جيتني من أقصى دنياي...وصرت الدنيا بعيوني

البارت-25

-
بيت عِنان وسُلاف
صحت من النوم وشافت الكنب اللي كان ينام عليها وماهو موجود تأففت وقامت وتروشت وطلعت لبست فستان ناعم اصفر قصير ومخصر وبأكمام قصيره وحطت روج وردي خفيف ومسكرا وتنشف شعرها القصير وهي تناظر شكلها بالمرايا وتفكر بينها وبين نفسها ودها تغير لونه وقررت تفاتح عِنان بالموضوع ارسلت بوسه لنفسها ولبست عبايتها واخذت طرحتها وطلعت عند البنات وعمتها ام عِنان شافتهم جالسين على الفطور ومن ضمنهم عِنان اللي طاحت عينه عليها اول ماسمع صوتها تسلم
سُلاف: السلام عليكم
كلهم بصوت واحد: عليكم السلام
ام عِنان: ادخلي يابنتي البنات داخل
سُلاف: زين
وجت بتدخل واستوقفها صوته: بنت
التفت له: هلا عِنان
عِنان مسك كفها وصار يشد عليها : اول شي ماتقولين هلا تقولين سّم ولا ماتعلمتي؟
سُلاف وهي تتألم : زين سّم
عِنان وهو يزيد بالشد: ثاني شي ماتطلعين من البيت بدون شوري
سُلاف: عِنان شفيك ترا البيت بالبيت ماطلعت بالشارع وبعدين طفشت لحالي وانت تطلع ماعندي احد
شد على يدها اكثر حس ان اظافره بتنغرس فيها: قصري لسانتس وقص ولا تراددين تقولين ابشر وانتهى
سُلاف تأففت: طيب ابشر
عِنان فلت يدها: والحين يلا ارجعي البيت
سُلاف برجاء: تكفى بجلس عند البنات ووالله طفشت لحالي
عِنان بصرامة: قلت لتس ارجعي سُلاف ماابي اصرخ والكل يسمع
سُلاف والدموع متجمعه بمحاجرها: اكرهك
قالت هالكلمة وتعدت من جنبه وهو حس الدنيا ضاقت فيه من كلمتها وقال بينه وبين نفسه: واذا تكرهني الا انا اكرهها دبل
رجعت البيت وهي تبكي وحست ان يدها توجعها رفعتها وشافت مكان اظافره من قوة الشد ورفعت كفوفها لوجهها وصارت تبكي اكثر
راح وراها وكان ناوي يأدبها على كلمتها وقف عند الباب وسمع صوت بكاء وعرف انها تبكي لانه قال لها ترجع فتح الباب ودخل وصارت تمسح دموعها بسرعه
عِنان: الحين كل هالبكي عشاني قلت لتس ارجعي صدق دلع بنات
سُلاف ماردت عليه وسكتت
عِنان: خلاص قومي غسلي وجهتس واطلعي عندهم
سُلاف: خلاص ماابي اطلع الحين اطلع بالليل
عِنان: بقلعتتس
تركها وطلع ورجعت تبكي اكثر من قبل
-
بيت ابو حمد
البيت اللي رجعت له الفرحة من يوم رجع حمد والكل فرحان ومبسوط ومحد سايعته الدنيا من الفرحة
جالسين بالصالة وحمد على السرير
حنين: يو ياحمد يووو لو تشوف البيت والدنيا والديره بدونك
حمد ناظرها بنص عين: شينه صح؟
حنين: شينه وبس الا اشين شي بالكون
ابو حمد: يعني انا مو مالي عيونكم؟
ضحك حمد ولف لحنين: يلا دبريها
حنين: افا يايبه انت روح البيت انت روحي انا والله العظيم بس تعرف يعني العضيد لازم تشين بدونه
ابو حمد ابتسم: اي والله ماكذبت حنين ياشينها بدونك ياحمد
حمد: الله يخليكم لي يارب ولا يوريني فيكم مكروه
رسل: خلصتوا المشهد الدرامي
حمد : انتي اخر وحده تتكلم ماعبرتي لي مثل حنون
رسل: ياخي تدري احبك واموت فيك واكرهه المكان بدونك بس مااعرف اعبر تعرفني
حمد ضرب رأسها بخفه: امزح معتس ادري بتس
رسل التفت لحنين: ترا بنروح لبيت عمي ابو عِنان عن سِلاف بالليل
حنين: اي مانسيت معليتس
حمد: اي وانا مين ينتبه لي؟
مازن: حلو يعني انا كذا مالي وجود؟
ضحك حمد: افا يالعضيد أنت اساس البيت من بعدي
حنين: شفيك ياحمد ترا مابنطول شوي ونرجع
رسل: اي بنروح لسُلاف من زمان عنها
-
بيت ابو عِنان وتحديدًا بيت عِنان وسُلاف
طلعت سُلاف من البيت واحت بيت ابو عِنان وشافت كل البنات جالسين وعِنان معهم سلمت ودخلت وجلست جنب جود
جود: شفيتس اجلسي جنب عِنان
سُلاف: عادي انا مرتاحه كذا
جود حست ان فيها شي بس ماحبت تضيق خلقها وسكتت: زين تبين قهوة ولا شاهي
سُلاف: ولا شي شكرًا "سكتت شوي وكملت" جود ابي مرهم للجروح عندتس؟
جود: اي عندي بس شفيتس
عِنان خاف عليها بس مابين
سُلاف: لا مافيه شي بس انجرحت جرح بسيط
جود مسكت يدها: وريني اشوف
شافت الجرح اللي أكد لها ان بينها وبين عِنان شي : سُلاف ذا مو جرح حتى ذا اظافر شخص
عِنان تذكر وش سوا فيها وندم مليون مره كيف يجرحها كيفف يهون عليييه
سُلاف: شفيتس جود اظافر مين يعني لا معليتس ذي قطعة سكين بالغلط
اكيد جود ماصدقتها بس ماحبت تكثر وتضغط عليها: زين بقوم اجيبه
جت بتقوم وتكلم عِنان: لا ماله داعي ياجود فيه عندنا بالبيت "قامت والتفت لسُلاف" تعالي
قامت سُلاف ولفت للبنات: تعالوا لي اليوم بيجون البنات عندي
جود: زين
قامت وراحت ورا عِنان وطلعوا بالحوش وقف ومسك يدها:شفيتس
بعدت يدها من يده: مافيني شي
عِنان: سُلاف بلا عناد شفيتس
سُلاف رفعت يدها بوجهه: اظافر شخص ياعِنان شخص مو سكين
مشت من جنبه ودخلت البيت وهو واقف ويفكر بكلامها هذا معناته هالشي منه ركض وراها ودخل البيت وطلع مرهم من الدولاب وجلس جنبها بالصالة
عِنان: عطيني يدتس
سُلاف: شكرًا ماابي خدمتك
عِنان: سُلاف بلا عناد خلاص عاد لا تصيرين بزر وجيبي يدتس
سُلاف ماردت عليه وقرب ومسك يدها وبعدت يدها عن يده : ماابي منك شي عِنان
عِنان : انتي عاندتي انتي تحملي
تقدم ومسكها وحطها بحضنه على طرف رجله وكانت تحاول تقوم بس هي عنده ولا شي وماكانت تقدر عليه ف قررت تستسلم وتخليه يحط على يدها عشان تقوم
مسك يدها وحط عليه مرهم ولفها بشاش ومسك ولف وجهها لوجهه وعيونهم متعلقه ببعض: انتبهي لها زين ولا تشيلين الشاش عنها
نزل رأسه وباس يدها بوسه طويله وحنونه وتحمل الحبب كله بعد عن يدها ونطق: اسف
قام وطلع من البيت
-
الرياض بيت ابو صقر
عند نور وضيّ جالسين ويسولفون ويجهزون للجامعة لان الدراسة قربت
ضيّ: قسم مالي خلق اداوم
نور: وهذا وهي باقي مابدت وانتي ماتبين تداومين
ضيّ بضيق: ماابي اداوم لاني ماني بالعه الجامعة ولا شي
نور: عندي خطة بس مااعتقد تعجبك
ضيّ: هاتي ايش عندك؟
نور: شفتي ذاك خوي جسار اللي مره شفته طالع من بيتكم
ضيّ تذكرته: اي سَهم ايش فيه؟
نور: تزوجيه
ضيّ: نعم كيف اتزوجه تستهبلي
نور: لا مااستهبل تزوجيه وروحي ادرسي برا وخلي شرط بينكم وبعد ماتخلصين تطلقي
ضيّ: لا طبعًا عمري مافكرت فيه اكثر من أخ
نور: اوك كيفك للمهم انا طالعه
ضيّ: وين رايحه بيتكم؟
نور: لا بروح مع صديقتي بس اذا احد سألك من اهلي قولي اني عندك
ضيّ: تمام
مسكت نور جوالها وهي ترسل له "حبيبي جايه الحين خلك بالمكان اللي اتفقنا عليه"
شاف عمر الرسالة ورد"زين حبيبتي انتظرك بمطعم****"
وصله الرد" زين"
ترك الجوال ولف للي جالس جنبه: ترا بتجلس معي مابتروح
:متى ناوي تترك هالحركات؟
عمر:ياادمي خلنا نتسلى
: ععمررر خلاص عاد
عمر: اقول خلنا نستانــ" قاطعه صوت الجوال" هاه دقت اسكت
رد عليها : الو حبيبي وينك وصلت
عمر: تعالي حبي انا بغرفه رقم 30
نور: زين حبيبي
دخلت الغرفه وشافته ونزلت طرحتها"هي ماتتغطى نفس ضيّ بس تتحجب"
نور: هاي حبيبي
شافها وانصدم انصعق من اللي شافه كيف كذا اكييد حلم حس الدنيا تدور فيه وحس غضب الكون انكبت فيه يحس حتى الذبح ماراح يطفي اللي داخله وقف ونطق
: نوررر؟؟؟؟؟
التفت نور وشافته وتمنت لو الزمن يرجع على ورا وماتجي كرهت نفسها وكرهت كل شي انصدمت من اللي قاعده تشوفه شقهت وحطت يدها على فمها ونطقت
نور: جسسساررر
التفت له عمر : تعرفها ؟
قرب ومسك عمر مع ياقته وصفقه كف بأقوى ماعنده: خطيبتي ياخسيس خطيبتي
وقف ومسكها مع شعرها وطلعها من المطعم وركبها السيارة ومشى وهم بالطريق
جسار: الله ياخذك وياخذ اليوم اللي صرتي فيه بنت خالتي وخطيبتي
نور كانت تبكي وماكانت تقدر تتكلم وكمل: من اليوم ورايح ماانتي خطيبتي ولا بنت خالتي انسي شي اسمه جسار وراح اخذ اللي اطهر منك ياقليلة الادب
وماكنت ترد عليه وتكتفي بالبكاء
وقف عند باب بيتهم : انزلي ياخسيسه
التفت له : تكفى جسار لااحد يدري
جسار : انزلي من سيارتي يالوصخه انززلييييييي
نزلت وهي تبكي وهو رجع للبيت وحس اللي شافه اليومي يكفي يقضي عليه قرر يروح لديره ويبعد عن أجواء المدن شوي
-
بالديره بيت سُلاف
دخلت تتروش بعد ماخلصت تجهيز وسوت كل شي تروشت وطلعت وحطت عطر على اماكن نبضها وعند اذنها وعلى شعرها ولبست بنطلون ونشفت شعرها وحطت ميكب خفيف ودقايق دخل عِنان الغرفه استغرب انها تتزين وسألها: ليه فيه احد بيجيك او بتروحين لااحد ؟
هزت رأسها بأيه
عِنان رفع حاجبه : وليه انا اخر من يعلم؟
سُلاف وهي تحط الروج: طمن شكك الزايد بيجوني البنات ماني طالعه لااحد
عِنان: مو شك ذا خوف وواجب تستأذنين مني
سُلاف التفت له: صح مو شك بس تعقيد ولا ليه تزعلني كل شوي وحابسني بالبيت وماتخليني حتى اطلع لااهلك
عِنان: مين بيجي؟
سُلاف: البنات يعني مين
قرب لها غضب وهو يكرهه كلامه معها لانها تتكلم معه من غير نفس وحط يده على رقبتها : اسمعي قسم لو ماتعدلين اسلوبتس معي مايصير لتس خير
سُلاف تأففت  : اي طيب طيب
عِنان: اي مالومك ماعليك شرهه متعوده على قلة التربية
سُلاف انصدمت من كلامه
-
الرياض بيت ابو صقر
جسار بدوامة تفكير مالها اول ولا اخر يفكر بكل شي صار ويتمناه حلم خطيبة وبنت خالته تطلع مع عيياللل؟؟؟ عقله مو راضي يستوعب الفكرة ولا راضي فيها رفع رأسه على صوت الباب
:تفضل
دخلت ضيّ: ممكن اجلس شوي
عدل جلسته: تعالي شعندك؟
ضيّ: ابد شفت اخوي جالس لحاله جبت له قهوة وجيت
جسار: جت بوقتها الا بقول لك
ضيّ: ايش؟
جسار: بفصخ خطبتي من نور
ضيّ شهقت وحطت يدها على فمها: ليششش وش صاير
جسار علمها بكل شي مايقدر يخبي عليها وعشان تعرف السبب لانها تحب نور مره
ضيّ: احلف بالله صار كل ذا ومن مين من نور؟؟؟؟
جسار: اي والله انا مصدوم نفسك
ضيّ: يع كريهه معليك بتلقى اللي احسن منها الله لا يبلانا
جسار: تكفين ضيّ لا تصيرين نفسها ادري انك قريبه منها وخايف عليك
قربت ضيّ ومسحت على ظهره: قسم ياابوي مااكسر ظهرك
جسار حضنها وبعد عنها: الا بقول لك
ضيّ: ايش بعد
جسار: بطلع لديره تجين معي؟
ضيّ شهقت وضربها على رأسها: شفيك بس تشهقين اليوم
ضيّ: جسار يروح الديره ولا بعد من كيفه
جسار حك جبهته: اي عادي شفيها
ضيّ: لا والله ماتذكر كيف سحبناك سحب عشان تروح هالروحتين معنا
جسار: حبيتها
ضيّ غمزت: منهي؟
جسار:يحمار الديره
ضيّ وقفت بتهرب :الديره الديره ولا الديره
ضحك جسار  ولحقها وهربت من الغرفه : غبيه مين بحب اذا ماحبيت الديره مين بحب
وعلى طول جت بباله وهي على الخيل تلعب مره وخايفه ومره مبسوطه ومره تلعب تحت المطر ومره تبكي شافها بكل الحالات
رجعت ضيّ وطلت برأسها على الغرفه: تراني بروح معك لا تسحب عليه
ضربها بالمخده: مناك اقول
-
الديره
كان جالس بحوش وساهي بأفكاره ويشرب شاهي ويناظر لضوء القمر ويفكر فيها صار لها فوق الأسبوعين لا إتصلت ولا ارسلت ولا استهبلت عليه نفس كل مره قرر هو يرسل لها ويتطمن عليها ارسل لها
:السلام
بعد نص ساعة وصله ردها
:عليكم السلام
سَهم: شلونتس  ؟
ضيّ: بخير
سَهم استغرب برودها بالكلام معه وهذي اول مره
سَهم: فيتس شي ؟
ضيّ: لا عندك شي بتقوله ولا بنام؟
سَهم: ضيّ بلا استهبال تكلمي شفيتس
ضيّ: اوك صح دايمًا ضيّ اللي تستهبل ودايمًا ضيّ الثقيله على الشخص اجي اكلمك تكلمني من ورا طرف خشمك ومتى مافضيت وروقت تذكرت ضيّ خلاص سَهم بعد عني بروح انام مع السلامة
سَهم مارد وعلى طول دق عليها وماردت وارسل لها
سَهم: ضيّ ردي احسن لتس
ضيّ: بتدخل علي من الجوال يعني ولا بتجي لرياض
سَهم: ضيّ ردي وفهميني الموضوع
ضيّ: ماابي تصبح على خير
قفلت جوالها نهائي وكان هو يدق ولا فيه فايدة مقفله جوالها يدق مره وثنين وثلاث وباقي مقفلته
-
بيت سُلاف وعِنان
البنات مجتمعين عندها ومبسوطين ويسولفون ويضحكون شوي ودق الباب
سُلاف: دقيقه بنات بشوف يمكن عِنان
قامت من عندهم وراحت وفعلًا طلع عِنان رفع رأسه وناظر فيها كانت أنيقة وجميلة بمعنى الكلمة كانت كلمة جميلة ولا شي عندها رغم انه شافها قبل يطلع بس زهت بعينه يوم رجع
عِنان:للحين موجودين البنات؟
سُلاف هزت رأسها بأيه: شوي ويروحون
عِنان: طيب بدخل انام
سُلاف: ادخل وروح للغرفة محد مانعك
عِنان: ادخلي شوفي لي طريق
سُلاف دخلت وشافت له طريق وتغطوا البنات ماعدا جود ودلال
دخل عِنان سلم عليهم وتعدا للغرفه ونادى سُلاف وراحت وراه
عِنان: باقي فيه عشاء؟
سُلاف وهي تتأفف : اي باقي ليه ماتعشيت يعني
عِنان : لا تتأففين عشان لاادفنتس بمكانتس
سُلاف: طيب بجيب لك اجلس
راحت سُلاف وحطت له عشاء وودته للغرفه وحطته قدامه وناظرت له : ترا ماني مسويته لسواد عيونك وصل؟
بعد عِنان الاك من قدامه وسحبها وطاحت بحضنه قرب وجهه لوجهها وصارم خشمه لاصق بخشمها ومسك رقبتها: ونطق: ان ماتعدل اسلوبتس معي بعدله بطريقتي ياللي مدري كيف كانت تربيتك
لفتها وبعدت عنه وتجمعت الدموع محاجرها وكيف يتكلم عنها كذا: مين سمح لك تشكك بتربيتي انا متربية واحسن لك بعد لا تحسب نفسك رجال بالتصرفات ذي الا من أشباه الرجال
قالت كلامها وكأنها جنت شي على نفسها عصب وعروقه وضحت من قوة الغضب مسك رقبتها ولصقها على الجدار:ماراح اسوي شي لان البنات برا بس خليهم يروحون والله ياسُلاف لااوريتس واربيتس من جديد والله بس خليهم يروحون ان ماخليتتس تتمنين الموت مااكون ولد ابوي يابنت الشوارع
تركها وطلعت للحمام"تكرمون" وغسلت وجهها وهدت نفسها وعدلت الميكب وطلعت
جلسة مع البنات ولا طولون وقرروا يروحون لان الوقت تأخر ودعتهم سُلاف وهي بتجني على نفسها اذا صارت لحالها ومتأكده انه بيذبحها لا محال ودعتهم ورجعت ترتب من بعدهم حست فيه وراها وقفت بكل خوف تقدم وكان بيصفقها وشدت على الكاسة من قوة الخوف بعد يده وشاف يدها اللي بدت تنزف قرب منها وصار يناديها: سُلاف سُلاف بنت افتحي يدتس
فتحت عيونها وشافته قريب منها وماسك يدها ونزلت انظارها على يدها اللي كانت تنزف  وبدت تبكي بأنهيار وبشكل صدم عِنان اول مره تبكي قدامه بكل هذا الانهيار وبكل الدموع ذي قرب لها وحضنها لصدره وشد عليها ناحيته وهمس: ليه دايم قربتس يلخبطني ليه يابنت عمي
كانت تبكي سُلاف ولا ردت عليه ولا سمعت كلامه منهاره بعدها عنه ومسك يدها وصار يمسح دمعتها بأبهامه ويهمس : خلاص خلاص لا تبكين مافيه شي يبكي جرح بسيط مو عميق تطمني الحين انظفه
قام على طول وقومها معه وراحوا للغرفه جلسها على السرير وجاب مرهم وشاش وصار ينظف جرحها ولفه بالشاش ومسك وجهها بيدينه : خلاص سُلاف لا تبكين  الجرح نظفته وبيطيب
سُلاف بعدت يدينه عن وجهها وهي منهاره بكي : بعد عني ياحقير اكرهك اكرهك كرهه ماكرهته لعدوي ليه تجرحني وتداويني خلني مجروحه اذا تتلذذ بجروحي ليه اخذتني من بيت ابوي اللي كنت مرتاحه فيه لييه عشان تعاقبني لاني بدافع عن نفسي تبيني اصير ذليله عندك واطيع أوامرك واسمع كلامك بدون مادافع عن نفسي اكرهك عِنان عمري ماراح احبك اككرهههككك طلقني وفكني تكفى طلقننييي
-
صباح اليوم الثاني بالرياض بيت ابو صقر الساعة 8:00ص
جهزوا اغراضهم جسار وضيّ وقالوا لااهلهم ومشوا لديره
ضيّ : اوف ياليت البنات معهم جوالات على الاقل اكلمهم واقول لهم اني بجي
جسار: عادي اقول للعيال ويقولون لهم
ضيّ: لا لا صح معي رقم وعد بدق عليها واقول لها
جسار: زين بس بمر اخذ لي فطور تبين؟
ضيّ: اي اي ابي جوعانه
جسار: بطينيه دايم جوعانه
ضيّ لفت مدت لسانها بعبط ورجعت تكلم وعد
دقايق ووصلها صوت وعد
ضيّ: اهلًا اهلًا السلام عليكم
وعد : هلابتس ضيّ عليكم السلام
ضيّ: اقول وعد انتي عند البنات؟
وعد: لا بس بروح الحين لااهلي ليه؟
ضيّ: قولي لهم نص ساعة واكون عندكم
وعد ابتسمت بكل فرح: صدق جايه؟
ضيّ: اي والله جايه اقول لك نص ساعة واوصل
وعد: الله ننتظرك ياحلوتي
ضيّ:بس نتجمع ببيت مين؟
وعد: بيتنا تعالي
ضيّ: خلاص حلو
-
بعد نص ساعة وصلوا لديره وكان وده يشوفها ولو صدفه بس يبي يشوفها يبي يرتاح من كل شي مر فيه بوجهها وكلامها معه من كل شي
نزل ضيّ ببيت ابو سَهم وتعدا هو للعيال
نزل وبدأ يسلم عليها وجلس معهم
عِنان: اخبارك ياجسار
جسار: والله الحمدلله بخير انت اخبارك بعد الزواج
عِنان: الحمدلله كل شي بخير
جسار التفت لحمد المنسدح عندهم: اخبارك ياحمد شلونك؟
حمد: الحمدلله بأحسن حال
جسار: ياجعله دوم الحمدلله
سَهم: ليه جاي لحالك وصقر وينه؟
جسار: ابد جاي انا واختي كان ودنا نجي نزوركم ونطلع شوي من جو الرياض وجيناكم
سَهم وهو حس قلبه انقبض من طاريها: ابد حياكم الله البيت بيتكم والديره ديرتكم
جسار: الله يبقيك
سَهم: بس تراك متعشي متعشي عندنا لا تردنا
جسار ابتسم: كثر الله خيركم والله ماودي اكلف عليكم
سَهم مامن كلافه ولا شي حنا اهل
ابتسم جسار لهم
-
عند البنات بيت ابو سَهم
سُلاف: وحشتينا مره تعالي كل شوي
ضيّ: ياكذابه شايفتني بزواجك تراه ماصار له شهر
ضحكت سُلاف: بس ولو اشتقنا
ضيّ: شكلي بسكن عندكن على هالشوق اللي لي
اديم: يالييييتت والله يامُنى عيوننا
ضيّ: حبيباتي والله
وعد: مين جايه معه ابوتس؟
ضيّ: لا اخوي جسار مدري شفيه حاب الديره مره
اديم ارتبكت وحمر وجهها وبان عليها ولاحظتهت ضيّ بس سكتت
وكملوا سوالف ومبسوطين مع بعض وضحك وسوالف واستهبال ولعب سوو كل شي مع بعض بكل فرحة وحب واخر شي طلعوا لسطح وانسدحىا وصاروا يتأملون الغيوم والنجوم
ضيّ: يووو يابنات تدرون ماقد جربت هالشي
وعد: كنا دايم نجلس هنا انا واديم واحيانًا اخواني ونسولف ونلعب ونستهبل ونناظر الغيوم والنجوم والقمر
اديم: يووو احلى شي واحلى اوقات
سُلاف: اي من بعد مادخلت حياتكم ماسويتوها صدق خوات على الفاضي
ضحكت وعد : هاه سويناها واعتبرها لتس
ضيّ: تعتبرها لها ولا لي حددي
اديم : لكم كلكم
دق الباب وهم يتأملون وقامت اديم بتروح تفتح وتشوف مين عند الباب فتحت ونطقت: مين؟
جسار: انا اخو ضيّ ياليت يالديم تقولين لها تطلع لي بنروح
اديم: وكيف عرفت اسمي بسم الله
جسار ضحك: وهذا اللي همك نادي لضيّ بس
عدلت حجابها طلعت رأسها من ورا الباب : ماراح اناديها لين تقول لي كيف عرفت اسمي
سكتت شوي وهو منزل رأسه وكملت: جسار فيك شي وجهك مو طبيعي
تنهد تنهيده قويه : اهه يالديم فيني كل شي
اديم خافت عليه: شفيك بسم الله
جسار نزل رأسه: موضوع مااقدر اقوله كذا خليها بعدين اذا شفتك اقول لك
اديم : زين بس لا تزعل وجهك مو حلو بالزعل
رفع رأسه وأبتسم لها: اوعدتس مايزعلني شي بهالدنيا وانا اشوف وجهتس الحسن يالحس الوحيده بالدنيا
اديم نزلت رأسها بخجل : صاير تتكلم نفسنا شعندك
جسار ضحك: من قوة الحب لكم صرت منكم وفيكم حتى ضيّ مستغربه اني صرت احب الديره
ضحكت اديم طول صوتها وكمل: ياربي ياضحكتتس اللي تجبر كل شي منكسر فيني الله ياخذ كل شي يزعلني وانتي عندي
سكتت وماردت عليه من قوة الخجل وكمل: اديم
رفعت رأسها وصارت عيونهم ببعض وبكل حب وكأنه يناظر لمعجزه بالدنيا ذي كلها: لو اخطبتس توافقين؟
اديم ارتبكت توقعته يقول كل شي الا هالشي : بروح انادي لك ضيّ واجي
ركضت على طول داخل وهي مو قادره تمسك قلبها ولا نضبها من قوة الخوف اللي عاشته حست ودها تطير فوق من الطاقة اللي صارت فيها ولو ماضلوعها كان طلع قلبها هو من الخوف او من الحب
طلعت للبنات ونادت ضيّ له وودعوا ضيّ وراحت لجسار ومسكوا طريق الرياض وضيّ ملاحظه عليه انه ساهي ولا تكلم: جسار
التفت لها: لبيه
ضيّ: فيك شي
تنهد بقوه : لا ابد
ضيّ: كل هالتنهيده وتقول لا ابد قول تراني اختك
جسار: احبها
ضيّ: الديره؟
جسار هز رأسه بـ لا: الديره ماحبيتها الا من حبي للي فيها
ضيّ: اديم؟
التفت لها: شدراك؟
ضيّ: واضح عليها يوم قات جيت مع اخوي جسار ارتبكت وحمر وجهها
جسار: اههه ياضيّ والله اني احبها حب يوووو كأني اعرفها من سنين
ضيّ: متى كان اول لقاء بينكم؟
جسار:بملكة صقر شفتها صدفه ومره بزواج اختها
ضيّ: شفتها صدفه بعد
جسار: اي والله صدفه بس صارت الصدفه كل شي اشوفه وكل شي أعنيه وكل شي بحياتي
كملوا سوالف لين ماوصلوا لرياض وكان محتوى كلامهم اديم والحب اللي يكنه جسار لها
-
بالديره
بيت سُلاف وعِنان
جالسه على السرير تستعد لنوم ودخل عِنان فزت من الخوف
عِنان: انا عِنان لا تخافين
سُلاف: مااخاف الا منك اصلًا
عِنان: تبين الطلاق؟
سُلاف : اي ماابيك
عِنان: تبشرين به بس خليني اخلص ادور سبب عشان اواجهه فيه اهلي وابوتس
سِلاف التفت عنه ونامت وهو جلس يفكر هل هو صدق قد هالطلاق ولا لا ليه لذي الدرجة كارهه بعدها بس مايبي وجودها نام ونامت معه أفكاره
صباح اليوم الثاني
عِنان صحى وشافها صاحيه مسويه الفطور ومتروشه ولابسه وقف وتروش ولبس ثوبه وطلع لها
وتكلم بدون مايناظر لها: بكره بنروح الرياض
سُلاف: ليه؟
عِنان: بس بنتمشى باخذتس وباخذ خواتي ونروح نتمشى
سُلاف انبسطت بس مابينت: اوك
طلع عِنان وراح بيت اهله ودخل عليهم سلم على امه وابوه وجلس عندهم
عِنان: اقول يبه ويمه ترا بكره بنروح الرياض
ام عِنان: وش المناسبه؟
عِنان: مافيه مناسبه بنتمشى ونزور ابو صقر
ابو عِنان: والله ماهي فكرةً شينه
عِنان: خلاص اجهزوا كلكم وبأذن الله بكره الفجر نمشي
ابو عِنان: خلاص تم
جود: الله يعني بنروح لضيّ اوف وربي مره متحمسه
فز من مكانه وجت بتمشي وتكلم عِنان: وين وين بدري تجهزين
جود: لا بروح اقول لدلول
ابتسم عِنان :طيب روحي

تعالوا انستا لتشبيهات احبابي"rwiiai1"