صباحي غير اليوم و انت دبلتك في ايدي
صباحي غير اليوم و عقدك قرب وريدي
يسمع صوت نبضة
ومع كل نبضة في قصة
قصة حبنا و فرحنا .. قصة سعدنا و هنانا
صباحي غير بيك و ليك يا قسمي و ريدي
نتمناك تعيش معاي طول العمر المديدي
و لو ينشدوني تبي تعيشي عمرك معاه ؟
نقول يا ريت لا بل نقول هل من مزيدي !
صباحي غير اليوم و انت دبلتك في ايدي
(كلماتي )
كانت تمشي في صبعها ع نقوش الحنة و ع الدبلة
شافت تيليفونها و للاسف ليلة البارح ما حظت باي فرصة ع شان تكلمه
لان العيلة ملتمة عندهم
بالنسبة للعماري و عيلته روحوا مع يعقوب لطرابلس و طلعوا وراء اهل يوسف و تونسوا ببعض
اما بنات عمها و جميلة فباتوا معاها و كذلك هبة
فاتن من الصبح بكري استغلت ان الكل راقد و هربت ع شان تشوف طارق في نفس المكان حوش عمها رمضان رحمة الله عليه
وصلت داهشة
القاته واقف: صباح الفل ع غاليتي
ابتسمت : صباحك ورد و ياسمين ولد عمي
طارق : اااه ولد عمك فات فيه خلاص هيا سقديلنا روحك
فاتن فنصت فيه : طارق فكني من الكلام هذا و خلينا في المهم قولي وين وصلت في الحوش
ضحك بصوت عالي : ههههههه ماهو هذا موضوعي انا
فاتن باحراج : خيرنا عاد !!
طارق باعتذار : خلاص والله نسكت احم خلاص الزواق شبه كمل قعد الاثاث و كسوتك و ذهيباتك يا حلوة
فاتن شافت وراها و تاكدت ما في حد: و انا يا ودي ذهب ما نحبه بكل راهو اهم شي الحوش لو الذهب ما لا...
قاطعها طارق : اسمعي خلي جونا حلو و فكينا من المشاكل انت ما ليك علاقة بشي تمي قرايتك فيسع و خلي الباقي عليا
فاتن : يا ودي باهي هيا خلاص انا بنمشي قبل يستاقضوا بيا حتى خنساء اللي قبل تغطي عليا راقدة
طارق اهني تذكر شي : لاحظت انها تتهرب منا
فاتن : توقع راهو اكيد خطيبها بيحط خطوط حمراء زيك يا فالح
طارق بتفهم: وانا من قالك ضده صح يعز عليا ان معش نهدرزوا زي قبل و لا نلعبوا كورة لكن عنده حق الراجل
فاتن تنهدت : معناها فهم قصي نحس فيه مش متقبل الموضوع بكل
طارق بضيق : و حتى قصي بيني و بينك معذور عاد عاش معاها عمر اكثر واحد فينا قريب منها صعب فجاة معش يكلمها و لا يتعاطى معاها بس حاضر توا نكلمه
فاتن : ربي يخليك ليا ديما تحل في المشاكل النجمات ع اكتافك مش من فراغ
طارق ابتسم : باهي بري من قدام وجهي يا فرخة وانت لسانك بيودرني
