الخنساء مشت مشوار مهم مع هنده لشيماء : يستر الله
خنساء بثقة : متاكدة ح تعجبك يا مرة عمي انت حكمتي عليها لانها مطلقة و ما اعطيتي لنفسك اي فرصة لا تشوفيها و لا تتعاطي معاها و لا حتى عرفتي قصتها و سبب طلاقها هذا السبب الوحيد اللي مخليك مش متقبلتها بينما هي تبارك الرحمن اذا من ناحية الشكل جميلة و الباقي شني مازال تبي بنت خلوقة و محترمة
هنده بجزن : يا ريتني فكرت بالطريقة هادي وقتها عمتني العصبية و الانانية كأم نبي لولدي احلى بنت و مواصفات الجمال عندي للاسف لا تكتمل الا بالعلم و المظهر و اللبس و العيلة و امور تافهة لو تعرفي الكلام اللي سمعته من اختي بعد طلاق شهد اللي يشهد ربي اني كنت ضده مع انها ما كانت معاي كويسة ابدا كلام عرفت من خلاله قداش كنت عمياء
خنساء : في امل مازال انا مش ح نتدخل و نخليك انت تتكلمي معاها قولي اللي في قلبك كام و متاكدة هي ح تسمع منك
هنده : ان شاء الله ... مازال
خنساء اشرت ع فتحة : من اهني
هندة تشوف للبيوت اللي من اول ما عرفت ان شيماء من المنطقة هذه طارتلها لانها منطقة شعبية كل البيوت فيها من ذات التصميم القديم حاليا تشوف فيها مصدر سعادة لابنها المكتئب الفترة الاخيرة
درست في اول مكان فاضي : هيا نمشوا ع رجلينا مسافة بسيطة و بعدها نوصلوا
هنده : هيا
نزلوا و يمشوا مع بعض
شوارع ضيقة مساحتها صح بس تسع الكل
وقت المناسبة سوى حزن او فرح الكل يفزع و يعطي حوشه لان الضيق في القلوب ...
كانوا الصغار يجروا وراء الكورة واحد شاطها بقوة جت ع رجل الخنساء
الولد : حيه اسف مديهالي
هي حبت تمازحه : تعالى انت خوذها
جي الولد يجري : راهو اطيحي
خنساء غمزتله : كان قدرت تعالى خوذها و طيحني
هنده تشوف للشارع : خنساء نهاري فضيحة راهو
و هي طنشت : تعالى
جي بياخذها بس بخفة راوغاته و بدت تلعب معاهم
بتقولوا خيرها ؟! الاجابة فرحانة !! اي هذا كله فرح
وقت نفرحوا نرجعوا اطفال و نتصرفوا بطريقة غريبة
و قعدوا يحاولوا ياخذوها منها شوية و شاطت : قوووووول
قعدوا يصفقوا كلهم و هي تضحك : هههههه سلام يا حلوين
