جيتني من أقصى دنياي...وصرت الدنيا بعيوني

البارت-14

-
بيت ابو عِنان
كانوا جالسين دلال وجود بعد تعب امس يسولفون ويتسلون ويعطون رأيهم بلبس البنات امس
جود: دلال شفتي البنت اللي امس اللي كانت لابسه اسود؟
دلال: اي شفتها بس مدري مين اول مره اشوفها
جود:اعتقد من معارف عمتي منيره
دلال: يمكن "التفت لجود ومسكت يدها"الا جود بسألتس سُلاف مانعرف عنها شي لا عمرها ولا خوالها ولا طبعها
جود:على كثر ماجلست عندنا مافكرنا نتعرف عليها بس عرفناها علينا
دلال: صح والله
جود:معليتس امسكها بس خلينا نتقابل
دلال: شرايتس نعزمهم اليوم يجون عندنا
جود: تحسبيني بقول لا يعني اعزميهم
وقفت دلال: بروح اقول لهتان يروح يقول لهم
جود: اصبري حبيبتي نسيتي هتان راح لرياض
دلال ضربتها بخفه على رأسها:ماراح بيروح
جود: اها طيب
راحت دلال ركض لهتان وقفت عند باب غرفته ودقت الباب ووصلها صوته: ادخلي
دخلت دلال:اهلًا اخوي العزيز
هتان:شتبين؟
دلال: طلب صغير
هتان: ياكثر طلباتتس هاتي وش عندتس
جلست جنبه مسكت يده :ابيك تروح لبيت عمي ابو حمد وعمي ابو سَهم وتنادي لي البنات
هتان: يو ياكبر شرهتتس
دلال: تكفى طلبتك ابيهم يجوني
هتان بتفكير شوي وفكر انه ممكن يشوف رسل: زين يلا قومي اطلعي بنام لين العصر وبعدين صحيني اروح اقول لهم
دلال: طيب
قامت طلعت وسكرت الباب ونزلت لجود
جود: هاه بشري وافق
دلال: اكيد طبعًا دلال تقوله وتبينه يقول لا
كشرت جود عليها: زين بقوم اصلح القهوة وانتي قومي سوي لنا حلا كذا حلو من تحت يدينتس
قامت دلال واشرت على عيونها: من عيوني
-
بيت ابو سَهم
جالسين بالحوش اديم وامها وابوها وسُلاف يتقهوون ويسولفون
نطقت اديم بضيق: والله فاقده وعود البيت بدونها ولا شي
ضربتها سُلاف على كتفها: وانا عندك
نطقت ام سَهم يوم شافت سُلاف تتكلم: غير الخوات من الام والاب واللي من اب بس
تضايقت سُلاف من كلامها رغم انهم ماحسسوها ابد انها اختهم من ابوهم ولكن ام سَهم حسستها من يوم رجعت للبيت
اديم: والله يايمه محد موسع صدري الا سُلاف بعد ماراحت وعد
قالت ام سَهم بغضب وهي تشوفهم كلهم بدوا يحبونها: اديم قومي سوي لاابوتس شاهي
قامت اديم وهي تدري ماتبيها تحتك بسُلاف: ابشري يمه
قامت سُلاف واعتذرت منهم انها بتروح للغرفه ترتاح ونطق ابو سَهم: شفيتس انتي على البنت؟
ام سَهم: لا والله بنت زوجي كيف تبي اعاملها
ابو سَهم: اسمي يامنيره انا سكت عنتس كثير انا اعتبر سُلاف زيها زي اديم ووعد لكن قسم لو احس انتس مضايقتها لترجعين لبيت اهلتس بدون رجعه
خافت ام سَهم انه فعلًا يسويها ويطلقها نطقت بتوتر: زين انا بقوم اشوف اديم
قامت ودخلت تشوف اديم تسوي الشاهي وقفت وزاها ونطقت: الحين انتم شفيكم حابينها بزيادة؟
اديم وهي تدري انها تقصد سُلاف: منهي؟
ام سَهم: اديم لا تسوين نفستس غبيه اقصد سُلاف
اديم لفت لاامها وبيدها الشاهي: شفيتس يمه على البنت تراها ماسوت شي وهاديه ومالها حس بالبيت
وانتي بس تهاوشينها ماتركتيها بحالها البنت طيبه وحبوبه وتحبنا كلنا و......... قبل تكمل كلامها عطتها امها كف تسكتها فيه
ونطقت: سدي حلقتس ماتتكلمين كذا مع امتس وتفضلين وحده اكرهها واشوفتس جالسه ولا تاخذين وتعطين معها
اديم ماسكه خذها اول مره امها تمد يدها عليها وعشان ايش عشان سبب تافهه جدًا ماتبيها تتقرب لااختها ولا لانها بنت زوجها؟؟
-
بيت ابو حمد
جالسين حنين وحمد ومازن ورسل بالصاله يتقهوون
حمد: هاه كيف الزواج ؟
رسل:الحمدلله مره حللو الصدق وكنت مبسوطه وراضيه عن شكلي وكل شي حلو وفرحة وعد الحمدلله
حنين:الحمدلله كل شي كان حلو وكنا مبسوطين وفرحانين من فرحة وعد
رسل: والله الفرحة صارت فرحتين بخبر دلول
حمد بلع ريقه ونطق: اي خبر؟
رسل: يمكن باقي ماقالوا لااحد لان لو تمموا عِنان قال لكم
حمد وكأنه فهم نطقت حنين تغير الموضوع: انتم كيف زواج الرجال كل شي كان حلو؟
حمد: اي خبر رسل؟
حنين ناظرت لرسل بحده ارتبكت رسل ونطق حمد بحده: رسللل اي خخببر؟؟
رسل ماتدري ليه عصبوا عليها وحنين تناظرها بحده ونطقت : خطبتها
انصدم حمد وكأن الدنيا ضاقت فيه انكتم نفسه وبانت عروقه من العصبية والصدمه وقف ونطق: الحمدلله يلا مع السلامة
وقفت حنين وراه على طول وراحت معه :حمد انتظر ابيك
حمد مارد عليها وطلع وسكر الباب
حنين خافت عليه وماتدري وش تسوي وسكتت تخليه براحته
حمد طلع من البيت وهو معصب ركب سيارته ومشى مايدري وين لكن بيطلع بيشم هوى يبي نفسه يرجع له
مشى ولقى نفسه قدام المكان او الملجأ حقه هو وعِنان وهتان وبراء اللي كل ماضاقوا راحوا له مكان خالي من البشر بين السماء والنجوم والقمر والليل والغيوم واللاشي
نزل من سيارته ووقف يناظر لسماء ضايقه فيه الدنيا ولا يدري وين يروح ولا يقدر يروح لعِنان نفس كل مره لانها اخته مايقدر حس كل شي اول مره احس بضعفه كل شي عليه
واخر شي توقعه دلال تنخطب متأكد مثل اسمه انها ماتبي هالزواج بس عشانها سمعت كلامه تبي تكسر غروره وكذبه حس الدنيا ضايقه فيه
رفع رأسه لسماء وهو يتنهد: اههه يارب ياربي ارفق بقلبي
نزل رأسه وحطه بكفينه لأول مره حس وده يبكي صح انه رجال وقوي قدام الكل لكن الحين هو مختلي بنفسه يبي يطلع اللي بقلبه يبكي ويدعي جلس يتخيلها لغيره يتخيل جمالها وشعرها والشامة اللي جنب شفتها نزلت دمعه على خده بمجرد انه تخيلها لغيره كيف لو صارت لغيره ونطق: يارب ارحم ضعفي وأجعلها لي يارب لي ولا هي لغيري يارب ماقصدي اجرحها ولا ازعلها بس كنت معصب لان اخوي فكر فيها يارب ارحمني يارب
ماقدر يصبر ودق على براء يجي عنده وصله صوت براء ونطق:السلام عليكم
براء: عليكم السلام
حمد بكل حيلة:براء
براء:حمد فيك شي شفيه صوتك كذا؟
حمد: تكفى تعال لي ماني بخير
براء فز: وينك؟
حمد: بمكاننا
براء: يالله جاي جاي
قفل وهو ينتظر براء يجي
بعض ساعة وصله براء
-
بيت ابو عِنان
دلال واقفه عند باب غرفة هتان تدق الباب تصحيه
دلال: ياهتان قوم العصر أذن من زمان
صرخ هتان: خلاص دلالوه لو قمت كسرت رأستس صحيت انا
دلال: يلا قوم عشان تنادي لي البنات
هتان: طيب توكلي بقوم اتروش واجي
دلال: يلا انتظرك وتراني حاطه لك حلا يحبه قلبك ياقلبي
ضحك هتان: طيب طيب
راحت دلال لجود تساعدها وقام هتان يتروش وطلع يلبس ثوبه ويرتب شعره وطلع من غرفته ونزل عندهم
دلال: هلا هلا يلا شرف اطلع نادي لهم
هتان: والحلا؟
دلال: طيب بحطه لك بالمجلس بس روح نادهم ياخي
ضحك هتان وهو شافها تنرفزت: طيب يلا بروح
طلع هتان من البيت وتوجهه لبيت ابو حمد وفز قلبه يوم شاف البيت وتقدم وطق الباب
حنين ورسل جالسين سمعوا طق الباب ونطقت حنين: ماراح اقوم شدي حيلتس وقومي
كشرت عليها رسل وقامت وراحت للباب ونطقت: مين
فز هتان من صوتها اللي وصله: ‏صوتتس عُيونتس كَلامتس وضحكتتس عافية قلبي والله
ضحكت يوم عرفت انه هتان وسكتت ماردت ونطق: خواتي يقولون تعالوا عندهم
رسل: تمام بقول لحنين ونجي
وسكرت الباب ورجعت داخل وقلبها يبتسم عكس شفتها الهاديه
وراح هتان وقال لكل البنات ورجع للبيت
ودقايق وصلوا البنات عند دلال وجود وجلسوا يسولفون
جود: الا اقول اديم فيه وحده ذاك اليوم بالحفله عليها اسود بس جالسه مع امها مين هي اول مره اشوفها؟
اديم: اي ذي ضي امها تصير صديقة امي
جود: وين ساكنين ماقد شفتهم
اديم:لا مو ساكنين هنا بالرياض
دلال: بس وربي يابنات تجننن
جود: الله حق انها اخذت عقلي وانا بنت
اديم: اي مره ححلوه
سُلاف:عندها خوات؟
اديم: لا وحيدة اهلها من البنات بس عندها اخوان
سُلاف: بس صدق مره جميلة ماشاءالله
ضحكت اديم: اشوفتس اخذتي على كلامنا
سُلاف اشرت على دلال: اذا مااخذت بالطيب باخذ بالغصب
ضحكوا كلهم بصوت واحد