كان موقف مخجل للغاية : سامحنا يا عادل الفرخة هذه لا تعقل و لا تكبر و بيني و بينك حتى خوي احرف منها
عادل انصدم : قصدك حق هذا بوها
ضحك : للاسف هي تكون بنت خوي و بنت عم صاحبك الدوشكا امها توفت و هي تقرا في صف سادس و بوها تزوج بعدها ع طول ممكن شهر و جاب مرته هذه و لانها كانت صعبة معاها و تضرب فيها وهي صغيرة وقت كبرت البنت جتها زي الحالة ع خوتها من بوها طول الوقت يا تلوح في العابهم يا تضرب فيهم المهم ديما زي توا هي وبوها و مرته
عادل حط ايده ع راسه : ماشي نتلاقو معناها سمعة
اسماعيل : ان شاء الله و سامحنا مرة ثانية
حياه بايده و طلع
و رجع حط ايده ع راسه
كان مكانها متورم ابتسم ع شكلها وقت جت صورتها في باله و بعدها طلع
و اسماعيل ع طول مشالهم يهزب : لامتى العار هذا قدام الناس عاجبكم هكي
خوه ابراهيم : بالله عدي من قدام وجهي و خوذ البلوة هذه معاك بالك تستفيد منها هونها مسكرة الدار بالمفتاح
نزل و ما ردش عليه
ردت عليه من داخل : قاعدة ع قلوبكم
ابراهيم : يا بنت الكلب
ردت : عارفة !!
و يمشيلها من جديد يقربع في الباب
بس تفاجا بمرته مبدلة لصغارها و جايبة شنطة في ايدها : هيا حطني عند اماليا
: يا ودي استهدي بالله مشكلة صغيرة و محلولة توا نشريله لعب جديد الولد و تمت
هي بتعنث : و الله العظيم ما عاد قاعدة فيها يا توا تجي توصلني يا اما نمشي نتصل بخوتي يجوني
هو بتافف : عليك ايام سود و خلاص و انت يا فرخة غير نجي بس
طلع هو وياهم
و وقت سمعت الباب انفتح و تسكر
دارت هجوم ع المطبخ و خذت كل ما تحتاجه من اكل و شرب و رجعت سكرت ع روحها في الدار ...
هكي الواحد يرتاح توا .... مريقنة الدوة ... خلي نحط ع مباراة و نتفرج خير من الكساد
حطت ع مباراة و قعمزت تتفرج و منسجمة اخر انسجام و تضحك كل ما تتذكر منظرها و هي طالعة تجري برا قدام عادل ...
___________________
خالد حط قدامه الشاهي و صبله طاسة : تقضل
خذاها منه و سرحان و هي في ايده
كان عارف سبب حالته صب طاسة لنفسه و بدي يشرب : اي كيف الوضع
يوسف : زي ما تشوف فيا قدامك ! توا انت مش خالها و المفروض ما ندوي قدامك بس المشكلة اني لحد ثاني ما نقدر ندوي لاني نغار فكيف الحل
خالد :قول اللي بتقوله جت ع هذه يعني
يوسف قام حواجبه و غمض عيونه و حرك راسه يمين و يسار لنفض كل ما خطر في باله من افكار سلبية : بنت اختك تعبتني و تعبتها يا خالد و مش عارف نهاية الامر هذا شنو ! يعني المفروض يكون في مساحة بيناتنا للخطا انا نقبل منها و هي تتقبل مني الخطا بس اللي صاير عكس اللي مفروض يصير هي في اول خطا تبي تمشي و تسيبني و انا قاعد ما فرحتش بيها هنا يومين اللي فرحت فيهم و بعدها كل شي هكي خش في بعضه و الا مش عارف
