بعد دخول يوسف لمكتبه هو و زميله حمدي القي في وجهه الجابري
يوسف بهمس : معش تحز !!
الجابري عرف ان همس بشيء ما : حمدي ترا برا شوف الدكتور يحي جي او لا ؟!
حمدي وصلتله المعلومة بأن وجب عليه الخروج و يخليهم يتكلموا براحتهم
طلع من فم ساكت
اما يوسف حط الشنطة و قعمز يستنى في القنبلة اللي ح يحطها المرة هذه
الجابري : انت قلتلي تقدر تعطي اي مادة و بالتالي تقدر تتعامل مع اي طلبة مهما اختلفت اطباعهم و اعمارهم
يوسف مش حاط الموقف في باله حاليا ان يكون سبب زيارة الجابري ليه : اكيد
الجابري وقف : معناها كيف من اول يوم تتصرف بطريقة غير لائقة مع طالبة عندك
هرب عليه الضي و قال في نفسه مصرع جت و خبرت : احم انا اللي مفروض نتصرف معاها بشكل صارم لانها طلعت من المحاضرة بدون اذن و مش فاهم لعند الان السبب توقعت صاير معاها شيء خاص لهذا ما تكلمت
الجابري : وانت كيف عرفت ع مني نتكلم
يوسف بثبات : ببساطة لان طالبة وحدة عندي طلعت بدون استئذان و الباقي ما صار شي !
الجابري : بس هي حكت شي ثاني و قالت انك سالت وين واصلين في المنهج و جاوباتك لكن انت تعمدت تتجاهلها و سالت باقي الطلبة و طبيعي تصرفها حسب كلامها قالت واضح ان مش معتبرني طالبة عنده لهذا طلعت
يوسف بذكاء : معقولة ؟! انا ما سمعتها تكلمت و وقت ما القيت استجابة من اي طالب كررت سوالي عادي
الجابري كان متاكد ان يلف و يدور و ان كلام خنساء صح لان الادرى بيها وقف : تمام طالما الموضوع طلع هكي ! موفق يا استاذ
و طلع من المكتب
اما يوسف ضرب الطاولة برجله : ح اندمك يا خنساء
دخل حمدي : تي شني في وانت خاش في جو الاكشن من اول يوم خيرك
يوسف بتذمر واضح : بالله فوتني ناقصني ماهو عاهات انا مش سادني الهم هذا طلعتلي خنساء هانم
حمدي قرب منه : ان شاء الله تعاركت معاها
يوسف : انا ؟! مستحيل تي هي مني تكون ع شان نتعارك معاها ؟!
حمدي : لا تو تتعرف عليها مزبوط و تفهم من تكون بس نصيحة ما تحطهاش في راسك ع شان هي ما تحطك في راسها
يوسف بهزوة : يا ستير ! حسني خفت ... هيا انا اليوم سادني منروح
حمدي : الايام بينا ! اي و منقولك يا راجل حط حد لمتيماتك دايرات طريق من بكري ع المكتب !! ما صدقوا عرفوا انك بديت تداوم يومي من بعد ما كنت متفرغ للماستر
