الشوق قتلني
خالفت كل الناس قعدت بروحي
شغلت نفسي لين فاضت روحي
غيابك صعيب لا والله ما نقدرها
العين ذبلت بالدمع درفت شوقها غالبها
راني الحياة من دونك مانكملها
...........................................
خلي في علمك بروحي ما اتخليني
حيلي انهد والقلب انصهد والعقل ما يبيني
ننجن نهبل انموت كان مشيت يا وتيني
#خنسائ
بقلم العزيزة .. حجر العقيق. ❤️
اطفاء الشوق هو اصعب من الشوق بمراحل
لانك تظل عند تلك النقطة غير مصدق انك التقيت بنصفك الاخر بعد ايام كانت و كأنها سنينا شهورها القهر و ايامها الحزن
اول ما استوعبت الورقة اللي قدامها و فهمت كلام كل من هنده و فاتن و شافت الفرحة في عيون جميلة و لبنى
خذت البطانية و غمت وجهها و رقدت
فاتن ضحكت : توا هذا شني يقولوله هي
جميلة: خليها واضح مصدومة بس
لبنى : توا عرفت انا بالضبط طالعة لمني عندي ردات فعل غريبة في اوقات اكثر غرابة
حولت البطانية شوي شوي من ع وجهها : حقا التحليل ما فيشي شك ولا غلط والا
ضحكوا عليها
و جت فاتن جنبها ع الصالون : تي نوضي خلينا نديروا خطة نفاجؤوا بيها راجلك يا ناري مروح من الموت و انت طحتي بين ايديه طول مريضة
هنده : اي حبيبتي هيا انشطي روحك و كلمت دكتورك ع فكرة و قالي هذا كله من الضغط و الكبت معش تديري هكي في اي مشكلة الحياة ياما فيها و مش عيب لو الواحد عبر عن حزنه او غضبه عادي راهو
خنساء قعمزت : ياريت نقدر حاولت و فشلت يا مرة عمي من شب ع شيء شاب عليه ! نحاول اكثر من مرة ننهار و نبكي و ع شان نرجع نتماسك لازم نلبس قناع البرود والا الوسطية في الانفعال هذه معدومة عندي تماما
لبنى : توا عندك الاذن تطيري من فرحتك
خنساء ابتسمت و تفكر و متوترة و اخر شي حطت ايديها ع وجهها و بدت تبكي
شدتهم هنده : خلوها
كله مع بعضه فرح بعد انتظار راحة بعد ضغط نفسي
قعدت مدة ربع ساعة هكي
و اخيرا هدت
فاتن حطت قدامها قفطان : البسي يالله وتي روحك توا جايينكم ناس تحت ع العشاء واول ما تكملي نهتموا بشعرك اللي مولي زي ليفة ديداي هلالية هاديكا
خنساء : خزي وانت تضحكي شني عرفك بيها ليفتها
لبنى : ضحكت و خلاص و بعدين شني شكلها شوقتوني
هنده هدت ضحك: هادي ليفة المونيوم و حاطة معاها يجي عشرة ثانيات متاع البصل و رابطتهم في بعض و ياويله واحد يقربهم تستعمل فيهم في المبطبخ الخارجي
