(نزلت بكري عندي عرس ❤️)
حمد يتردد : الحق يعني انتم عارفين كيف انعزكم انتم الاثنين بالذات
طارق و الخنساء الاثنين يشوفوا لبعض باستفهام و يرجعوا بنظراتهم عليه يستنوا يفهموا منه بشكل اوضح مقصوده من الكلام !
في اللحظة هذه فاتن ما قدرتش تمنع رغبتها من معرفة ما يدور خلف الجدران بين بنت عمها و طارق بالذات و جدها مشت بحذر جهة دار الضيوف و وقفت وراء الباب و هي كاتمة انفاسها المتسابقة مع فضولها الكبير
طارق : جدي انت من بكري تقول في كلام مش مفهوم خش في الموضوع طول
حمد شبك ايديه في بعض : و هذا اللي بيصير ... انا نبي نطمن ع خنساء و زي ما نشوف فيكم ديما قريبين من بعضكم و متفاهمين ... علشان هكي فكرت نعرض عليكم يعني
الخنساء شبه فهمت و بتتكلم
بس حمد وقفها : خليني نكمل نبيك يا طارق و انت يا خنساء لو ما عندكمش مانع يعني نعرسلكم في الصيف
فاتن قلبها بدي في عزف الحان حزينة ع اوتار الندم و الصدمة
خنساء ضحكت : هههههه جدي تتكلم جديات و الا تبصر ؟!
حمد فنص فيها : توا وقت تسهويك ؟! طبعا نتكلم جديات !
اما طارق فكان ساكت لكن ارتاح وقت شاف ردة فعلها لان ما كان حاب يجي الرفض من جهته هو بس : ماهو يا جدي اللي تفكر فيه مستحيل لا انا و لا خنساء نفكروا فيه حتى بالكذب طول عمرنا علاقتنا ببعض زي الخوت ما في شي غير هكي
حمد باعتراض : لالا ما في منه هالكلام بكل لان انتم مش خوت و الشيء هذا لازم تفهموه و بعدين انا يا بنتي نبي نطمن عليك ... خوذوا وقت و فكروا قبل ما تقرروا
بيتكلم طارق بس
خنساء قطاعاته : خلاص تو نفكروا و لا يهمك جدي
حمد فرح
و طارق انصدم
و الصدمة الاكبر كانت من نصيب فاتن اللي مشت بخطوات سريعة للدار اللي راقدة فيها هي وامها و تمسح في دموعها بكل غضب و كبرياء و تتوعد لطارق و لخنساء بانتقام من نوع اخر
بينما عند المذكورين سابقا
حمد وقف : الله يريح بالكم زي ما ريحتوا بالي و ان شاء الله نرتاح اكثر وقت نقرا فاتحتكم
خنساء بابتسامة : ان شاء الله يا جدي بوجودك
طلع حمد و مشي لداره
بينما خنساء طلعت وراه و كانت ماشية لدارها بس طارق شدها من ايدها و مشي بيها للمطبخ و هو مش اقل غضبا من فاتن
و ما ان وصلوا للمطبخ حتى رخي ايدها : خيرك انت هبلتي شني الكلام اللي قلتيه لجدي
خنساء بهدوء : اهدى بس و افهمني انت شفت بعيونك جدي كيف مسكر راسه و لو قعدنا من اهني لعند العام الجاي نقولوا ان احني زي الخوت لا ح يفهم و لا ح يقتنع ... لهذا انا فكرت اني نسايروه و نقولوا بنفكروا في الموضوع لعند نلقوا سبب مقنع للرفض و في نفس الوقت وقت يلقانا فكرنا و ردينا مش ح يضغط علينا لان احني قلنا بنفكروا يعني خذينا وقتنا خلاص ...
