بسيارة نايـف /
تركّت أشعار على الدريشة بشوق، وهي تدندن بداخلها آلحان أغنيتهم المُفضلة.. مو منتبهه لرسن الي كانت تصورها وهي كاتمه الضحكه على شكل أختها الهيمّان
وقف نايف قدام المحطه وهو يردف : وش تبون من البقاله ؟
الهنوف وهي تصور الطريق ترسله بقروب أخوانها : انا مابي شيء شوف البنات
رسن نطت لقدام بين أمها وأبوها : يبه تكفى ما ابي من البقاله ابي من المقهى الي هنا
الهنوف لفت وهي تضربها على راسها : وجعه خرعتيني وطارت السنابه عودي مكانك ما منك فكه انتي
رسن بتبويز وهي تحك راسها : يبه والله انها بحق لو ما تجيب لي الي ابي و تراضيني!
نايف كتم ضحكته على شكلها : يعني امك تزعلك وانا الي اراضيك؟
رسن ابتسمت بتملّق : يعني بما إنها حبيبة قلبك أنت تراضيني بدالها
نايف بتنهيده : ابشري وهو احد يقدر يقولك غير هالكلمه؟
ميت رسن بوناسه بينهم من جديد وهي تبي تبوس راسه لكن يد الهنوف الي رجعت تضربها وهي تصارخ : رسين! والله ما يحصل لك طيب يا زفت هذي ثاني سنابه تضيع
نايف ما قدر يمسك نفسه على شكل رسن وانفجر ضحك وهو ينزل من السياره و يفتح الباب جهتها ويبوس راسها : خلاص يا ابوي ما عليه بجيب لك فوق القهوه حلا عشان تروقين
رسن وهي تتمسكّن بتمثيل للزعل : اي يبه وابي يعني لو ميه تعرف ثمن رأسي غالي
نايف بإبتسامه وهو رافع حاجب : يعني الشغله إستغلال ؟
رسن بإبتسامه : افا بس يا نيوف تقول عن بنتك تستغلك؟ تهقى قلبي يقدر
دفها نايف بشويش : وش نيوف بعد تمونين انتي بزياده
الهنوف وهي تلف عليهم : أحسن قايله لك عوبا ما عليك منها بس يلا دلعها يا نيوف
نايف بغمزه : اذا بسمع نيوف منك بخليها تقولها دايم لي
صفرت رسن بحماس بينما الهنوف ضحكت وهي تغطي وجهها
قبل ترجع تلف على قدام بخجل : خير!
نايف بضحكه : شفتو أمكم ؟ ما تخلي الواحد يتغزّل براحته
التفت على أشعار قبل ينطّق : وأنتِ يابوي وش تبين؟
ما ردت أشعار الي وقفت السيارة وأنصفقت رسن مرتين ونزل أبوها ودار أكثر من حوار وهي مو يمهم أبدًا ما زالت غارقة بأفكارها وآلحانهم
نايف قطّب جبينه بإستغراب : اشعار؟
رسن بهمس : مب يمنا الاخت
أعتدلت وهي تصفقها بقوه خلّت أشعار تفز من الخوف : وش !!!
نايف بتأنيب : رسن ابوي علامك على أختك روعتيها
اشعار بغضب صفقت راس رسن : يا السخيفه يا الي مافيك ذرة انوثه طيرتي قلبي من محله وكسرتي يدي وجع حديد مب يد
رسن ضحكت بصخب على شكلها المرتاع قبل تردف وهي تغمز بخفه عشان ما يشوفها أبوها : أنا الي طيرّت قلبك؟
وسعت اشعار عيونها قبل ما يسمعون تهزيء أمهم
الهنوف بتكشير وهي تمسك راسها : ياربي على إزعاجكم الي ما يخلص .. نايف روح جب لك الي تبي وخلهم ينثبرون لا تجيب لهم حتى ماء
نايف بهمس : ارسلي الي تبون على الواتس
بعّد وأردف قبل يسكر الباب : ابشري يا الهنوف ما طلبتي شيء ، ولا حتى ماء بجيب لهم ما يستاهلون فضحونا
ضحكت رسن وهي تدخل محادث أبوها واتس بينما أشعار زفرت : وش الي وش نبي وش السالفه
رسن بملل : ايه وش عليه غارقه بالعسل ما تدرين عن أحد يمّك
رفعت الهنوف حاجب بينما أشعار بلعت ريقها وهي تضرب رسن من تحت
رسن فزت وهي تستوعب قبل تقول بترقيع : ياحظكم بس ما يعطونكم محاضرات زينا غارقين بالعسل من سهولة موادكم وتساهيل دكتوراتكم تخيلي يمه حتى اليوم مخلصه قبلي لأن دكتورتهم ما جت مدري محضرتهم وطلعت
-
بيت فاهـد /
إستندت المى على سريرها وهي تلوي شعرها بتفكير ، أول مره اشوف ابوها وامها بهذي الحاله .. وش صاير يا ترى؟ بلعت ريقها بقلق معقولة صاير بينهم شيء؟
تنهدت وهي تفرك جبينها وتهمس : يارب خير
تأفأفت بطفش من جوالها الي ما وقف رنينه قبل ترد بعصبيه : نعم خير ؟ أنت ما تفهم عربي ولا أيش تبغى تسمع اذلف بأي لغة عشان تستوعب ؟
الوافي زفر براحه لمن سمع رد : أبي أسمع صوتك
المى غمضت بقوه : تراك تحوم الكبد خلصني وش تبي
الوافي بجدية : بخطبك من أبوك من جديد ، ولا أبي أسمع رد غير موافقة !
سكتت المى بذهول تحاول إستيعاب الي سمعته، قبل تضحك بصخب بعدم تصديق : أنت أذنك تسمع الي قلته ولا لا ؟ مريض أنت ؟ تخسى و تعقب وبعيده عن شاربك المى بيوم من الأيام تكون حرم لك .. حتى بالحلم ما تحلم بها
الوافي : انا داري هالكلام بس كبرياء ، أنتِ باقي تحبيني والي صار ماهو مستاهل ردة فعلك ذي ومبالغتك يا المى! كبري عقلك وفكري زين وانا متاكد لو يعرف عمي بالسبب هو اول من بيخليك تقبلين
المى بقهر : ما يستاهل ردة فعلي هذي ؟ أجل زين يا الوافي .. انا بعد خنتك وش قولك؟
الوافي بضحكه : كذابه .. تبين تقهريني وبس
المى ببرود وهي تكمّل كذبتها : لا ما أكذب و بأقولها ولا عليّ فيك .. وبنكمّل سنتين مع بعض وش رأيك ؟ و الموافقه الي بقولها بتكون له مو لك ، بترضى الحين تاخذني ؟
الوافي بجنون : المى لا تستفزيني ! مستحيل تكونين سويتيها ومستحيل اقبل بكذا شيء لا تخلين إستفزازك يحول بيننا
المى ضحكت بسخرية : يوجّع الشعور صح ؟ .. تدري تضحكوني دائمًا أنتم يا الرجال ، تروحون و تلعبون بذيلكم و تسرحون و تمرحون وتدخلون بعلاقات و تكسرون قلوب بنات كثير و تتسلون و لمن يجي وقت زواجكم تدورون البنت الي صاينة نفسها معتقدين بإنها بترضى فيكم بلا أيّ شك .. لكن تعقبون و تخسون لأن مثل ما تدورون الي صاينة نفسها حتى البنات ما بيرضون الا باللي صاين نفسه وبيصونهم زمن جدتي ولّى و أنا ما بأخذ الا سيد الرجال الي يستاهلني ، ما راح أبخّس حق نفسي عشاني أحبك لا والذي نفسي بيده أن أدوس على قلبي وأمشي فوقه و جرّب تتصل فيني مرة ثانية الصور كلها بتكون عند أبوي وشوف وش بيصير لك
-
إنتهـى.
بارت قصير فقط عشان يجدد عهدي بِكم و يعطيكم خبر إني ما سحبت و راجعة🤎.
