(نعتذر عن التاخير .... و قصر الحلقة بس اللي صار اني عادة نكتب في الوتباذ و كتبت بداية الحلقة هذه بعد نزلت الحلقة خمسة و خمسين بس اللي صار ان الوتباذ عندي استك و حذف الحلقتين غير جاب ربي منزلتها ع الفيس الخمسة و خمسين و الا كنت نعاود في الحلقة اللي فاتت من البداية ... و لهذا نزلت متاخر و مضطرة انزلها بدون مراجعة و ليلتكم سعيدة ❤️)
بصريح العبارة قاللهم ع اتفاقه معاها ...: و هذا اللي صار انا البنت هذه عادها بنتي زي زمزم و زي بناتك يا محبوبة و الحق ما رضيتها تمشي مع اعمامها او خوالها و ماليهم شهر معرسين عيب في حقنا و في حقهم
و محبوبة كانت ردة فعلها ان تقول الاتي : يا حاج انا معاك و البنت نشهد بالله ما في منها بس الحق يعز عليا نعدي من اهني و نخلي عدوله ما صدقت روح
عادل ابتسم لامه : لا بري معاهم يما وانا نجيك كل ما نحصل فضوى
عمران : لا انت عاد نبيك تشد مكاني المحل كنا في دوامة قبل لا تجي و منو اللي بيقعد مكاني سبحان الله جيت انت انحل الموضوع بروحه
عادل فرحان بثقة بوه هلبة بس يبي امه تمشي مع بوه : عادي انا نقعد في المحل ... بس انت يا امي امشي توا و بعدها يصير خير و عهد عليا اهو سيف يفضي روحه يومين و نمشيلك عادي
محبوبة مش راضية تفارق ابنها اللي قعدت قداش تستنى فيه
تدخلت وردة : هي امتى بيظهروها من المستشفى ؟
عمران : قالوا يومين اخرات
وردة : خلاص اهو عندك يومين اشبعي فيهن منه
محبوبة رضت مرغمة
جي عادل جنبها و ضمها ليه بقوة : و الله ماني مصدق اني جنبك
عمران بدي يكح : احم احم ... وين مشت بنتك خليها تدريلنا طاسة شاهي
محبوبة : اكيد مع راجلها مش برا هو !
عمران : اي روح معانا خلاص سادهم كلمني فضل قال مستاحش الولد حتى هما يفوتوا معانا
وردة : و الله لعند البارح نكلم فيها و فيه
عمران : لا اهو ماشيله توا نتفاهم معاه
عادل بتردد : خلي نمشي معاك يا بوي
عمران ابتسم : بتصفي حسابك
عادل باحراج : يا ريت
وردة : ما تقول هكي قول بتصفي القلوب مش الحساب
عادل : ان شاء الله يا جداي .. ادعيلي
وردة : الله معاك
ابتسم و طلع
موقفه حاليا جدا صعب مواجهة ح تكون مش ساهلة بالنسبة ليه
في جنان الحوش كانت ضامة ولدها في حضنها و واقفة قدامه و جنبهم سيف و يهدرزوا في اللي صار في المصحة
