(اعتذر عن التأخير... هذا وين كملت مراجعتها الحلقة طويلة )
فاتوا بقية ايام الاسبوع لعند يوم الجمعة في هدوء و كل يوم الخنساء تمشي لمريم تخفف عنها و تصبر فيها و تستقبل معاها في المعزيين لان في اللي من اهل البلاد ما لحقوها لاجدابيا
و يوسف قضي باقي ايامه بين حوش جده واخته منى و كان مصمم يكمل حتى الاسبوع اللي بعده في ودان لعند يوم الثلاثاء
و يوم الجمعة العشية روحت الخنساء مع حوش خالها اللي حطوها طول في حوش عمها و انشغلت طول بالامتحانات
من جهة ثانية ..رن جرس باب الحوش الداخلي فتح يونس و انصدم باللي واقفة قدامه : انت شني اللي جابك ؟
هي شافتله من فوق لتحت : نبي نشوف خولة و بعدين علاش تستقبلوا في ضيوفكم بالطريقة هادي
يونس عصب من جيتها و من اسلوبها بس كحة بوه خلاته يضطر يدخلها : تفضلي
خشت تمشي بغرور و انتصار عليه
لمحها عمران من بعيد ع طول هرب للمطبخ
و يونس : يما يما
عمران القي محبوبة قدامه في المطبخ: اطلعي مش عارف مني اللي خاشة هادة ع الحوش في وقت زي هذا
محبوبة نفسها مستغربة و طلعت تشوف مني اللي يحكي عليها عمران: هيا هيا
القتها قدامها سلمت عليها و هي مش فاهمة هذه شكون : اهلين بنتي تفضلي
جيهان بابتسامة عريضة : اهلين بيك خويلة كيف حالك
محبوبة. : الحمدلله تفضلي
دخلتها لصالون الاستقبال وقعمزت قريب منها : سامحيني يا بنتي و الله ما عرفتك
جيهان حولت الوشاح و نزل شعرها بطريقة حلوة : احم انا جيهان نخدم مع يوسف و جاية نبي نشوف خولة تعرفت عليها يومها في الكلية و قداش ليا نبي نجيها هذا وين سخر ربي
محبوبة تلخبطت يعني صاحبة يوسف او خولة و جي في بالها كلام ولدها و تحساب هي هذه اللي حكي عليها لكن كيف قال رداته و هي جاية لحوشه و بعدين يا ودي هي صح حلوة و كشكل عجبتها لكن ما خشت خاطرها : انستينا يا بنتي هيا نخليك دقيقة و نمشي انادي عليها و نجي
جيهان حطت رجل ع رجل : خوذي راحتك
طلعت محبوبة ماشية لبنتها لاقاها عمران واقف في باب المطبخ ناداها بحركة من ايده و يونس مازال واقف جنبه و خايف لو كان امه تقول انها جاية عن طريق يوسف : تعالي اهني
مشتله : نعم يا حاج
عمران : منو هذه ؟
محبوبة متوترة ما تحب تكذب لكن قررت تخفي امر انها تخدم مع يوسف : هذه هذه صاحبة خولة و جاية تسأل عليها بعد سمعت بالحادث
