد وثوبه باليد الثانيه بينما راجح ركض ناحية الباب بيطلع وهباب وراه ورائد وراهم لكن راجح نسى جواله على المركى ، لف بياخذه وصقع في هباب الي صقع فيه رائد ونص الرز تناثر على الارض والشطه انكبت على ثوب هباب من ورا والسفره طاحت بالأرض
راجح بعصبيه : وثوّل فيك انت وياه ما تشوفون انتم اعدمتو الدنيا جاراكم الله العجله
هباب الي كان يرمش بصدمه اردف بصوت مكتوم : الشطه انكبت علي!
رائد الي انحنى يجمع الرز والسفره : والله انه مب وقتك خم عمرك بس نطلع قبل يطلع الشايب ارواحنا
بهاج كان منسدح قدام المغسله من الضحك على شكل هباب المصدوم من الشطه ومصدوم من كمية الهجوم عليه وهو ماسوى شي
عض شفته هباب من الداخل يكتم قهره وهو يتجه للمغسله لكن ماعاد قدر يسكت وهو يشوف بهاج يضحك : ضحكت من سرك بلا حلايا هالكشره فاتح كلخك عسى عصا جدي ماتوقع الا فظهرك
راجح اخذ جواله وهو يلف عليهم بعصبيه : قم امش انت وياه لا يفصل علينا ابوي
هباب الي كان شوي ويبكي لف بغبنه: امشي وين وثوبي كله شطه؟
راجح : والله قومك رفالتك دبر عمرك .. وانت الثاني امش لا اعبيك بالما الي وراك
كتم بهاج ضحكته وهو يمشي من جنب هباب قبل يغطي خشمه بقرف مصطنع : وع يالريحه وع
راجح لانت ملامحه ماسك ضحكته وهو يدف بهاج : حدك على ولدي عاد لا تفلها
هباب بقهر : لا بدري يبه زين الحمدلله تذكرت اني ولدك بس
راجح تحمحم : لا تفلها انت الثاني وغسل والحقنا
فصخ هباب ثوبه وهو يغسل مكان الشطه بتحلطم لا نهائي وهو يسفل في رائد الي ماله دخل لكنه مايقدر يسب ابوه
رائد دخل بإستعجال وهو يرمي عليه احدى ثيابه : والله انك ماتستاهل بس عشان بيت الشويب.. وانا وش دخلني تسبني انا الي لفيت عليك
هباب التقط الثوب بنقد : وتوك تعلمني وتوك تجيب يعني قل من البدايه طيب وانا مشتغل تنظيف سريع ومتحمل ريحة الشطه الي فقعت مرارتي بعدين انت وياه اخوان كلكم واحد
رائد سحب ثوبه بحركه سريعه : ان ماخليتك تخيس بريحة الشطه وتنتشر سمعتك في الديره كلها ابو شطه جا ابو شطه راح ماكون ابو مهنا
هباب قرب وهو يبوس راسه بسرعه : نخيتك ياللحيه الغانمه جعلني فدى الوجه ذا ان تخليه عندي وش فيك يارجال امزح معك
دفه رائد وهو يرمي عليه الثوب من جديد : خلص بس خابر اني لحيه غانمه بدون شهادتك
مسكه هباب وهو يردف بهمس غيض : جعل ربي يعطي هباب الصبر عليكم اهخ بس يا راسل وينك ما يفكون عني الا لمن يستلمونك عسى ربي يجيبك
برا |
مهنا طق عصاته بالارض بعصبيه وهو يشوفهم مقبلين : لا بدري كان اخذتو راحتكم وقعدتو تتقهون وبالمره تحلون وتاخذون علوم بعض وش معجّلكم
راجح ميل فمه : معليش يبه نتغدى .. يلا نسري ذلحين
مهنا : لا وانا ابوك بنبسط هنيا اجل وش رايك
راجح سكت وهو متفشل بينما رائد وبهاج وجيهم صارت حمرا من كثر ما هم ماسكين الضحكه
تقدّم مهنا ولحقه راجح على طول لأجل ما يسمع طقطقتهم وهباب لحقهم بعدها وهو يركض بسرعه لا يفصل عليه جده كافيه فصلة ابوه
وصلو لبيت بادي وهم يبدون مع الرجال المختّص الي كلمه رائد يحاولون يصلحون اي شي في البيت على الاقل لو شي بسيط قبل يطلعون بادي وهيا
-
