وقت تحس انك مش قادر تتحكم في نفسك
انت شخص ثاني ... قاعد تتغير من داخل
و للاسف اليوم طلع اسوء ما فيك
لانك ترفض الهزيمة تصرفت بأنانية
و بعجرفة و بحقد ذكوري بحث
حقد رجل شرقي يرفض الاعتراف بالهزيمة
راجع الكلام اللي صار
يعني شني اللي ضايقه ؟! و علاش تكلم معاها بقسوة؟!
كيف يعني اخته ممنوع تكون ضمن امثلة من عالنوع؟
و هي عادي تنحط ؟!كيف يحلل لنفسه و يحرم ع غيره
و اكثر شيء قهره نظرة عيونها اللي اول مرة يشوفها
و بحة صوتها اليوم كانت مختلفة
هي نفسها كانت مختلفة
مع انها كانت منتصرة و ظافرة بنقاش حضرله يوم كامل
و ممكن هذا اللي اخرج اسوء ما فيه ...
_____________________
ترجل من السيارة و بدي يمشي في اتجاه المسجد
اي و بالرغم من كل خصاله السيئة اللي هو مش ناكرها
لكن وقت ضيقة صدره ما يرتاح الا بين يدي الله توضا
و دخل للمسجد صلى ركعتي التحية و خذي مصحف يقرا قران في انتظار صلاة الظهر
و سبحان مقلب القلوب ما ان وطأت قدماه بيت الله حتى انشرح صدره
اما المعنية بالامر فوصلت لبيت عمها
مكابرة .. و بالقوة متظاهرة .. و هذه عادتها
رن التيليفون في ايدها شافت الاسم ابتسمت و ردت : اهلين جدي
حمد : اهلين بنتي كيف حالك ؟
خنساء تفتح في باب الحوش : الحمدلله .. انت كيف حالك و كيف حال جداي
حمد : شنو خاصها الحمدلله كل يوم تتعارك مع حد
خنساء ضحكت : هههه المهم مش معاك بس
حمد : لا انا وين شني جابني ليها معش نخش داخل بكل مالي و مال دوتها ... المهم قوليلي عجباتك السيارة ؟
خنساء كانت ماشية لدارها : اووو صار عندك علم و انا من بكري نخمم كيف بنقولهالك
حمد : كيف اماله تحسابي نخليه يشريلك سيارة و انا ما نجيب علم من شي هذا ما ناقص ضروري نعرف كل شي انا عليك يا بنت
خنساء قعمزت بتعب ع السرير : و احسن من يعرف ! راضي عليا يعني
حمد بصوت كانت في امس الحاجة اليه صوت حنين صوت يحتويك من اخمص قدميك لعند اعلى قمة في راسك : راضي يا بنتي راضي و تكسبي رضاي حق لو تروحي غدوا لحوش عمك ما تشغليني عنك سلم بنتي
خنساء بتطمين : انا وعدتك يا جدي باذن الله نروح معش تفكر هلبة في الموضوع
حمد : و كلميني كل شوية طمنيني
خنساء : حاضر انطمنك في كل وقت ريح بالك انت بس
حمد في سره "وين الراحة يا بنتي " : ان شاء الله ... هيا ردي بالك من روحك و اول ما توصلي كلميني
خنساء : ان شاء الله... بعد صمت ... جدي
حمد: اينعم
خنساء : شكرا
