و مع نسمات ثاني يوم ربيعي بامتياز🌞
واول ما وصلت الخنساء للكلية و فتحت باب السيارة القت ذات البنت قدامها نفخت بضيق : انت مني مسلطك عليا ؟
ضحكت البنت : مش عارفة بس هوا باعثلك وحدة ثانية
فتحتها و اول ما قرت الكلام شكت في شيء
"أَراكَ عَصِيَّ الدَمعِ شيمَتُكَ الصَبرُ
أَما لِلهَوى نَهيٌ عَلَيكَ وَلا أَمرُ
بَلى أَنا مُشتاقٌ وَعِندِيَ لَوعَةٌ
وَلَكِنَّ مِثلي لايُذاعُ لَهُ سِرُّ
إِذا اللَيلُ أَضواني بَسَطتُ يَدَ الهَوى
وَأَذلَلتُ دَمعاً مِن خَلائِقِهِ الكِبرُ
تَكادُ تُضيءُ النارُ بَينَ جَوانِحي
إِذا هِيَ أَذكَتها الصَبابَةُ وَالفِكرُ
مُعَلِّلَتي بِالوَصلِ وَالمَوتُ دونَهُ
إِذا مِتَّ ظَمآناً فَلا نَزَلَ القَطرُ"
رفعت عيونها هيء اليها انها شافت حد بس استبعدت الكلام هذا و كملت قراءة المكتوب قدامها
من جهة ثانية هو خش للمكتب بعد راقب ردة فعلها و كان مرتاح و تعتلي وجهه ابتسامة بس سرعان ما اختفت وقت شاف اللي واقف في فم المكتب ..
عادل رمي السبسي و عفس عليه : شارق صاحبنا في مكان ثاني بس علاش الكذب المرة هادي الغزال يستاهل !
دار حركة بايده زي طلقة المسدس ... عرفت تختار
وجه يوسف جاب مية لون : شني تخرف انت ؟
عادل قعمز و حط رجل ع رجل : نحكي ع ام القولف اللي برا !!
يوسف قدم منه بسرعة و رمي الشنطة و طبس عليه : اقسم بالله يا عادل ندفنك لو تهوب ناحيتها
عادل : اوووو الباين خشيت لمناطق الحظر الدولي ! عمرك ما درتها ع شان حد يا خوي
يوسف نفضه من ايده : شني تبي ؟
عادل وقف و ساوى الكبوط متاعه : منقولك كلمتين سلاحي اللي خذيته و اعطيته ل#### يا يجيني كامل يا تحط حقه يا اما حط حقه دين فوق دينك الاول
يوسف باعصاب : اي دين تحكي عليه البنت هاديكا سيبتها من اول ما عرفت انك تبيها و يوم بوي بيخطبها ليك انا اللي شجعته يوافق انت اللي وخرت بروحك عن اي دين تحكي
عادل قدم و دفه : و علاش وخرت ؟! ماهو من وراك انت ! البنت قالتهالي في وجهي ما نبيكش و نبي واحد ثاني و اكيد يا خوي عارف مني يكون الثاني
يوسف وجعه خوه بس خلاص : باهي اعطيني حل شني ندير تسبيب و سيبتها و الله ما عاد نفكر فيها حتى لو انت خلاص معش تبيها انا خلاص بابها سكرته !! و بعدين انت تحاسب فيا ع شني ؟! ع اني طلعت بوي من مصيبة كبيرة وقت سلمت السلاح ! و الا ع اني قاعد ساكت بعد عملتك اللي درتها في اختك و خوك كبروا بيك و داروك عزوة و سند ! انت شني درت ؟ تعرف يا ريتك طلعتنا كذابين انا و يونس تمنيتك درتها و طلعت انت ع حق و احني اللي ظالمين بس شوفة عينك طلعنا ع حق زي العادة يا خوي والا ؟!
