جيتني من أقصى دنياي...وصرت الدنيا بعيوني

البارت-13

-
بدأ الزواج والبنات مع بعض الرقص وأصوات الأغاني والتصفيق والتشجيع والبنات يتقدمون يرقصون ومتحمسين لفرحة اختهم اللي ماجابتها امهم وعد وفرحة فواز وفرحة العايلة كلها
دلال بغمزه: سُلاف قومي ورينا رقصتس
سُلاف: مااعرف كثير لاني ماقد رقصت
جود: قومي قومي جربي وانا بكون معتس
دلال: يلا مالتس عذر قومي تعلمي على رقصنا
رسل: صح عشان بزواج دلال"وغمزت لدلال" تكونين متعلمه
دلال ضربتها على كتفها: ماني متزوجه بعدي عني
قامت جود ومسكت يد سُلاف وبدت ترقص معها والبنات يصفقون لهم
-
عند الرجال
كانوا مشغلين السامري ويلعبون عليه فواز عِنان وبراء وعبدالعزيز وفيصل وحمد ومازن واخيرًا الشخص المختفي طول الايام عنهم عبدالمجيد كان يلعب معهم وكلهم استنكروا جيته لان كل وقته بالرياض ماسك محلات ابوه ولا يجي لديره الا نادر كملوا لعب العيال
حمد مسك عِنان مع يده: جعلني طالبك يابو فهد
عِنان: ابو فهد جديده كل شوي مطلعين لي اسم ابو فلان وابو فلان المهم وش بغيت
حمد: خذ الدلّال وخلهم يغيرونها
عِنان: وليه ماتروح انت؟
حمد: البيت ماهو بيتنا ف ليه اروح
عِنان: لا والله على اساس انه بيتنا وانا مدري
حمد: ياخي لا نتهاوش خلاص انت خواتك فاضين يمدي تصوت لهم ويغيرونها انا خواتي مشغولين تعرف خوات العريس وكذا طلبتك ياابو فهد لا تردني
عِنان: طيب طيب عطني
أخذ عِنان الدلّال وطلع فيها للبيت ودق الباب وفتحت له دلال: هلا عِنان
عِنان: هلا دليل اسمعي خوذي الدلّال وغيريها تكفين
شهقت دلال بخفه: نعم حبيبي تبي امسك الدلّال وامر فيها من عند الحريم وبكل كشختي توكل اقول
عِنان: يابنت يلا بروح لرجال
دلال : طيب انت ادخل مع باب المطبخ
عِنان ضربها بخفه مع رأسها: طيب توكلي شوفي فيه احد بالمطبخ او لا
دلال: تطمن كل البنات هنا مافيه احد
عِنان: طيب يلا روحي المطبخ عشان اجي احطهم وتغيرينها
دلال: طيب روح حطهم انت والحقك
راح عِنان ودخل المطبخ وحط الدلّال وهو يحاول يغض بصره عن شباك المطبخ لانه يطل على الحوش والحريم فيه بس لفتت نظره بنت قاعده ترقص مع اخته استنكرها بالبداية فستانها الازرق وشعرها القصير اللي يلعب على عنقها وبياضها اللي بارز جمال لون الفستان حط كفه على صدره لان الجمال اللي يشوفه كثير عليه جالس يحاول يعرف مين هي بس ماعرفها وصار يهمس بينه وبين نفسه:ماشفتها بعيوني الا والله بعين قلبي شفتها
قطع أفكاره صوت دلال: عِنان
توتر وهالشي وضح عليه بلع ريقه ونطق: هـ هلا يلا غيريها واذا خلصتي خلي احد يجي ينادي لي
دلال: زين
طلع وهو يحلف انه عجزت يشيل نفسه من مكانه ماتعود الا يشوف أسلحة رصاص بدلته واخوياه بس شافها هي غيرت موازينه بكبرها وقف قبل يوصل لرجال واخذ نفس : عِنان شفيك البنت اعتبرها زله وشفتها وانساها وانت حالف ماتحب خلاص "رجع لرجال وهو يحاول يتناسا الموقف "
وقت زفة العريس دخلوا البنات عند وعد يهدونها وعدلون شكلها
حنين: خلاص والله طالعه قمر
وعد: صدق بنات يعني شكلي مايحتاج شي كل شي تمام
رسل: وقفوا نسينا نقطة "ركضت وجابت عطر"نسينا ذا
وعد : اوفف الله يذكرك بالشهادة نسييتههه
اخذته وعد وتعطرت واخذت نفس عميق تهدي نفسها حضونها البنات وطلعوا ودخلوا العيال يزفون فواز ودخلوا على وعد كانت ماسكه المسكه بقوه من قوة التوتر والخوف دخلوا ونطق فواز :السلام عليكم
وعد: عليكم السلام
دخلوا اخوانها ورا وهو وقف جنبها
:هلا هلا بعروستنا الحلوه
ابتسمت لهم وعد: هلابكم ياعزوتي
قربوا وحضنوها ويباركون لها ويوصون فواز عليها
فواز: والله لااكون لها اقرب من نفسها واحرص حرص اهلها عليها
حط سَهم يده على كتف فواز: هذا العشم فيك ياولد العم
طلعوا العيال وصاروا فواز ووعد لحالهم لف لها وباس جبينها ومسك وجهها بكفينه:ياقبلة الله ماورا هالزين زين مبسم وعين وعاتق وغمازتين
وخصرً دقيق ومنحر وعودً ليان
نزلت رأسها وعد بخجل من غزله فيها ابتسمت وبان عليها التوتر ورفع فواز راسها لين صار عيونها بعيونه قرب من أذنها وهمس: انتي الحور والجنه وباب السلام
رجع وباس خدها وهو يتمنى يعيش حياة حلوه مع وعد وتتغير نظرتها له وتحبه مع الوقت كان يتمنى الأيام بقربها ولا يبعد عنها ووعد كانت نفس الإحساس حبت فواز من اول الملكة مااعطاها فرصة تاخذ عنه نظره سيئة كان دايم يحلي نفسه بعينها ويسوي اي شي عشانها
-
انتهى اليوم اليوم بالنسبة للكل ولفواز ووعد وللبنات وللأهل وكانوا مبسوطين بزواج وعد عكس حنين اللي فقدت حس فواز بالبيت تعودت تتهاوش معه دايم من اول مادخلت البيت حست بالفراغ كيف لو تزوجوا حمد ومازن؟ كانت الليله حلوه لها من جانب عبدالعزيز بس تنكر هالشي وتثبت كرهها له تذكرت المواقف والصدف بينهم وابتسمت كانت الليلة جميلة للكل بس هل هي بتكون جميلة على عِنان؟
-
صباح اليوم الثاني بعد الزواج والتعب والشغل البنات ناموا عند اديم عشان يساعدونهم بالشغل محد رجع لبيته ماعدا حنين اللي ماتقدر تخلي اخوانها وابوها لحالهم ووعد اللي راحت مع فواز لبيتهم اللي ببيت اهله
دلال: بنات يلا قوموا عمي وعمتي ينتظرونكم وبنرجع للبيت ياجود
اديم فتخت عيونها: كم الساعة؟
دلال: 10 يلا قوموا
جود: 10 يالظالمه خلينا ننام نايمين متأخر امس
دلال: قومي اقول عشان بنرجع البيت وكأن الوضع عجبتس
جود: ظهري متكسر من تنظيف امس خليني ارتاح
اديم : خليها لا تقوم بقوم ادخل الحمام قبلها بتروش
جود: لا تطولين اقول حنا بنروح بيتنا
اديم: حياتي قومي لبيتكم تروشي ذا بيتنا
دلال: جود قومي تتروشين ببيتنا
قامت جود وهي مو بوعيها وغسلت وجهها ولمت شعرها ولبست عبايتها وطلعت مع دلال بيروحون للبيت
ابو سَهم: وين يابناتي افطروا معنا
دلال: لا والله ياعمي كثر الله خيركم وجعله بالعافيه بنرجع للبيت
ابو سَهم: زين اجل انتبهوا بالطريق
طلعوا جود ودلال ونطقت دلال: يووو نسيت غرض لي عند سُلاف هنا
جود: ليه سُلاف ببيتنا
دلال: لا خلاص رجعت
جود: وعمتي رضت؟
دلال: مارضت بس يعني تقبلت
جود: الله يعين يلا روحي جيبيها وتعالي انتظرك عند الباب
دخلت دلال تجيب الاغراض وجود تنتظر عند الباب وهي مغمضه عيونها وسانده رأسها على الجدار حست بخطوات جنبها استغربت ان دلال رجعت بهالسرعه مسكت اليد اللي جنبها وسحبتها ناحيتها بقوه ونطقت: يلا تكفين مااشوف طريقي من النوم امشي
سكتت شوي تتحسس اليد اللي ماسكتها كانت كبير ماهي يد دلال كانت خشنه طيب اذا مو يد دلال يد مين؟
فتحت عيونها والتفت وشهقت يوم شافت قربه لها وكيف هو لاصق فيها وعيونه بعيونها وساكت يسمع لها وناظر تحت وشاف ايديهم ببعض وناظرت وانتبهت على نفسها وفلتت يدها ونطقت: اسفه والله ماقصدي احسبك دلال
أبتسم: ملمس حرير يبري العله
جود:روح بالله الحين تجي دلال وبتفهمني غلط
براء: انتي الصح بين كل اغلاطي والله
جود مشت مسرعه لبيتهم وتركت دلال
ظل يناظرها لين وصلت للبيت وابتسم وهمس:حبيب العين في عيّني يهلي
قاطعت أفكاره دلال وهي طالعه وتدور جود بعيونها ونطق : شفتها رجعت للبيت
مشت دلال من جنبه وراحت بيتهم