حاليا وصلوا للبيضاء للفندق المخصص لاقامتهم
بس هو ما قدرش يتحرك من مكانه ينتظر في وصولها لان عارف انها ح تجي عن طريق الطيارة ...
يونس : هيا معاي فوق البنت جاية مع اهلها فكنا يا يوسف من المشاكل
يوسف باصرار : وانا مش ح نكلمها مجرد نطمن عنها بس
يونس ما قدرش يسببه و قعمز
يوسف : علاش قعمزت برا يا راجل مش عيل انا !!
يونس : عارف بس من حقي نطمن لهذا خليني هكي مرتاح
يوسف سكت و ع اعصابه ينتظر وصولها !!
ع اصوات الضحك انتبه
و فعلا هي وصلت ... بس وصلت و تفاجا باللي يمشي جنبها و جنب ولد عمها و يهدرز و يضحك
كان صفوان يمشي في جنب هنده و يهدرز معاها و يضحك : و الله ماني مصدق قصدك توا امي نقوللها ان الدكتورة هنده تلاقيت معاها و طلعت قريبة طالبة عندي قداش بتفرح انقطعت اخباركم عنا من ايام تلاقينا في تركيا
هنده : اي امك صديقة قديمة و كانت بنت جيران اهلي دنيا يا ولدي تفرق
خنساء تهدرز مع قصي و يضحكوا
قصي بهمس: مش عارف امي وين تلقى فيهم
خنساء بذات الصوت المنخفض : واخيرا القيت حد عنده ذات الانطباع زيي مش تحسه طايح من وحدة من القنوات
قصي : و الله جبتيها من الاخير حق وانا من بكري نقول وين شايفه
خنساء ضحكت بس تلاشت الضحكة وقت شافت يونس و يوسف
قصي لاحظها : خيرك؟ ان شاء الله ع خاطر هذا !!
خنساء بعفوية شداته من ايده : بالله عليك فكنا منهم و بعدين جايين للمؤتمر زيي و ما تنساش اني الورقة منقدمها مع يونس
يوسف "يا ربي صبرني ما نبي ندير جريمة "
و يونس ملاحظه كيف ضابط اعصابه
اما قصي و لان علاقته كويسة بيونس سكت : ح نمشيها بس لو تعرضلك يشوف
خنساء تنهدت براحة : تم
ضحك قصي و كملوا طريقهم
صفوان وقت وصل فيهم : السلام عليكم وصلتوا قبلنا
يوسف بحركة من حواجبه و بثقة كبيرة : ديما قبلك
صفوان ابتسم ع جنب : ممكن قبل لكن في الجديد ما حد يعرف
