واهني ردت برد عفوي كعادتها صدمه: تنطحك
فنص فيها
و هي استوعبت شني قالت و خافت يطلعها من الامتحان
وجهه تغير و يفنص فيها و بس
و هي ندمت اشد الندم ع كلمتها اللي قالتها في لحظة تهور
تم الامتحان و ع طول خنساء مشت بتكلم عايدة و تفهم منها اللي صار و انصدمت وقت عرفت انها كانت في بلادهم و تمت خطوبتها بالكلمة لولد عمها
خنساء مش مستوعبة اللي سمعاته : كيف قدرتي تديري هكي و يونس يا عايدة
عايدة عيونها دموع: يلقى اللي احسن مني يا خنساء انا ما نقدرش نرتبط بيه عمي هو اللي قالي هكي و اول ما يكمل السيمسترهذا يبينا نرجعوا للبلاد قال مممنوع تقعدوا بروحكم في طرابلس و امي خيرتني بين رضاها و بين اني نوافق عليه شني تبيني ندير
خنساء : تكلمتي معاه قلتيلي انا مش طول هكي توافقي و ترضي من قالك يونس يتخلى عنك حرام عليك يا بنتي حرام و الله انا حسيتها زي الجمرة في قلبي اماله هو كيف ؟!
عايدة مسحت دموعها : خليني بيني بينه ممكن يعني انا اللي انحل الموضوع لو سمحتي يا خنساء ما تدخليش بيناتنا
خنساء باحباط من طريقة كلام عايدة عمرهم ما كانو هكي مع بعض : انا مش ح نتدخل بس يا ريت تراجعي قرارك و تبي اي مساعدة كلنا حاضرين و نوقفوا معاك
عايدة بحزن : انا ما حد يقدر يساعدني غير ربي بس هو اللي عالم بحالي و بعدين في شي انت مش عارفاته ولد عمي هذا خلانا نشوفًوا عليوه قدرنا نزوروه بعد سنة و هو اللي طلب مني نوافق ع يحي ولد عمي و وقت قلتله ان في شخص ثاني متقدملي دار زي امي و قالي لو تبي رضاي وافقي ع يحي نكون متهني عليك خلاص وافقت و تمت انا ما عندي جهد للمشاكل يا خنساء
خنساء مش عارفة تلومها او تسكت : باهي يونس امتى تقوليله انا مش حابة يعيش غافل ضروري يعرف يا عايدة ردي بالك تخليه زي المستغفل ردي بالك
عايدة كانت تتكلم و الدموع في عيونها : اليوم بعد نروح نبعثله رسالة لاني مش حابة نتناقش معاه اهني و لا نوقف عليه نخاف توصل الدوة ليحي
خنساء مش مقتنعة بس معش تقدر تناقشها: ع راحتك انت ادرى بس نصيحة زيدي فكري يا عايدة كسر القلوب مش ساهل و لا ساهل انك تعيشي مع انسان مش حاباته و لا ساهل انك تفارقي شخص تحبيه
عايدة وجعتها روحها و واجعتها صاحبتها قربت منها و حضنتها بقوة و بهمس : سامحيني
و روحت
خنساء في مكانها تشوفلها و حاسة بضيقة غير عادية مش قادرة تتجاوزها شني اللي صار و انقلب كل شيء فجاة
مش لاقية تفسير
وقف جنبها بالضبط : خيرها يا خنساء جت بسرعة و روحت بسرعة
غمضت عيونها و مش قادرة تواجهه : صاير معاها ظرف و وعدتني تكلمك اليوم و تحكيلك كل شي اكثر من هكي سامحني يا يونس مش ح نقدر نقول شي
