"لو رأيتني كيف احكي للغريب عنك
لتمنيت ان تكون غريبا
لتحب نفسك من حديثي ... يوسف و بياض الثلج "
بقلم كلمة الحق ....
مر الوقت بردا و سلاما ع الجميع
و بداية اسبوع .. بداية احداث
بداية حصيلة تعب و اجتهاد
الا وهي الامتحانات ....
بداية الامتحانات في كلية القانون
جهزوا الاثنين انفسهم و فطروا و طلعوا للكلية
في السيارة
يوسف بدي يعطي فيها في قايمة الممنوعات : ممنوع توقفي هلبة خنساء راهو والله العظيم ما ننحشم من واحد نجيك في وسطهم و نطلعك اوكي عملك و متفهم انك المسؤولة عن الدراسة والامتحانات لكن في حدود المعقول عاد
: والله فهمت يا يوسف من البارح وانت تقول في نفس الكلام و لازم تفهم هذا ولدي راهو بنخاف عليه اكثر منك
يوسف : فاهم انك خايفة عليه اكثر مني بس انا خايف عليه و ع امه يعني خوفي اكبر لانك للاسف مش مفكرة في روحك بكل و الاجهاد اللي باين ع وجهك من التركيز في شاشة اللاب
هي حبت تقلب عليه الطاولة : ماهو انت كنت مشفرني والا كنت ساعدتني
يوسف : واااك ترد لنفس الموضوع و يا ستي للمرة المليون اسفين
خنساء غيرت الموضوع : اي انت عندك الفترة الاولى مراقبة
ضحك: المفروض حطيتيني الفترتين لانك قاعدة للفترة الثانية يعني قاعد معاك حتى انا وين بنمشي
كانت تدور في الاوراق اللي في الشنطة : لا عادي كان بتطلع واول ما نكمل نتصل بيك
: شنو حالك باهي رجلي ع رجلك يا حبي .. خيرك ع شنو تدوري
خنساء : واخيرا خلاص القيته ...
يوسف مركز في الطريق : تي شنو هو ؟
خنساء طلعت الملخص متاع البحث : شوف هذا الملخص متاع البحث متاعنا عدلته و بعثت نسخة البارح اخيرة يعني للجنة المؤتمر قالوا تمام و بما ان حبيبي فاضي و بيستناني لعند نكمل يبقى ابدا حضر البوربوينت لان انا عندي بحث المرحوم يبي خدمة حتى هو و معش فضيت بكل
يوسف خذاه منها و حطه قدامه : شاطرة يعني في توزيع المهام و استغلال الوقت
غمزتله : نعجبوك يا غالي
ضحك : المهم راك تنسي الوصايا متاعي
بنفاذ صبر : حفظتهم والله
درس في موقف السيارات : هيا
فتحت الباب و نزلت و يمشوا و يهدرزوا
كانوا زي عادتهم ملفتين هلبة
مرت من جنب لبنى: صباح الورد
لبنى عاد تتحشم من يوسف توا : صباح الخير
