တတိယလူအဖြစ်ကူးပြောင်းခြင်း

Arc 2.19

unicode

"လုံဟွေ့..."

လုံဟွေ့သည် သူ့နာမည်ခေါ်သံကိုကြားပြီးနောက် သူရဲ့အေးစက်နေသောနှလုံးသားသည် ပြန်လည်နွေးထွေးလာသည်ဟု ခံစားလိုက်ရသည် ။ သူသည် ဒုစရိုက်လောကထဲဝင်ရောက်ပြီးနောက်တွင် သူ့အိမ်မက်များအားလုံးသည် အိပ်မက်ဆိုးများအဖြစ်သို့ ပြောင်းလဲသွားသောကြောင့် အိပ်ရေးမဝသောညတွေရဲ့ဝေဒနာကို သည်းခံခဲ့ရသည်။ သို့သော် သူ ယူယွီအကြောင်း အမြဲသတိရနေသည်။ အဆောင်မှာ တစ်နှစ်လောက် ယူယွီ သူ့အခန်းဖော်ဖြစ်လာပုံ၊ ယူယွီက သူ့ကို သဘောကျစွာ စိုက်ကြည့်ပုံ၊ ယူယွီက သူ့ကျောင်းစာတွေအပေါ် အလေးအနက်ရှိပုံတို့ကို အမြဲသတိရနေသည်။ ဘယ်သူကမှ မနှောင့်ယှက်ဘဲ သူတို့ သဟဇာတဖြစ်စွာ နေထိုင်ခဲ့ကြသည်။

ယူယွီသည် သူ့၏တစ်ခုတည်းသော ဖြေသိမ့်မှုဖြစ်သည်။

ဒုစရိုက်လောက၌ ဘဝသည် ကြမ်းတမ်း၊ ရက်စက်ပြီး ခွင့်လွှတ်နိုင်စရာမကောင်းပေ။ သေမင်းသည် ကျည်ဆံတစ်ချက်တည်းနှင့် ရောက်လာနိုင်ပြီး ထူးချွန်ဖြောင့်မတ်သော ကျောင်းသားတစ်ဦးဖြစ်ခဲ့ဖူးသည့် လုံဟွေ့သည် အရာအားလုံးကို မျက်မြင်ကိုယ်တွေ့ ကြုံတွေ့ခဲ့ရသည်။ နောက်ဆုံးတွင် သူသည်လည်း ပုံမှန်အတိုင်း အသားကျလာခဲ့သည်။

ပိုက်ဆံ၊ သေနတ်တွေ၊ သွေးတွေနဲ့ မျက်ရည်တွေသည် သူ့စိတ်ထဲမှာ စွဲထင်နေသည်။ သို့သော် လုံဟွေ့သည် ကျောင်းသားကောင်းတစ်ယောက်လို အရာအားလုံးကို မျိုသိပ်လိုက်ပြီး သူ့တိုးတက်လာမှုအတွက် သူ့အဖေကို ကျေနပ်စေသည်။

နှစ်နှစ်အတွင်း လုံဟွေ့သည် သူ့အဖေ၏ အရင်းနှီးဆုံးလူ ဖြစ်လာခဲ့သည်။ လုံဟွေ့သည် အသုံးဝင်ပြီး လျင်မြန်သည်၊ အကြင်နာကင်းမဲ့ပြီး ထက်မြက်သည်။ သူသည် အထက်တန်းကျောင်းတွင် ပြီးပြည့်စုံသော ကျောင်းသားတစ်ဦးဖြစ်ခဲ့သလို ဒုစရိုက်လောကတွင်လည်း ပြီးပြည့်စုံသော မာဖီးယားဂိုဏ်းဝင် လူငယ်တစ်ဦးဖြစ်သည်။

သို့သော် လုံဟွေ့သည် သူ့ ကမ္ဘာကြီး တဖြည်းဖြည်းပြိုပျက်သွားသလို ခံစားခဲ့ရပြီး ယူယွီနှင့် သူ၏အနာဂတ်သည်သာ သူ၏စိတ်သန့်မှုကို ထိန်းသိမ်းရန် တစ်ခုတည်းသောနည်းလမ်းဖြစ်သည်။