جيتني من أقصى دنياي...وصرت الدنيا بعيوني

البارت-15

-
بمكانهم المُعتاد بالوحده والمساء الصافيه والقمر المُنير والنجوم اللي تحول حول القمر والصحراء الخاليه من البشر والأنوار والاصوات منعزل بنفسه يفكر بحبه وايش بيصير وايش ممكن يسوي كان ينتظر براء يجي ويشيل من همه او على الاقل يعطيه حل وماهي الا نص ساعة ووصل له براء ونزل من السيارة وجاء وقف جنبه وحط يده على كتفه
براء:امر يااخوي شفيك
تنهد حمد ومايدري وش يقول ومارد على براء
براء: حمد ياولد وش صاير فيك
حمد: ضايقه فيني الكون كلها يابراء
براء: افا وانا اخوك وش فيك
حمد: بياخذها غيري
براء استغرب :منهي ومن بياخذها وش السالفه فهمني؟
حمد:دلال
فتح عيونه بذهول: دلال من؟
حمد: اخت عِنان يابراء اخت عِنان
براء: دلال اخت عِنان بس وش فيها ومين بياخذها حمد بتفهمني السالفه ولا شلون؟
حمد تنهد ونزل راسه وقال بضيق:احبها وقلت كلام كان بيني وبين حنين بس سمعتني يابراء سمعتني كنت اقول اني مااحبها ومين يحبها ذي قليلة ادب وطويلة لسان وكلام كثير كل ذا قلته من غيره غيره اكلت قلبي وحرقته "التفت لبراء" تخيل يابراء فيصل يسألني عنها ويقول انه صادفها وشافها بملكة وعد وفواز ويسألنييي ويقول ابيييهاا " وجلس يضرب صدره" هذا احترق هذا مات هذا انقهر هذا تخيل وصارت نيران فيييهه تعبت يابراء تعبت
براء مسك يده يمنعه من الضرب: طيب مين بياخذها منك؟
نزل راسة بضيق: انخطبت من واحد خوي عِنان بالدوام ووافقت وافقت لانها سمعت كلامي تبي تكسر ظهري فيها تبي تكسر قلبي وتقهرني
براء مسح على ظهره: لا يااخوي دامها ماصارت له وقف كل شي وقفه اذا تحبها لا تخليها تصير لغيرك
حمد وهو منزل راسه: كيف كيف يابراء وهي موافقه عشان تكسرني
براء مسك وجهه بكفينه: ياولد الحب مايعرف كيف ومستحيل خرب كل شي كسر ام الدنيا امسكها وقول لها لا توافقين اخطبها وقول لها احبك لا تخليها تطير من يدينك والله ويشهد علي ربي اللي قاعد يشوفنا اني لو اني مكانك واحبها وربي مايعقد عليها ابن ابوه لا تخليها تروح اكسر روس الناس وخشوم رجاجيل وخذها خذها غصبًا عن اللي يرضى واللي مايرضى
سكت حمد يفكر بكلام براء ويفكر كيف كيف يسوي كل ذا ويخرب كل شي او على الاقل يخليها ماتوافق
-
عند اجمل ثنين وبيت احلى عروسين فواز ووعد كانوا مبسوطين بحياتهم ومتفاهمين مع بعض وكثير وفواز معيش وعد احلى من الحياة اللي كانت تتمناها
وعد: تبي أصب لك قهوة ؟
فواز: اي تكفين رأسي مصدع
وعد: اسم الله عليك شفيك؟
فواز ابتسم لها:تطمني مافيني شي صداع خفيف
وعد صبت له قهوة:طيب متى بتروح لدوام؟
فواز: تبين الفكه مني هاه
وعد ضحكت: يالله منك يافواز مو قصدي كذا
ناظرها وهي تضحك وحط يده على دقنه: طيب تدري
وعد: ايش
فواز حط كفه على خذها: أن ضحكّتتس تجدد لذة الحيْاة فيني
نزلت وعد رأسها بخجل وابتسمت مد إبهامه لشفتها وحطته عليها: خلاص لا تضحكين تجيبين أجلي ترا
ماقدرت تكبح ضحكتها وضحكت طول صوتها وناظرها: تعانديني يعني اوريك حط يده ورا ظهرها وسحبها له وحط رأسها على صدره ومسك فكها بكفه ورفع رأسها ونزل رأسه وباس عيونها ونطق بكل حنّيه: ياكثر حبتس بقلبي
قربت منه وحضنته حست الدنيا ولا شي وهي بحضنه كل شي يزيح عنها وكل شي تنساه معه ماتهتم لناس بس تهتم لهم الدنيا مو سايعه فرحتها وهي بحضنه كأنه حبها وحب من زمان لكن هو بدت قصتهم وقصة حبهم وأعلنت لدنيا وله انها تحبه من يوم نطقت: فواز
فواز: يروح فواز
وعد نطقت بكل خجل: أحبك
فواز ناظرها بكل ذهول: عيدي عيدي وش قلتي
وعد: متى بتداوم
فواز: وعد بلاش عناد وعيدي وش قلتي
ضحكت وعد: ابيك واحبك كثر ما اخفي عليك
تقدم فواز وحاوط خصرها: والله مافيهم من لونتس لا زين أوصاف ولا مذهب أنتِ أغلى والباقي دونتس وأنتِ احلى منهم وأعذب وأنتِ اللي يحبتس مايخونتس وأنتِ اللي يخونتس ماينحب
-
عند حمد وبراء
براء:خلاص قوم يااخوك خلنا نرجع الحين اكيد خواتك خايفين عليك الوقت تأخر
حمد ناظر جواله وشاف الساعة: زين يلا قوم
مسكه براء مع كتوفه: اسمع قبل تروح اسمعني حمد انت تحب دلال اكسر اكبر رأس يفكر ياخذها منك وانتف اطول شنب رجال لا تخليها تضيع من يدينك انتبه ياحمد انتبه
حمد هز رأسه ومشوا كل واحد لسيارته ورجعوا لديره
-
عند البنات
جالسات بالحوش يسولفون ويشربون شاهي وقهوة وعلى ضوء القمر
جود: الا اقول سُلاف كم عمرتس مين خوالتس وين تسكنين علمينا شوي عنتس تعرفين عننا بس مانعرف عنتس
ضربتها اديم على كتفها : وجود صادقه انا وانا اختتس ومعتس كل الوقت مااعرف عنتس شي
ضحكت سُلاف : اسمي سُلاف عمري 22 اسكن بـ أيطاليا وعندي خاله وحده بس هي وامي وحيدات اهلهم وامي توفت وعمري 8 سنوات هي كانت تعبانه من يومها حامل فيني بس ماكتب لها ربي الموت الا هالوقت وكنت ساكنه عند خالتي ويوم كبرت علمتني عن ابوي وكل شي وقررت ارجع له بعد مااخلص دراسة
جود شهقت : درستي جامعة؟
هزت رأسها سُلاف: اي درسة جامعة تصميم ازياء وبنفس الوقت كنت اتعلم اللغة العربية عشانكم وبس ورجعت لكم
دلال: معليش على هالسؤال بس انتم هناك مسلمين
ضحكت سُلاف: اي مسلمين وخالتي واهلي كلهم مسلمين ولو مو مسلمين كيف بتاخذ ابوي؟
جود: يو حبيتتس زيادة
سُلاف: يعني اول ماتحبيني ؟
جود ضحكت: افا لا والله احبتس
ضحكت سُلاف: اكذب عليك
ضحكت دلال: مانقول اكذب عليك تقول امزح معتس
جود: ياخي خلاص شفيتس مستقعده خليها
سُلاف: ولا يهمك نعيدها "التفت لوجد" امزح معتس
وضحكوا وانتهت ليلتهم وهم مبسوطين لكن فاقدين مكان وعد
-
اليوم الثاني الصباح عِنان وبراء وفواز وسَهم طالعين لرياض عشان شغلهم وبحكم انهم كلهم ضباط وعساكره وطالعين لشغل مع بعض
-
ببيت فواز وعد جالسه تعدل له البدلة وتبخرها وهو كان يتروش لبس وطلع وهو يناظرها تبخر بدلته جاء من وراها وحضنها وهمس: مادري كيف بصبر بدونتس
وعد ابتسمت له: ولا انا بتطول؟
مسكها ولفها ناحيته ومسك وجهها بكفينه: لا ماراح اطول يروحه بس كلها فترة وراجع انتبهي لنفستس زين تمام
وعد هزت رأسها وتقدم يبوس جبينها وخدها وابتسمت وناظر غمازتها وقرب وباسها: بتروحين بيت اهلتس ولا بتجلسين هنا؟
وعد: لا بروح اشتقت لهم
فواز: والله ويابختهم
ابتسمت له وتقدمت ورفعت نفسها وباست خده وهو انصدم وفتح عيونه بذهول اول مره هي تقرب له مو هو يقرب لها اول مره تجي البوسه منها هي مو منه مسكها وقربها ناحيته وحط جبينه على جبينها: حالفه تجيبين أجلي يابنت ارفقي بحالي رايح الدوام وراح أحمي الوطن لا تكركبين موازيني خليني موزون
ابتسمت وعد وبعدت عنه واخذت البدلة وتقدمت له: يلا حبيبي خذها وروح البس عشان لا تتأخر
اشر فواز على عيونه: من عيون حبيبتس الحين اروح ياروح روحي
وعد: تبي احط لك الفطور؟
فواز: لا لا بفطر مع العيال وحنا رايحين لان لو جلست بتأخر عليهم كثير
وعد: تمام بس يصير اطلبك طلب؟
فواز: انتي ماتطلبين انتي تأمرين وبس
ابتسمت وعد: ابيك توديني لااهلي على طريقك
فواز: بس؟ من عيوني يلا روحي البسي على بال مااخلص
راحت وعد تلبس عبايتها وهو يتعطر وينشف شعره ويلبس جاكيت البدلة اخذ وعد وطلعوا من البيت وقبل يطلعون راحوا لبيت اهله
شافتهم حنين وسلمت وحضنت وعد وبدت ترحب فيها: هلا هلا والله يالك وححشششه
فواز: عفوًا وانا جدار هنا يعني؟
حنين: ياحبيبي يااخوي انت روحي وقلبي تدري اني بكيت يوم دخلت البيت وماسمعت حسك
فواز تقدم وحضنها: اوف اوف كل ذا عشاني
حنين: اي طبعًا بس بعد شوي خلني اعبر لها عن شوقي
فواز: يحياتي يااختي وانا بعد مشتاق لتس ووحشتيني وودي اسكنتس عندنا
حنين ناظرت وعد: ياخي بعد عني شوف كيف غارت احسها شوي وتضربني
ضحكت وعد: اغار من مين؟ منتس انتي لا ياحبيبتي تطمني    
فواز ناظر لها وغمز: اعترفي غرتي من حنين
وعد: فواززز
فواز تقدم لها وحط يده على ظهرها: يروحه تبين احضنتس؟
ضربته وعد على كتفه: بعد عني ماتشوف اختك واقفه
حنين ضحكت : ماتوقعت اخوي العصبي النفسية خاروف
فواز ضربتها مع رأسها بخفه: تعقبين
دخلت رسل وركضت تحضن وعد : اوففف اشتقت لتس
فواز: شرايكم اطلع لان الواضح ماتبوني اصلًا
تقدمت حنين وحضنته: لا والله لك وحشه انت بعد
فواز دق جواله وكان عِنان التفت للبنات: خلاص عاد أخرتوني على العيال "التفت لوعد" بتجين معي اوصلتس ولا بتجلسين
حنين: وين بتروحين
وعد: اهلي
حنين: اجلسي عندنا
وعد: لا بروح وانتم تعالوا هناك مشتاقه لهم
فواز: خلاص عزمتيهم يلا امشي
طلعوا فواز ووعد من البيت وفواز رد على عِنان
فواز: هلا ابو فهد
عِنان: ابو فهد بيجي يدفنك لو ماتجي تأخرنا
فواز: والله معليش بس يلا بوصل زوجتي لااهلها واجيكم
عِنان: لا تتأخر
سكر الجوال والتفت لوعد: ذكريني اجيب لتس جوال معي قبل ارجع
وعد: وكيف بذكرك؟
فواز: دقي علي عندتس اخوانتس
وعد: زين
وصلوا لبيت اهل وعد وقفت ناظرت وعطاها ظهره بيروح واستوقفه صوتها: فواز
التفت لها فواز ونزل لين صار بطولها: يروح فواز
تقدمت وحضنته وهو جمد من حضنها له وهي اليوم بادرت كثير من البوسه والحضن ونطقت: انتبه لنفسك زين وارجعي لي بدري لا تطول
فواز مسك وجهها بكفينه: انتي كذا ماتخليني اروح بس ابشري من عيوني بنتبه وماراح اطول عليتس وانتي انتبهي لنفستس ولا تطلعين برا البيت الا مع اخوانتس تمام
وعد: تمام
قربت وباسها وطلع من البيت
-
بوسط بيت ابو سَهم
دخلت وعد عليهم وكلهم رحبوا فيها واديم ركضت تحضنها وسُلاف
اديم:اشتقت لتس البيت بدونتس ولا شي
سُلاف: والله صدق بدونك ولا شي
وعد: ياربي يابنات مره اشتقت لكم بس بعدوا خلوني اروح اسلم على امي وابوي واجي ونسولف
دخلت وعد ولقت امها وابوها بالصالة وتقدمت تسلم عليهم ووباست رأس امها وابوها وجلست عندهم
ابو سَهم: هلا والله ببنيتي
وعد: هلابك يبه
ام سَهم: شلونتس يابنيتي
وعد: والله بخير يايمه كل شي الحمدلله
ابو سَهم: مبسوطه مع فواز
وعد نزلت رأسها بخجل: اي الحمدلله مبسوطه
ام سَهم: الحمدلله الله يجعلها دايم
وعد وقفت: انا بروح عند البنات
-
رجع حمد من البيت بعد يوم مُتعب عليه وثقيل على قلبه وهلك وتعب من قوة الضيق وقوة الشعور بالتعب لان الشخص اللي يحبه ممكن يفقده بأي لحظة وبأي يوم يسمع خبر ملكتها من خواته مثل ماعرف خبر خطبتها من رسل دخل البيت وشاف مازن وخواته قدامه وناظر لهم
مازن: هلا اخوي وينك ياخي مختفي
حمد: معليه كنت رايح مشوار مع براء
حنين: شفيه وجهك تعبان
حمد: ياحنين مافيني شي بس بدخل ارتاح
حنين: تبي اسوي لك شي؟
حمد:لا لا بدخل انام بس انتم وين رايحين؟
حنين: بيت عمي عبدالعزيز
حمد: زين انتبهوا لنفسكم وارجعوا بدري
حنين: زين
طلعوا من البيت وحنين قلبها مو متطمن وعارفه ان فيه شي والسبب خبر خطبة دلال وصلوا لبيت عمهم عبدالعزيز ودخلوا للبنات
-
عند البنات
سلموا على بعض وجلسوا يسولفون ويتقهوون
جود: احم بنات ماقلت لكم
دلال عرفت انها بتقول الخبر اللي ماتبي احد يعرف: جود اسكتي
جود: شفيتس ياخي خلينا نفرح
دلال: جود خلاص
حنين: شفيكم بنات
ضحكت جود: دلال وافقت
شهقت حنين: ايييشششش
جود: بسم الله شفيتس اقول دلال وافقت وقالت لعِنان قبل يروح لدوام واحتمال اذا خلصوا دوام بدري ملكتهم الاسبوع الجاي
كلهم فرحوا وانبسطوا الا دلال وحنين دلال لانها عارفه بالقلب اللي حبها وحبته
وحنين لانها تعرف ان اخوها حب دلال حبها مهما كذب هالشي قدامها يدري انه بيموت لو عرف بهالشي
جود: عاد هالله هالله تجون للملكة وبنكشخ كشخه اوفف
اديم: اككييييدد
سُلاف: اذا ماكشخنا لدلال نكشخ لمين ؟
ابتسمت دلال تجاملهم
اديم التفت لوعد:بتنامين عندنا؟ لا تقولين لا وفواز ماهو فيه
وعد: اككييييدد فواز مو فيه واروح هناك
حنين: غش يازوجة اخوي تتركينا
اديم: تراها اختتييي
رسل: زوجة اخونا "التفت رسل لوعد" بعلم عليتس فواز تشوفين
وعد بغرور: علميه ياحبيبتي فواز مايسوي لي شي ولا حتى يفكر
رسل: نشوف نشوف
وعد: يشوف دنيته فيني يحياتي
جود: خلاص خلاص قلبت هوشه هييي
حنين ضحكت: خلاص خليها نمزح
وعد: بجيكم اذا جاء فواز
رسل: الحب لفواز مو لنا
وعد بغرور:طبعًا حبيبتي
جلسوا يسولفون ويضحكون ودلال بالها مو معها ولا معهم بالها بقرارها اللي اتخذته
هل هو صح او لا هل بيكون لها مثل ماتتمنى وهل بينسيها حمد وحبه