من عادتها كل ما عمها يعطيها من مرتب المرحوم بوها تحول مبلغ ع جنب و تشري بيه حاجة ذهب تدسها مع انها ما تحب الذهب ابدا لكن يعني تشري في حاجات بسيطة احيانا خراصات متاع مواليد و احيانا سلاسل حاجات من النوع هذا القت في الصندوق حديدة اسم و خراصات و قررت تبيعهم ع شان الورقة متاعها تقدمها بالطريقة المثالية تنهدت و حطتهم في شنطتها و خذت البالطو الجلد ذو اللون البني لبساته و معاه وشاح لونه ازرق فاتح و طلعت تدور ع قصي : عمي وين قصي ؟!
المبروك كان مقعمز يتفرج ع التيليفيزيون : في داره ... علاش تبي شي ؟
هي ارتبكت : اي عندي شوي حاجات ناقصيني قبل موعد الورشة اللي بيديروها في الكلية و نبيه يوصلني ناخذهم
المبروك : شوفيه و لو مش فاضي توا نوصلك انا
طبعا هي مش حابة تمشي مع عمها لان ع الاغلب ح يخش معاها : تمام
و ركبت فوق جهة دار قصي تلاقت مع هنده كيف طالعة من عند فاتن : خيرك تجري ؟!
خنساء : شي عادي يعني .. اي كيف حالها فاتن ؟
هنده بجفاف : احسن ... راك تخشيلها كيف رقدت
خنساء : لا مش ح نمشيلها خليها ترتاح
نزلت هنده
و هي طقت ع دار قصي
شوية وفتح و واضح جاهز بيطلع : اووو كبيرة الدوة كوباكانا جاية لعندي
خنساء : من غير كثرة كلام نبيك توصلني ناخذ شوية حاجات ع السريع ...
قصي شاف الساعة : شوفي عندي مقابلة عمل في شركة متاع اتصالات و انترنت بعد نص ساعة يعني ح نضطر نحطك و نمشي لموعدي او تمشي معاي ندير مقابلتي و بعدين نوصلك
هي جت لعندها واتية : مليح بكل حطني و بعدين تعالى
قصي بتهديد : ردي بالك تقولي قدام بوي اني درتها تعرفيه يحط الحق عليا
خنساء : تي غير هيا من امتى دفيت فيك يبرا انا
قصي : عارف ... هيا نجيب تيليفوني و نجي
خذي تيليفونه و مفتاح سيارته و نزل وراها
وصلوا تحت
المبروك : شني وافق
خنساء : اي اصلا عنده طلعة القيته موتي روحه
المبروك : باهي طريقكم زينة
تدخلت هنده : وين ؟!
المبروك : توكلوا
طلعوا مع بعض و هنده مش عاجبها : يا راجل انت ما تفهم راهو حتى في الشرع حرام كيف تمشي معاه بروحها !!
المبروك بدون ما يشبحلها : عارف لكن ما عندي حل البنت نبعثها في تاكسي يعني .. و بعدين انا القيت حل للموضوع هذا
