هندة حطت الصفرة بقوة : اسمعي يا خنساء مية مرة فهمتك ع الالوان هذه اللي تلبسي فيهم في الحوش و كلمتك ع حدود علاقتك بقصي فياريت تلتزمي بالكلام لاني مش حابة نتصادم معاك مرة ثانية
الخنساء ظاهريا مش مهتمة و عادية : صحة
خذت الصفرة و بدت تغسل في الماعين
و هندة استفزها برودها : انت بتصرفاتك هادي ح تخليني ناخذ قرار بخصوص قعادك في حوشي راهو
: و بالك قاعدة في حوشك يا هنده
و اهني هي غمضت عيونها بخيبة امل ما حسبت هالحساب : اسمعني يا مبروك
المبروك قام ايده فوق : الموضوع هذا منتهي عندي خنساء هذا حوشها زيها زي فاتن و قصي و تلبس اللي تبيه و تاكل اللي تبيه و زي ما انت عاطية بنتك فاتن حريتها في اللبس و الطلوع حتى هي حرة رجاء ما نبي اي كلام في الموضوع هذا مرة ثانية و انا حذرتك ...
وجه نظراته لبنت خوه : و انت يا خنساء سيبي اللي في ايدك و تعالي
هي ما كانت حابة الامور توصل لهالنقطة لهذا تجنبت النظر لمرة عمها و طلعت وراء المبروك بسرعة و راسها تحت
مخلية وراها هندة بتنفجر من كلامه و من برود الخنساء و زيادة ان الكلام صار قدامها شدت المنشف اللي في ايدها و رماته بقوة و متأكدة ان الكلام اللي سمعه راجلها مش ح يمشي ع خير
اما الخنساء فكانت تمشي وراء عمها و هي متوترة مش حابة تسبب في اي مشاكل من اي نوع
قعمز عمها ع الصالون : قعمزي
قعمزت و ايديها ع بعض و منزلة راسها و تحاول تألف اي سيناريو ع شان تنهي المشكلة في ارضها
المبروك بجدية تامة : نسمع فيك
الخنساء قامت راسها و شافت لعمها و ابتسمت : ما في شي يا عمي بالله عليك ما في داعي تكبر القصة كل الموضوع اختلاف في وجهات النظر يعني ديداي مش عاجبها طريقة لبسي و في نظرها انها تحشم و خاصة لو جي حد فجاة زيارة ليها و انا لاني مش قادرة نلبس الالوان اللي نحبهم برا الحوش فنلبس فيهم اهني مع انها الحق ياما نبهتني بس انت تعرفني حاجة مش مقتنعة بيها مستحيل نديرها و بس
المبروك بشك : هذا بس
الخنساء بتاكيد : اي و بعدين بالله عليك خلي الجو يمشي مليح غدوا ماشيين لقماطه و مش حابة تكون في مشاكل بيناتنا من اي نوع
المبروك تنهد و ارتسمت ابتسامة هادية ع وجهه : ربي ما يجيب مشاكل ... اي قوليلي شني ناخذوا معانا
الخنساء جت جنب عمها و لفت ايدها ع ايده بحب : ما اتعب روحك بكل هونا قصي طلع بيجيب الناقص
المبروك : و ع شني وصيتيه؟
الخنساء باحراج : تبي الحق انا كل اللي يهمني في المشية هوا اشواط الطايرة اللي منلعبوهم بعد شوفة جدي طبعا كلا الباقي يعني الماكلة و الجو هذا عارفني اخر همي
