وردة يعقوب🌹مكتملة🌹

🌹الجزء 50🌹

🌺قصة : وردة يعقوب🌺
💎( نور الصدقي ) وردة نور💎
💎( خديجة ) Ama Mery 💎

✨البارت : 50 ✨

دخلوا لقاوهم مجموعين سلمى سلمات عليهم كاملين تا وصلات لليلى مدات ليها غير يديها قدامهم و دازت كلسوا تعشاو مجموعين و رحبوا بيها عاد طلعوا ينعسوا باش يقدروا يفيقوا بكري

سلمى فضلات تنعس مع البنات باش يبقاو مجمعات و داكشي لي كان كملو السهرة كيتعاودو و يزيدو يعرفو بعضياتهم بقات ناقصاهم غير شمس هاديك حاكمها راجلها عندو مكتنفنفش ههه

أصبحنا و أصبح الملك لله

فاقوا البنات بكري بدلو عليهم و هبطو لكوزينة كيعاونوا فيهم خلاوهم هوما مع روينة دالعراضة و تكلفوا بالفطور قادو و صاوبوا كولشي بالضحك و التقشاب تا صخرات عائشة سلمى حيت دوك جوجات عكزوا يطلعو الفوق مساكن

عائشة : بنتي سلمى طلعي لبيت أنور را على ليمن ديال الدروج بوحدو غير دقي عليه يحل ليك را نسيت و حطيت ليه حتى الفوطات ديال الكوزينة مع فوطاتو محتاجاهم أبنيتي و هاد الخطيات ما بغاوش يطلعو

نقزات ملاك : ياك أماما وليت خطية

عائشة : لا لا نتي خطية و قليلة فيك أبنت كرشي

سلمى : ههه صافي أخالتي ماشي مشكل أنا نجيبلهم ليك

عائشة : سيري الله يرضي عليك أبنتي هادو هوما لبنات وا إلا فالا

ضحكات سلمى و زادت طالعة و هي متوترة شوية من داكشي لي وقع لبارح ما كانتش باغة تشوفو و لكن لالة عائشة ولات عندها عزيزة متقدرش تخصر ليها و لا تقول ليها لا... شوية هزات كتافها

سلمى : و مالي على كترة التفكير آش با يوقع كااع

وصلات لغرفتو و دقات بالشوية دقة مسمعتهاش هي براسها مني مجوبش حلات الباب بالشوية و دخلات كتقول فخاطرها أنا دقيت و لكن هو لي ما سمعنيش

بدات تتقلب على بلاصة الفوطات لي نعتات ليها عائشة تا لقاتهم هزتهم و دارت باش تمشي فحالها و لكن عينيها مشاو ليه هو لي كان مشبح فالناموسية عريان من الفوق و لابس سروال دالكيطمة ناعس على كرشو و خاشي وجهو فالمخذة....قربات ليه بالشوية كتشوف فدوك العضلات المفتولين و كيفاش ضهرو مطراسي باينة فيه خادم على راسو مزيان أصلا أنور إنسان سبورتيف بزاف

عضات على فمها و بدات تتعبر

سلمى : آيي يا سيدي ربي و شهاد الزين عال الصباح "مدات يديها قاست ليه ضهرو بالزربة و بعدت" أوف أميمتي تيتيز النعمة الجنة

شوية تحمسات و سرحات تا تهدر هاكا مولفة تدوي معا راسها غير هاد المرة نسات بلي هي ماشي بوحدها و بلي ماشي فدارها و بقات تتعبر

سلمى: هاد العائلة الصراحة كولها تياتز لي شفت البارح فالطبلة بوحدهم "دارت تتأمل فيه" ولكن نتا حالة خاصة هههء