بعد وصول اهلها
كانت و كأنها بعيدة عنهم سنين القلب بمجرد معرفته بجيتهم طار و رفرف و لاقاهم بحب كبير و ود اكبر
تشوف فيهم وحدة وحدة
جداها عافية اللي ليها دور تعجز عن وصفه بكلمات
جميلة شقيقة روحها و شقيقة معاناة سنين طويلة و حرمان
فاتن و ربيعة و سميرة و هند و رويدة اخوات اعطتهملها الدنيا من الطفولة لعند اللحظة هذه شاركتهم و شاركوها اهم مراحل حياتها
صالحة ياما طبطبت عليها هي و جميلة و ياما وقفت جنبها وقت يقسوا عليها زوجات اعمامها
قمرة رغم قصر المدة اللي عرفتها فيها بس كانت بمثابة الجدة حنونة و قريبة ع القلب
نجمة زوجة خالها شافت فيها صورة مغايرة عن زوجات اعمامها
بناتها رغم انهم مش موجودات بس مش ح تنسى كيف تقبلوها بحب بينهم
ابرار اللي بدمها الخفيف كانت ديما تغير في جوها
و منيرة صورة امها ع الارض نسخة منها و الخالة يعني ام و هذا كلام سيد الخلق عليه الصلاة و السلام
و اية اللي كانت يوما ما حلقة وصل بينها و بين حبها الكبير اللي اليوم صار زوجها
و اخيرا و ليس اخرا ايمان اللي تعني اكثر من شي واحد الدعم في العمل و في الحياة زوجة اقرب الناس ليها خالها اللي كان نصها الثاني ان صح التعبير طبيعي تحس ناحيتها بمشاعر مختلفة
ايمان اللي تذكر فيها بشخص اعطاها الكثير و مازال تحس في روحها مديونة ليه و متمنية تلقى الطريقة اللي ترد بيها دينه
و هنده اللي مؤخرا كانت شخص عقلاني حكيم قريب في المنطق و حكمة التصرف و القوة منها عاشت سنينها الاخيرة معاها في وفاق تام
بس كيكة هذا كله هو ايوب فرحتها
وقفت و فتحت ايديها و هو تخطى الجميع و يجري و يقول نوسا نوسا
كلهم تأثروا بموقفه معاها و هي قاماته فوق و بدت تلف بيه : اوبي حبيبي قلبي عيوني استاحشتك انت هلبة هلبة هلبة
ايوب يبوس عليها : وانا هلبة و الله
منى جنبها : حيه عليك من يوسف
هو بعفوية : مش حلو بكل اخيه
فنصت فيه الخنساء : لا عيب هذا عمو يوسف حبيبي حتى انا
ايوب : انلا انا بس حبيبك
ضحكت ع كلامه و بعدها بدت وصلة سلام الشجن و الحب و الشوق بينها وبين الكل و خاصة عافية و جميلة
عافية جت وقعمزت في جنبها و ما بتش تنوض بكل
خنساء : خيرها ديداي هلالية بترقد
عافية تواسي في تستمالها: خليها تستاهل غسلت البساطات كلهم هي و فاتن و في الاخير القيتها تقوللها ارتاحي سلم كنينتي و تكد بروحها
خنساء متفاجاة : حرام عليك والله ما عندها جهد
عافية فنصت فيها : عندها جهد غير ع اللوي ع المنظومة ترا فكيني منها و قوليلي شنو حالك متريحة و الا كيف طمنيني سلم بنتي
