يوسف طلع يدور فيها و عرف انها في مكتب الجابري ....فتح الباب بدون حتى ما يطق لان كان مشغول عليها لان قلبه انقسم مية جزء ابدا ما كان حاب الموقف هذا يصير
و كانت مفاجاة ليه وقت شافها تضحك
الجابري كان يحكيلها ع المؤتمر الخاص بجامعة عمر المختار (البيضاء ) و هي سبق و قدمت فيه مقترح بالاشتراك مع يونس : هههه والله هذا خبر يفرح منها مؤتمر و حلقات نقاش و منها تدهويرة في البيضاء من زمان خاطري نمشي للشرق
يوسف قعد شاد الباب بايد و عيونه عليها
الجابري وقف و ايده في جيبه : اي خذمة استاذ يوسف
يوسف "عن اي يوسف يتكلم هادي خيرها هكي تشوفلي و كأني شخص عادي ولا عمرها تلاقت معاي و لا قالت فيا اي كلمة حلوة تي و لا كأني مقريها من الاصل "
الجابري حرك ايده قدام وجهه : يوسف
يوسف استاقض و رجع بعيونه ع الجابري : احم كنت ندور ع الدكتورة اسمهان ..
الجابري قعمز : مش موجودة ما جتش اليوم .. نقدر نساعدك ... في اي شيء
يوسف استجمع باقي كرامته : ابدا ... شكرا
و طلع
الجابري باعجاب : خليك هكي ردي بالك توريهم ضعفك ... ضعفك عيشيه بروحك في حوشك في دارك بينك و بين نفسك فقط اما الناس و خاصة اللي ضروك ردي بالك تضعفي قدامهم و توا تمشي تاخذي جدولك و موادك ع شان تبدي في الجولة الثانية و تحاولي تحافظي ع مستواك ... و نقولك ان جيهان طلبت مني عن طريق العميد اللي اكيد مكلمه بوها تقريكم السمستر هذا و انا وافقت بس انتم مجموعات مش ح نحطك معاها
الخنساء ارتاحت : احسن لان مش ح يصير خير لو قرتني و حتى .. سكتت .. حتى هذا يا دكتور .. تعرف ان عمي قبل بيحولني ل ## بس انا قلتله ما درت شي ع شان نهرب لهذا ارجوك مش حابة ننحط في موقف من هالنوع
الجابري قعمز ع الكرسي مقابلها : اصلا يوسف طلب نفس الطلب
"باهي هو طلبك حتى انت علاش اتضايقتي لما هو طلب نفس الشي يا ربي قدرني ع هالكبد الحرفة " هذا كان كلامها لنفسها : تمام نستاذن توا دكتور و مرة ثانية شكرا
الجابري : في الخدمة يالله قرايتك
خنساء دارت اشارة التمام متاع العسكرية و طلعت
و ذات الهمس مستمر .. ولان اسماءهم اثنينهم فيها حرف السين فسهل جدا تعرف ان الكلام ع كليهما ... و كان لازم تكون اقوى كان لازم تفوت كل شي و تمشي بثقة لان لو وقفت ع الكلام هذا عمرها ما تقدر تقدم اي خطوة للامام
