(سامحوني ع التاخير )
كان الحوش بكل اثاثه فوق من البساطة
لكن كمية الراحة النفسية اول ما خشتله
ذكرتها بمكان واحد يشبهله هكي حست فيه
و هو الداموس ... الفرق ان الداموس وقت مشتله كان ناقص وجوده
يوسف لف ايديه الاثنين عليها من الخلف و طبع قبلة حنونة ع خدها: ان شاء الله عجبك المكان
خنساء : عجبني؟ قول خذالي عقلي مرة وحدة
يوسف لفها ليه: ما حد ياخذ عقلك غيري ممنوع فاهمة والا
خنساء بصوت هادي: فاهمة
يوسف ضربها بخفة ع انفها : لا الولد الصغير اللي اسمه ايوب و لا خالد و لا حتى جدك العماري والا عمك المبروك اللي يوصف في قهوتك وانا قلبي شاطت ناره
خنساء ضحكت كيف يسمي فيهم: يعني توا بتغار حتى من عمي لا هكي هبال رسمي
هو لف ايده عليها و خذاها في جولة في الحوش و هو يهدرز : هو غرت و حبيت يعني غرت عليك منهم كيف فرحتي بيهم و ماشاء الله واخذة راحتك احضان و بوسات و حبيبي معاها
ضحكت
يوسف ضغط ع كتفها ع شأن تسكت و يكمل هو: بس في نفس الوقت حبيتك معاهم هلبة شفتك كيف تتعاملي معاهم كبنتهم و كصاحبة و اخت زي مع خالد و اولاد اختك مع ان الياس شفتيه كيف ينابش
ابتسمت لان فاهمة تماما من اللي وراء هذا
كمل و هو يتنهد : و حبيتك مع الولد الصغير شفت فيك الام و ان شاء الله نشوفك ام لصغاري
خنساء : قداش كلامك حلو و مريح
يوسف : لانك انت مريحة و طبيعي الراحة نحس بيها معاك ..
خنساء : و المكان مريح و يهبل زي ما تمنيت بالضبط
يوسف : مازال تشوفيه في الليل حاجة مش عادية
خنساء : ان شاء الله
يوسف : يعني مش ح تخافي
خنساء ضماته بحب : وانت معاي اكيد مش ح نخاف
يوسف : باهي توا حبيبك تعبان من السفر خلي نرتاحوا و بعدين ليك مني احلى عشي و احلى سهرة وفيها بيتم الحساب المؤجل ع فكرة
هي بنفس النبرة : اصلا انا بروحي عندي حساب
يوسف ضحك عليها كيف تفنص خذاها من ايدها و مشوا ع شان يرتاحوا من مشقة السفر
