لمحـات من المـاضي /
كانت مبسوطه وهي تناظر بالخواتم بين يدينها، أخيرًا طلعت ويمديهم يتملكون وقت يرجع الوافي
انسدحت على سريرها وهي تنط بفرح .. مو مصدقه إن الموعد قرب خلاص وبتصير للوافي ويصير لها!
ماقدرت تمسّك نفسها زيادة و أخذت الخواتم وهي تصوّرهم وترسلها للوافي "شوف إيش جهز"
مسكّت جوالها وهي تنتظر رده بحماس من شافته فتحها على طول لكن عقدت حواجبها من ما شافت منه أي رد و ظل خمس دقايق وهو متصل الآن لكن ما فيه أي رد ، إتصلت عليه بسرعه لكن صدمتها كانت من سمعت الرد صوت بنت
بعدت الجوال عن إذنها وهي تتأكد من الإسم ، الإسم مو خطأ لكن الرد خطأ !
بلعت ريقها وهي تحاول تنفي شكوكها : وين الوافي؟
البنت : مين أنتي ؟ ما تستحين على وجهك تتصلين على رجال متزوج بأنصاص الليول !!
المى إتسعّت عيونها بصدمه وهي تسمع الرد : تستهبلين أنتي ! إيش الي رجال متزوج وش قاعده تخبصين انتي! انا خطيبته المى وملكتنا بعد كم يوم .. كيف رجال متزوج لا تجننيني!!!
ضحكت البنت بسخريه وهي تلعب بشعرها بلؤم : يوه حتى انتي قالك بيتزوجك ؟ ماعليه ياقلبي الايام تجبر كسرّك والحين قفلي ولاعاد اشوفك متصله على هالرقم لا والله اخلي فضيحتك على كل لسان !
قفلت البنت منها وهي تتلفت تشوف الوافي جا ولالا وقلبها يرقع من الخـوف، لو يدري باللي سوته بيذبحها لا مُحال! .. حذفت المكالمة ورجعت الجوال مكانه وهي تزفر بهدوء ترجع تلاعب ولدها الصغير
اما المـى ، مازال الجوال بإذنها وكلمة "رجال متزوج" ترّن بإذنها الى الآن.. معقول الي هي سمعته ؟ رمشت بسرعه ورا بعض وهي تحس بدقات قلبها تتزايد
المى بهمس ودموعها تجمعت بعيونها : مستحيـل!
ظلّت على حالتها وهي تكمّل بعدم تصديق بصراخ : كيف كيف متزوج! كيف يسوي كذا كييييف!!!!
دخلت أمها بفزع من صراخها وهي تمسكها : المى بسم الله عليك وش فيك؟
المى صرخت بجنون وهي ترمي الخواتم : كل شيء كذبه يا يمه كل شيء! يمه الوافي متزوج يمه متزوج!!!!
اتسعت عيون مها بصدمه وهي تحاول تمسكها : المى اهدي اشرحي لي شوي شوي وش تقولين انتي
المى إرتخت بحضن امها وهي تشهق : يمه طلع يكذب علي .. طلع متزوج كيف يا يمه كيف؟ كان يحبني كنا نحب بعض وأثثنا بيتنا سمينا حتى اطفالنا كيف الحين يغدر؟
بعدت عن امها وهي تمسح وجهها بعنف : يمه اكيد فيه شيء غلط صحيح؟ الوافي مستحيل يسويها فيني مستحيل!
-
غمضت عيونها بقوه وهي تتذكر هذيك اللحظه الي ما نسّتها بيوم، طعنة الختام الي وسمها الوافي بقلبها بكل إمتياز! وكأنه تفنن بتعذيبها .. ما تنسى إنهيارها وصراخها الي عّج بالبيت كله، دموعها الي ما جفت ابد وجنونها الي تعبّث بقلبها لأنها ماكانت متوقعه ولا واحد بالميه هالشيء منه.. كيف القلب المُحب يخون ويغدّر؟ كانت معطيته القمر بإيد والشمس بإيد كيف يخونها ويطعنها كذا؟
تنهدت بألم وهي ترمي الأوراق قدامها بعصبيه : الله ياخذك يا الوافي الله ياخذك ويريحني منك !
ناظرت الأوراق بضجّر الى الآن ما سوّت ولا أي تصميم! الى متى بتظل تناظر الاوراق وهي تناظرها؟
وقفت مقرره تأخذ فترة راحه شوي وتشرب قهوه لعلّها يزورها الإلهام، وتطّل على أمها وأبوها الي كانو هاديين تمامًا والبيت هادي وولا يصدّر منهم أي صوت
طلعت وشافت امها طالعه من جناحها: ماما زين إنك هنا .. وش كنتي تبين تقولين وليش ابوي خذاك بهالطريقه وإيش الأصوات الي سمعتها تحت؟
مها بتنهيده : شوي شوي تبيني اجاوب على هذا كله؟
المى رفعت حاجب وهي فاهمه حركات أمها الي تراوغ عشان تتهرّب من الإجابة: اول سؤال وش كنتي تبين تقولين وليش اخذك ابوي بهالطريقه؟
مها : بتعرفين بعد اسبوع بيقولك ابوك او بمدة أقل
المى عقدت حواجبها باستغراب: ليش وش هالشي الي ما ينقال الحين؟
مها بعصبيه : المى ترا ماني فايقه لك الموضوع عندك ابوك تبغين روحي صجيه هو
المى بتعجب : بسم الله وش فيك عصبتي!
ماردت مها وهي تنزل لتحت لحقتها المى وهي تردف : طيب وش الاصوات الي تحت مين كان هنا؟
مها بغموض: ولد عمك خلف .. بهاج
المى بذهول : ولد عمي خلف !!! وش طلعه من القبر هذا اخبره ناقع في الديره
مها ماردت وهي تتحّسر على بنتها في داخله
-
بيت مهنـا /
تذكار وهي تشيل صينية الحلا: هاه يلا كل شي تمام نطلع؟
رسن وهي تعّد الألعاب الورقية الي معها: اصبري أتأكد إني اخذت كل الالعاب
اشعار الي كانت ماسكه القهوه والشاهي بإيدها: انا كل شي تكلّفت به معي
تباهي الي كانت شايله قهوتها البلاك هي واقبال : وانا بعد
جمايل وهي تسكر عبايتها : اجل يلا امشو جبت الزوليه خلاص
طلعو ومزون توصيهم ينتبهون على أنفسهم
اقبال بتقزز: الحين لين متى بنمشي في هالتراب؟
تذكار بسخريه: شوي شوي يابنت الضاحيه قدامك درب طويل مع الاسف
رسن: بنروح للمزرعة الي بأخر الديره الي ورا خيام سهاج وشلته
جمايل: ادعي بس محد فيهم هناك مالي خلق يسوون لنا سالفه
رسن بهياط: يعقبون ويخسون وش دخلهم فينا! هذا الناقص
اشعار: شوي شوي بس لا ينط لك عرق يا اكبر مهايطيه لو يطلع واحد منهم بوجهنا الحين انحشتي اول وحده
تباهي بملل: يالله على غبائكم نروح من الدرب الي ورا الخيمه اسهل من كذا مافيه على فكره !
قابلو وهاج ورباح الي كانو جايين جهة بيت ال ظافر
مشى رباح عنهم على طول وهو يتجه للبيت بينما وهاج وقف عندهم باستغراب: وش عندكم؟
تذكار باستهبال: ابد بس نكشت في ربوع الديار
وهاج سحب القهوه الي بيد تباهي بسرعه: تسلمين يابنت خالي ماتقصرين ادري انها لي انا وراسل كثر خيرك .. *لف على الصينية الي بإيد اشعار* تعالي انتي اشوف وش معك بعد
تباهي بقهر: وهيج يالدب رجع القهوه! مالك داعي
وهاج قلدها بسخريه وهو يسحب سوفليه من الصينيه: اقول ضفو وجيهكم بس وانتبهو لاعماركم
رسن بغبنه: لا والله يعني بعد ماسرقت وخلصت يقالك المهتم الحين
وهاج باستهبال: اي مهتم فيك انتي بالذات
رسن : يع اذلف بس
ضحك وهاج بصخب : يلا بروح أصلًا بس انتبهو لاعماركم جمايلي حبيبتي انتي خصوصًا الباقي ماعلي فيهم مره
تباهي قلبت عيونها: عشتو على اساس ميتين على اهتمامك عساك انت وراسل تشرقون بالقهوه قل امين
وهاج أرتشف من القهوه وهو يتلذذ بها: الله يا الطعم الفناننن .. اشربي من قهوة جمايل مابعدها قهوه
تباهي: ويوم مابعدها قهوه ليش ماتشرب منها انت؟
وهاج بعباطه: لا انا ذايقها ومخلص ابيكم تذوقونها انتم ابي لكم الزين
تذكار بطفش: اقول خلاص ضف وجهك تراك أخرتنا
مشى وهاج وهو يكش عليها بس وقفه صوت تذكار: هيه وقف شوي تعال
وهاج: خير وش عندتس
تذكار: تذكر عود صديقك هذاك؟ ابيه
وهاج : خالد ماهو في الديره راح البلاد بيت عمه بس فيه واحد له في الخيمه غير الي في البيت تبينه؟
تذكار بحماس: اي تكفى !
وهاج: خلاص لا طلعت من العشا بجيبه لكم أنتم بتقعدون عند المزارع؟
تذكار: ايه لا تنسى طيب؟
هز وهاج راسه ومشى للعشا
جمايل باستغراب: وش تبين في العود!
تذكار بحماس: ماقلت لكم؟ صرت اعرف عزفي صار فنننااان
اشعار بسخريه: امحق فنان الا تصمين الاذان
تذكار بتكشيره: انقلعي والله صار حلو! انتظري وبتسمعين
كملو طريقهم للمزارع وهم يفرشون الزوليه ويرتبون اغراضهم فوقها
رسن استنشقت الهوا وهي مغمضه عيونها: الله يالهوا الي يرد الروح
جمايل بابتسامه: شفتو عشان لاقلت لكم العيشه بالديره تجنن تصدقوني
اقبال برجفه: بس برد مره!!!
اشعار وهي تصب الشاهي: ماعليه الشاهي الحين يدفينا
مسكت تذكار جوالها وهي تشغل اغنية عشوائية وتحط الجوال بجنبهم على صوت خفيف نسبيًا : طلعو الالعاب يلا
طلعو الالعاب الورقيه وهم يلعبون لعبه ورا لعبه ويشربون الشاهي والقهوه مع الحلا والفطاير ومستكنين على هالاجواء
شرقت تباهي بالشاهي وهي تردف بخوف: سمعتو الصوت الي انا سمعته؟
اقبال الي مركزه على الورق: اي صوت؟
تباهي: صوت كلب!!!
تذكار بصراخ: رسن ياغشاشه! وربي انك فقاشه انقلعي مابلعب معاك
رسن بضحكه: قولي انك عرفتي انك بتخسرين وحطيتيها بالغش .. حركات الابتدائي هذي ما تمشي علي والله ان تكملين وانتي ماتشوفين الدرب
اشعار بقهر دفت رسن: الا والله انك غشاشه شايفتك انا طلعي الاوراق الي تحتك
تباهي بصراخ : يازفتات اسمعو الصوت!!!!
جمايل بطفش: تباهي حبيبي روقينا مافيه شي تتخيلين كملي لعبك بس ترا قربتي تخسرين
قاطع تباهي الي كانت بتتكلم صوت الكلب الي يقرب ، بلعو البنات ريقهم وهم ينتظرون بعض بخوف
اشعار بتأتأه: كككلب!!!!
تباهي بعصبيه وهي توقف: لا اتخيل انا اتخيل كملو لعبكم اشوف
وهاج الي كان يصوّت للبنات عشان لو ما كانو متغطين يتغطون وبإيده العود
تذكار بصراخ: تعال بسرعه
رمى وهاج العود بنص الجلسه: خير وشبك تصارخين اسمع انا
اقبال نطت وهي شوي وتبكي: قلت لكم لا نجي هنا يع يع يع
وهاج باستغراب: خير علامكم انتم
تذكار مسكت العود وهي من شافته نست كل شي حضنته بسعاده وهي تحط اناملها عليه: احم احم اسمعو يلا بطربكم
اشعار بعصبيه دفتها: انتي فاضيه وش الي بطربكم قومي لمي معانا الاغراض خلينا ننحاش
وهاج بعصبيه: خير انتي وهي تكلمو وش فيكم!
جمايل مسكت يده بخوف: فيه كلب هنا
ناظرهم وهاج لثواني قبل ينفجر ضحك:وبس؟ حمدلله والشكر يعني مزارع وش متوقعين فيها؟ هذا اذا ماكان فيه ذياب بعد افا بس افا يا بنات خوالي هذا وانا اقول حفيدات مزون طالعات عليها ذيبات
اقبال : ابعد بس انت وبنات خوالك بلا في شكلكم وشكل الي بيجي هنا مره ثانيه!
تذكار وقفت وهي الى الان ماسكه العود بصمله ، دخلت اناملها بين الاوتار لكن شهقة البنات وهم يناظرونها وصوت الكلب الي إقترب وراها خلاها تبعد يدها بسرعه مما قطع الأوتار وراحت تركض بسرعه وهي ترفع عباتها
رسن بصراخ: تذكار يازفت وقفي لنا!!!
ركضت رسن وراها وتباهي كانت تركض وهي تبكي بينما جمايل متمسكه بإيد وهاج الي ركض قبلهم كلهم واشعار ركضت وهي ماسكه نص الاغراض بيدها
اشعار بصراخ: ياحيوانات باقي الاغراض من يجيبها!!!!
اقبال كانت اخر وحده وهي تركض وتطيح تركض وتطيح من الخوف لين جلست على الارض بصياح
انتبهت لها اشعار ورجعت لها بسرعه وهي توقفها وتسحبها معها: نعنبوتس يا الذليله قومي عجلي علي الكلب جا
اقبال بخوف وهي ترجف: مقدر مقدررر اوقف
اشعار طارت عيونها: وش الي ماقدر! وقفي خلصي
رجعت تذكار لهم وهي تسحب اقبال بيد واشعار تسحبها من اليد الثانيه وصارو يركضون بها وهي نصها على الارض وتصارخ
-
إنتهـى.
