(تلبية لطلباتكم جميعا نزلت تشويق حلقة صعب جدا .... سامحوني اذا قصرت 🌹🌹🌹)
دخلت بكل ثقة للمحل و وقفت قدامه
و هو اصلا ما عرفها مستغرب كيف ع طول حطت عينها في عينه بدون ما تدور ع اي شي في المحل
: كيف نقدر نساعدك
: تسمعني نقول اللي عندي
ما كان فاهم ع شني تتكلم و الا علاش جاية لعنده هو بالذات : ع شنو بتتكلمي
طلعت من شنطتها ورق حنة و سبسي ...
ما فهم شي
هي كملت : وقت تكون يتيم و خاصة اليتم من عمر صغير تبي اي شي اي شي يذكرك باهلك .. صورة صوت رايحة ملابس اي شي .. انا اخر مرة و اخر ذكرى بيني و بين بوي و امي الله يرحمهم في الحاجتين اللي قدامك حنة و دخان .. الحنة حنة امي كانت في ايدها وقت سلمت عليا صنتها قعدت في دماغي عششت معش قدرت ننساها وقت تنجاب سيرة امي نغمض عيوني ما نشوفه صورتها مع ان عندنا ليها صور هلبة بس ما يطلعوا في دماغي لكن الحنة تردني لليوم اللي فارقوني فيه و مشو
و نفس الشي الدخان يوم اللي تسقدوا كان وقتها بوي يدخن و طبس سلم عليا صنة الدخان يعني بوي عندي ... كبرت و معش قدرت نشمها ع عم و لا ولد عم كيف ندير قعدت ناخذ في السبسي من اي حد منهم و نولعه و نحطه ع رشادة او طفاية و نشمه و نقعد نسترجع في هذاك اليوم اللي عدا فيه بوي و امي و معش ولوا !! مش ح نقدر نقولك اكثر الا حاجة وحدة
طلعت المصحف من شنطتها و حطت ايدها : و الله العظيم ما في حياته حطيته في فم و لو درتها لا ح نخاف منك و لا من اي حد من اهلي لان اللي لازم نخاف منه ح يكون شايفني في كل مكان و في كل وقت لكن انا ما درتها اللي درته قلته و مش متحشمة فيه و الموقف اللي حكولك عنه في الكلية فعلا صار بس والله العظيم ما هو ليا و ولدك يومها كان كريم و هلبة هو اللي دافع عني و قال ليه الدخان و لو تاخر شوية كنت قلت بعلو صوتي اي ندخن و بروا ملحوا !! انا لعند اليوم عافرت الدنيا بروحي باش وصلت اهني مش مستعدة نطيح ع شان حد يعني جيتي مش ع شان نكبر في عينك لكن وقت عرفت بكلامك عني لخالي و كيف انجابت سيرتي بطريقة مش حلوة نبقى مش بنت اصل لو رضيتها في اهلي .. المفروض اللي زييي ما تنصحك يا حاج لكن حتى في دينا ربي وصانا نتبينوا من اي تهمة مش هكي و خلاص نقولوا ع فلان و علان حاجات مش فيهم ... ان شاء الله معرفة خير .. و انا اللي عندي قلته و اكيد عرفت انا مني و ممكن تقول صحيحة وجه جتني بس زي ما قلتلك ايه انا يتيمة من يومي نقلع شوكي بايدي و ما نراجي حد يدافع عني و يجيبلي حقي ... السلام عليكم
و طلعت
و شني دارت فيه ما كانت عارفة
و اذا اولاده يومها هدوه بمصائبهم اليوم مواجهته لاخطاءه كادت ان تقضي عليه ..
ما حس بروحه الا و هو ....
يتبع
مع تحياتي
مارية علي الخمسي ❤️❤️❤️❤️❤️❤️❤️
