وردة يعقوب🌹مكتملة🌹

🌹الجزء 93🌹

💎🌺قصة: وردة يعقوب 🌺💎

💙بقلم : وردة نور "نور الصدقي " 💙

🍁🍁 البارت : 93 🍁🍁

شمس: هزات عويناتها فيه وخسرات سيفتها : يععع ريحتو خاايبة مانكلوش

يعقوب: هز يدو لفمها وقرصها حتى طلقات أنين صغير هضر بصوت مدعدع: ولفتي سقاطة لمك لخبز وتغماس لي ينفعك لا

شمس: مع طلقها دلات شنيفاتها لي كيترعدو غير على سبة يالاه جات دير أمارش وتبدا تنخصص وهي تشد على فمها لحميمر مخرجة عويناتها وجها تزير طلقات صاكها من يديها هو غير شافها شدها عندو بززربة مجا فين يهضر حتى تقيات عليه داكشي باش فطرات كلو ركابيها فشلو كترد و تكحب بغا تلوح مصارنها

يعقوب: شد ليها راسها بزربة مخليها كترد عليه وهو كيدوز يديه لكبيرة على ظهرها بشوية فشلاتو ماعرف أش بيها بغات تخرج لبوه لعقل عيط بصوتو لمدعدع ل خديجة حتى زلزل لحيوط جات عندو كاتجري مخلوعة وغير شافت شمس كترد تخطف لونها
خديجة: ياربي لحبيب مالها

يعقوب: بالو وعقلو غير مع مرتو كيهضر منيرفي : جيبي لماء اخديجة

خديجة مشات بزربة عمرات كاس ديال لماء ولقرعة

هو شدها عندو كيمسح ليها وهي فشلانة حيد ليها الزيف وشد كاس ديال لماء غسل ليها فمها وعطاها شربات

يعقوب: شد وجها بين يديه كيشوف فيها : شوية ؟ أش ضارك ؟؟

شمس: كترد النفس فشلانة هضرات بصوت خافت وحنين: ضراتني كريشتي

يعقوب: باسها من جبهتها : أش كليتي ؟؟
شمس: هئ والو غير فطرت بلحليب و لحرشة صافي

خديجة: غاتكون غير شمش لي دارت ليك هكا راه الشمش ديال هنا قاصحة ونتي مولفتيهاش

يعقوب شاف في خديجة ورجع شاف في شمس مخنزر باغي يسمعهم ليها على ديك طلعة لسطح ولكن ماشي وقتو لي فيها كافيها

قلع داك تيشورط لي عمراتو ليه عوماتو نيت وهزها عندو مطلعها لفوق وهي تبدا تهرنن

يعقوب: مالنا تاني
شمس: إوا ديني لسوق بغيت نشري علاش رجعتيني البيت

يعقوب: يالاه بغا يخسر لهضرة وهو ينعل الشيطان : بقا لمك دبا غير سوق زيدي نبدلو هاد لحالة ونديك لطبيبة تعطيك شي دوا

شمس:هنن ولكن انا ممريضاش غير تقيت حيث ديك الريحة ديال لماكلة خااايبة يعع

يعقوب: حدر عينيه ليها وهي مكمشة بين يديه هازها كي ريشة كيتمشا بيها : قطعي لحس

....

عند لعيلات لي عاطينها لدوران في سويقة عائشة حلفات حتى تشري لهاجر و الحاجة يديو فيديهم لباروك ديال مراكش تقداو داكشي لي بغاو ورجعو كيتمشاو مجمعين حتى خرجو من سويقة وجلسو على واحد لكرسي جنب طريق فواحد ظليلة كيتسناو في انوار لي صونات ليه عائشة يجي يوصلهم حتى وقفات سطافيط قريبة ليهم وهما غافلين على الأعين لي مركزين غير على هاجر موقف سطافيط كيشوف بلا هواه ب توني ديالو ديال لخدمة مخدوم على جسمو رياضي رغم السن ديالو إلا انه كيبان اصغر من عمرو والشيب مزين لحيتو وشعرو بقاو عينيه معلقين عليها وهي كتهضر وتبسم بأداب وضحك هو أكيد عارف عائشة وعارف لحاجة رغم انه معندو حتى صلة بيهم ولكن بحكم خدمتو فا ميخفاوش عليه الناس بقى هكاك حتى وقف عليهم انوار هزهم وزاد عاد قلع حتى هو بحالو