جيتني من أقصى دنياي...وصرت الدنيا بعيوني

البارت-63

-
الرياض بأحدى المستشفيات...
عند سُلاف وهتان وجود
دخلت سُلاف عند الدكتوره وجود وهتان ينتظرونها عند الباب جلست عند الدكتوره
سُلاف: السلام عليكم
الدكتوره: عليكم السلام اهلًا استاذة سُلاف ايش تحسين فيه؟
سُلاف كانت توصف لدكتوره الوجع: مدري آلم بأسفل بطني وظهري واحس ظهري متكسر بشكل مو طبيعي ودي بس انسدح ومااشتهي الأكل واستفرغ كل شي أكله ومره تعبني هالشي
أبتسمت الدكتوره بخفه: من متى تحسين بهالاشياء؟
سُلاف وهي تتذكر: تقريبًا اربع ايام شي زي كذا
الدكتوره: ممكن يكون حمل
ابتسمت سُلاف وكملت: قومي انسدحي على السرير عشان افحصك
قامت سُلاف ونزلت عبايتها وحطتها على الكرسي وتقدمت للسرير وانسدحت عليه تقدمت الدكتوره ورفعت بلوزتها على فوق وبان بطنها وحطت الدكتوره الجل ومسكت السونار وصارت تمرره على بطنها وابتسمت الدكتوره وسُلاف استبشرت خير : بشري دكتوره؟
الدكتوره : ماشاءالله حامل ياسُلاف مبروكك
ابتسمت سُلاف بحب: الحمدلله يارب الله يبارك فيك مشكوره دكتوره
الدكتوره : ولو واجبي
مسحت الجل عنها وعدلت لبسها وقامت وجلسوا على المكتب : اسمعي لازم اعطيك اشياء تتعبينها لان بالبداية الحمل لازم تحرصين عليه ولا تتحركين كثير ولا تشيلين شي ثقيل ابد.......
وصارت تعطيها الدكتوره تعلميات عشان تنتبه لحملها وسُلاف مُصغيه بُكل مافيها وبداخلها تقول " ياليتك معي وياليتك دريت ونفرح سوا"
لبست عبايتها بعد ماخلصت الدكتوره كلامها وطلعت لجود وهتان ابتسمت وجتها جود بسرعه: بشرييي!!!!
ابتسمت سُلاف من ورا النقاب: حامل
جود صرخت بخفيف: يييسسس الحمدلله يارب الحمدلله
جاء هتان: بشروا وش صار ؟
جود: اخيرًا بتصير عم ياهتانوه
هتان ضحك: ماشاءالله مبببروك ياحَرم اخوي مبروك
ابتسمت له سُلاف: الله يبارك فيك يارب
طلعوا من المستشفى راجعين لديره وهي تفكر باقي له 5 شهور طول وطول كثير
-
الرياض
عند عِنان وبراء وصقر بالمركز...
جالسين على الأرض مع بعض ويسولفون ويضحكون وكانوا اليوم رحلتهم للمهمة اللي هي "بالجنوب"
عِنان ناظر لساعة اللي تُشير لـ 10:10:عيال يمدي احط لرجلي لديرة وارجع قبل بكره
صقر: ليه بتروح لديرة وترجع ؟
عِنان حك رأس وتكلم براء: اشتاق ياصقور اشتاااققق
ضحك صقر: شدعوه طيب قول انك مشتاق للحب لا تخبي
عِنان ضرب كتف براء: لا مو كذا
براء ضحك: اسكت عني بس اهخخ بنت العم قلبت موازين اعقل واحد فينا
عِنان بحدة: ببراء
براء حط يده على فمه: خلاص خلاص
صقر: والله انكم مرضى "التفت لعِنان" مايمديك تروح ابد الفجر بتمشون والحين 10 وتبعد عنا الديرة ساعة ونص مايمدي عِنان مايمديك ترجع وتروح ان شاءالله
عِنان هز راسه وسكت وكمل صقر:انا رايح تامروني بشي قبل اروح؟
عِنان وبراء بصوت واحد: لا يعطيك العافية ماقصرت
طلع صقر وتوجهه لبيتهم
عِنان كان متوتر وااضح عليه التفت له براء:عِنان شفيك؟
عِنان: كلمني هتان اليوم راحت سُلاف للمستشفى تعبانه وخايف عليها
براء: طيب سألت هتان وش صار ؟
عِنان هز راسه بـ اي: بس قال مافيه شي تعب خفيف
براء: خلاص اجل تطمن
عِنان: بس احس فيه شي ماقاله لي
براء: ارتاح ياعِنان ارتاح
عِنان التفت لبراء وقرر يواجهه موضوعه هو وجود قبل يروح للمهمة: ياليت ارجع بخير عشانها وعشان ملكة جويد
انقلب وجهه براء على طول ووضح هالشي لعِنان الواضح انه منصدم التفت له: براء
براء بلع ريقه :هلا
عِنان وهو يناظر عيونه: تحب جود؟
براء صار يشتت نظراته يمين ويسار مايبي يحطها بعيون عِنان
عِنان بحدة خوفت براء: براء اتكلم جاوب علي ورد علي رد الرجال لا تتهرب
براء قرر يقول له كل شي: اي
عِنان: ليه ماقلت لي مو انا اقرب لك منك ليه اخر واحد يعلم انا ليه تركتها لين تنخطب؟
براء : عِنان اسمعني اول شي انا حبيتها حب شريف والله ماقد سويت ولا شي وحبي كان بسكوت ماكان احد يدري حتى هي وكنت ناويها والله بس تعرف وفاة امك الله يرحمها وحسيت ماهو وقته
عِنان: تبيها للحين؟؟؟
براء فزّ: اي بالله
سكتوا شوي وكمل براء: عِنان
عِنان رفع عيونه له بدون رد وكمل:
مابغيتها بالحرام ومابغيتها بالظلام
مابغيتها غير بالعز الشريف المهتدي
مابغيتها بالتلاعُب ومابغيتها بالكلام
مابغيت الا انك تصير خال لولدي
"
ابتسم عِنان بعد ماسمع كلام براء وقف ربت على كتفه:جتك ياابو عزام هي لك بخيرها والله يبعد شرها
ابتسم بقوه وحضن عِنان وشد عليه: نذرٍ علي اني ابيها بخيرها وشرها ولو شرها يغطيني ابيها
ضرب ظهره عِنان بخفه: استح على وجهك اخوها قدامك لا تخليني اطلع قهر الرجال وغيرتهم عليك
ابتسم براء: شدعوه امون ياحب
عِنان: طيب حبيبي تقلع بنام لي شوي قبل اروح
براء: حبيبتك هناك مو انا
عِنان مسك علبة المويا وضربه فيها وطلع ركض ونام عِنان وهو مبسوط ان فيه احد يأمن عليه قلب الجود..
اما عند براء طلع والابتسامة مو قادر يتحكم فيها ولا قادر يمسكها ابد التفت حوله وماشاف احد وضحك بقوه يحس قلبه بيطلع من مكانه
براء مو قادر يستوعب كمية الحب اللي بقلبه لها جلس وصار يتأمل القمر اللي مغطيه الغيوم وتذكرها وتذكر اول مره شافها فيه وكيف حبها وكيف يفزّ لصوتها واسمها وأبتسم:
يطري علي زولك ويذبحني الشوق
ويزيد شوقي لك....ويزداد حبك
ماودي اكتب فيك قصايد وشوق
ودي أدق وأقول والله اني أحبك
-
بعد ماطلع من عند عِنان وبراء توجهه لبيتهم على طول وهو ناوي يغير ويروش ويطلع لان الشغل عليه كثيير دخل البيت ويمشي بتعبت استوقفه صوت شّجي اول مره يسمعه صوت كل حواسه التفت له وصار يسمع بتمعن وكان صوت اُثنى تغني وكان جميل بشكل كبير كبير كبير على قلب الصقر وكانت تغني:
رميت أقداري في دربك وصرت في عروق الدم
احبك كثر ماسالت دموعي ومانسى ناسي
يجول الحزن في ضلوعي بردت وذاب فيني العظم
كثير من الحطب حولي وعندك انكسر فاسي
-
أبتسم يوم ميّز النبرة وعرف انها مّلاذ أبتسم وهو يحس انه انكسر ناحيتها كثيير مو يكفي كان مخبي حب الطفولة ينكسر من صوتها هالمره ؟
وكمل الأغنية بصوت عالي خوفها
سألتك بالذي زانك تحبي فيني حتى الظلم
تحبي عيوبي وغدري تحبي المُر في كاسي؟
انا من كثر مااحبك ابيك كثر رمل أليم 
ابيك تكون فوق الناس وابي ماينحي راسي
-
خافت بس عرفته من صوته قامت واخذت اغراضها وراحت بتدخل مسك يدها وتكلم: والله وطلع صوتك حلو يابنت الخال
ابتسمت بسخرية: اول شي اترك يدي وبلا قلة ادب ثاني شي مو كنا أخوان فجأة بنت خال
ضحك بقوه وهو يدري انها ماتنسى كلامه ضحك ضحكة عّذبه جدًا عذبت قلب مّلاذ ولخبطت شعورها: شفيتس مانسيتس كلامي؟
استنكرت كلامه: شفيتس؟؟؟ صاير تتكلم نفس اهل الديره
ابتسم على جنب بخفه: اي لاني احب وحده منهم
بلعت ريقها وهي تسمع كلامه ومحاجرها امتلت من الدموع: اترك يدي ولا بصرخ والله
ترك يدها وناظرته بنظرات كرهه: حقير وقح غبي
تركته ومشت وهو كل ماقالت شي تبي تنرفزه يزيد بضحكاته.....
-
الديرة
بيت ابو حمد
كانوا ذابحين ذبيحه وابو حمد يوزع لحم على اخوانه واهل الحارة وكل واحد من عياله ارسله لبيت ارتفع صوته وهو ينادي: فييصصصللل فيصلوهه جعل عدوك مايربح
جاء يركض فيصل: سم سم
ابو حمد مد كيس اللحم اللي بيده: ودها لبيت ابو وليد
فيصل يتذكر مين ابو وليد وعرفه: طيب
طلع من البيت وبيده اللحمه ومشى متوجهه لبيت ابو وليد وقف عند الباب ودق وبعد دقايق وصله صوت ناعم جدًا وفيصل متعود على هالاشياء والأصوات:مين؟
فيصل تنحنح: انا فيصل
شكرت شّجن: شبغيت؟
فيصل: افتحي طيب لا إله الا الله
شّجن فتحت الباب شوي: خير؟
فيصل: اها كذا تستقبلون الضيوف؟
شّجن انقهرت منه: وعمى قول امين لا احسن ادخلك واخليك تتقهوى بعد قلة ادب صدق
شّجن: فيصصل اخلص قول وش بغيت لاانادي ابوي
فيصل ضحك بقوه: لا خلاص يابنت بسم الله شفيتس
مد اللحم وكمل: ذا من ابوي لكم
مدت يدها واخذت الكيس بطرف أصابعها: طيب شكرًا
فيصل: امسكيه زين يابنت لا يطيح لذي الدرجة متقرفه
شّجن : مالللكك ددخخللل
مسكته شّجن وكان الكيس مقطوع من تحت وماانتبه فيصل ونزل دم على رجل شّجن وشافته وشقهت تصرخ خاف فيصل عليها: شفييتتسسس كل ذا عشان لحم
شّجن وهي تشهق وماقدرت تطلع الحروف من منطوقها:د....د.."وصرخت بقوه" دددمممم
أغمى عليها وشافها فيصل نسى ابوه نسى نفسه نسى اهلها نسى كل شي ودخل لها كان مُغمى عليها والواضح عندها فوبيا من الدم نزل رفع رأسها بيده سمح لعينه تسرق النظر ويتأملها كانت جميلة جدًا فاقت خيال فيصل وحس انه اول مره يشوف هالجمال كله كأنه سطر شعري طالع من حوار عن جمال انتبه لشعرها الأسود اللي يميل لونه للأحمر على خفيف نزل شماغة وحطه على شعرها بعد عينه عنها بعد ماخطف النظرة لها وصار يناادي : يااهللل البيييت
طلع وليد بهاللحظة وشافها طايحه ركض لهم ومسكها:شفيييهاا وش صاير
فيصل: والله مااعلم جبت لكم لحم من عند ابوي وفجأة صارت تصرخ تقول دم وطاحت
زفر براحة: اي هي عندها فوبيا من الدم عمومًا مشكور ماقصرت
طلع فيصل من البيت وهو يحلف ان كل حواسة ماهي معه ومن ضمنهم قلبه ضحك بسخرية وهو بالعادة يلعب بالبنات ويجيبهم من جماله بس هالمره هي لعبت فيه وجابته نسى الموقف ورجع لبيتهم
-
بالليل ببيت ابو عِنان وبالتحديد بيت عِنان
البنات كلهم مجتمعين عند سُلاف ومبسوطين بخبر حملها اللي انتشر والكل فرحان فيه وابو عِنان اللي طاير من الفرح بحفيده
أديم: عمر عمري انا اللي بيصيرون أم
سُلاف ابتسمت لها وكملت: بنات معليش مااتخيلها ام
سُلاف ضربت يدها: عمى ليه ايش ناقصني
وعد ضحكت: معليتس منها خبله
رسل: اي والله خبله خليتس لها
حنين : هي مايجوز لها الا ضيّ الخبله الثانية اللي نفسها
سُلاف: يعمري ياضيّ والله مره وحشتني
وعد: واحشتنا كلنا
اديم مسكت مكان قلبها:اخخخ بس خيانه هذا وهي زوجة اخوي ساحبه اخوي معها لرياض صدق ان سهموه خاروف
وعد ضحكت: لا يسمعتس بس
رسل: هي وينها الحين
اديم كشرت على وجهها :لندن ماشاءالله بس
وعد ضربتها بخفه: انتي ماينفع معتس زوجة اخونا بعد تحسدينها
أديم تمسح مكان الضربه: عمى اي والله طيب وش قلت قلت مااشاءالله ماتسمعييينن وبعدين ماني حاسدتها بس ماشاءالله شافت شي ماشفناه
وعد: تشوفينه مع زوجتس
اديم رفعت يديها: يارب يارب يجي غني يارب عشان يتوديني مو مثلتس انتي واللي جنبتس ودلالوه الحظ واحد ماشاءالله
سُلاف: اي تشوفين اللي جنبها بعدين وين تروح اصبري
اديم شهقت: مخططه من ورانا يالوصخه
سُلاف ضحكت: ماخططت شي بس ناويتها بس خليه يجي عِنان
اديم تذكرت: صح متى يجي
سُلاف : باقي له 5 شهور
أديم فتحت عيونها بذهول: اوففف اوففف مطول
سُلاف: اي والله وتدري بعد حملي ماعرف عنه
وعد: لا تقولين له قولي له اذا جاء
سُلاف : اي اي ان شاءالله
أديم تنحنحت: يابنات ودي نروح الرياض خلونا نقول لواحد من العيال ونروح وربي طقيت من الطفش
وعد: قدام بس بقول لفواز ونروح
أديم رفعت يدها: الحمد لك يالله وحدك اني انسانه اقيد نفسي بنفسي اللهم لا حسد مافيه رجال يتحكم فيني
وعد: وابوي اشوف سحبتي عليه؟
أديم: ابوي على عيني ورأسي بس ادري مابيقول لا مثل النفسيات الأزواج
وعد التفت لسُلاف: الا صح بتروحين انتي وعِنان مايدري؟
سُلاف: بدق عليه اليوم واقول له
أديم: يمديك تكلمينه؟
سُلاف رفعت حاجبها: تراها مُهمه مو سجن
أديم: مدري ماتوقعت المهم قولي له واذا قال لا قولي محد طلب رأيك وسكري بوجهه
سُلاف التفت لوعد وتأشر على اديم: والله خراب بيتي عليها
رسل: عززز اديمييي عشقي وجوتس
أديم:اعجبتس ياحب اعجبتس
حنين: الا انا انا الوحيده اللي مو متزوجه بس ماتعجبيني
أديم: على قولة سُلاف لعِنان محد طلب رأيتس
سُلاف شهقت: متى قلت !!!
جلسوا البنات يضحكون عليهاا وعلى وجهها اللي قلب فجأة....
-
يمشي على طريق الرياض راجع لديره وضوء القمر ينور له الشارع ويتأمل القمر ويرجع نظره لشارع ويتذكرها للحين مانسى شكلها ولا صوتها ولا هوشاتها كل يوم يزيد حبه لها ويتذكر كيف كل مايجي تصدف انها هي تفتح له الباب ويهاوشها وتزعل منه ويراضيها ضحك بخفه وهو يتنهد براحة يوم جت على باله كلمة عِنان"جتك ياابو عزام هي لك بخيرها والله يبعد شرها" تنهد بقوه ورجع ظهره على المرتبة وهمس: اي والله ياعِنان اني ابيها بخيرها وشرها
مد يده على المسجل وطول الوقت وبدأ فارس مهدي يغني:
"
لولا ماضني على العود غنيت
يأجمل قصيدي يأعذب الحب ومناي
كل شي حققته معك وانت وأنت بي ميت
إلا الهوى والحب يأعظم خطاياي
معذور انا لو بك طربت وتغنيت
يأغلى بني أدم وحواء ومغناي.....
-
صباح اليوم الثاني
الرياض تحديدًا المركز
كان يتجهز ويعدل أغراضه وهو يبي يمشي للجنوب صار ينظف مكانه ويعدل فراشة وأغراضه مسك جواله بيدخله بجيبه لكن انتبه لشي بالجيب مسكه وطلع وشاف سلسالها المُفضل وأبتسم  وعرف ان هي اللي حطته ولمس ورقه وطلعها وكان مكتوب فيها"اذا رجعت لي ياشخصي المُفضل رجع لي سلسالي المُفضل ماابي شي مُفضل من بعدك اذا رحت انت تروح أشيائي المُفضله ارجع ورجعها لي أحبك سُلاف "
ضحك بقوه ومسك جواله وأتصل عليها ماكان قادر يقاوم الشوق ابد أتصل ولا اخذ دقيقه من اتصاله الا ووصله صوتها : عِنانيييييي
عِنان وهو يهيّم فيها وبطريقة نطقها لااسمه: ياروحه وكل مافيه وله
سُلاف حطت يدها على بطنها وابتسمت: وحشتني
عِنان: مو أكثر مني
سُلاف: متى راجع؟
عِنان تنحنح: توي بمشي
شهقت بقوه: نعععمم!!
عِنان : شفيتس
سُلاف: والشهر اللي راح وين كنت؟
عِنان: كنت مع زوجتي الثانية وحبيبتي
سُلاف جمد كل مافيها وتحس حتى لسانها ثقل وردت ببرود عكس العواصف اللي داخلها: اوك
ضحك بقوه : يابنت والله امزح شفيتس والله بالمركز وتونا بنمشي
سُلاف وهي الغصة متملكه صوتها: طيب
عِنان عرف انها زعلت صدق : حبي حياتي وحبيبتي وفؤادي والله اني امزح انتس إنتي الاولى والأخيرة
ماردت عليه وكمل:تبين تعرفين مين زوجتي؟
ماردت..
عِنان : والله براء ورب البيت براء هو اللي كان معي وكنا بالمركز مو مصدقه اسأليه ذي زوجتي اللي اخونتس معها
ضحكت على كلامه وضحك معها وتنهد بقوه: آهه ياجعلني ماانحرم منها اي والله
سُلاف: حيوان زعلتني
عِنان: صح انا حيوان يوم زعلتس اسف
سُلاف ابتسمت: متى ماشي؟
عِنان: الحين والله بس شفت سلسالتس وقلت بدق
سُلاف : اذا مارجعت لا ترجع لي أشيائي المُفضله لانك أولها
عِنان ابتسم: برجع وبرجعها ان شاءالله
سكر الجوال وهو يحس تجددت المشاعر داخله جاته قوة بشكل مايخيله مو معقوله صوتها يجيب له القوة ذي كلها والحب والمشاعر الحلوه طلع دخانه وصار يدخن وتفكيره معها ....
-
الرياض
بأحد المستشفيات
كان جالس ويهز رجله متوتر صار لها يومين بالمستشفى واليوم دخلت العمليات صار يمسح على وجهه ويذكر ربه رفع جواله على صوت إتصال وشافه ابوه ورد عليه على طول :سم يبه
ابو حمد:وينك فيه يومين مختفي انت ودلال
حمد: معليش يبه دلال تعبانه وتو دخلت العمليات وشكلها بتولد
ابو حمد: يروحي يادلال زين خلك معها وانتبه لها وبشرنا
حمد: ابشر
سكر ابو حمد ورجع الجوال لجيبه وصار ينتظر والتوتر عنده مليون وهي قبل يومين تعبانه وهي بالمستشفى خايف يصير شي بالجنين ويدعي ربه ومتوتر انها طولت صار لها ساعة داخل
كان خايف عليها كثييييرر وصار يستغفر ويدعي يبي يمرر الوقت
وفعلًا مر الوقت وحمد مَل من الانتظار طلعت الدكتوره وهي مبسوطه والابتسامة على وجهها فزّ عندها: بشري!!!
الدكتوره: انت زوجها؟
حمد: اي اي زوجها حمد شفيهااا؟
الدكتوره ابتسمت: الف مبروك أخ حمد جتك بنت زي العسل
ضحك بقوه وكأنه هم وانزاح: وكيفها وكيف امها
الدكتوره: الحمدلله كلهم بخير وتقدر تطلع بكره بس لازم تكون تحت الملاحظة 24 ساعة
حمد: ومتى اقدر اشوفها؟
الدكتوره: بس تصحى من التخدير نطلعها للغرفة وتقدر تشوفها
حمد تنهد براحة: زين زين يعطيك العافية
الدكتوره: ولو واجبنا
مشت الدكتوره وجلس والفرحة ماتشيله صار عنده بدال القمر قمرين ابتسم وضحك وهو يحس كل شي فيه يضحك ويبتسم مسك جواله على طول ودق على ابوه وبعد دقيقه وصله صوته: هلا ياحمد
حمد: ابشرك يايبه ابشرك
ابو حمد: بشرني ياوجه السعد
حمد: جت حفيدتك الثانية الحمدلله طلعت بالسلامة وجابت بنت
ابو حمد: الحمدلله الحمدلله مبروك ياوليدي مبروك الله يخليكم لها ويرزقكم برها يارب
حمد: امين امين يارب
سكت شوي وكمل: اقول يبه بشو ابوها والعيال
ابو حمد: ابشر
-
بيت ابو عِنان
تجمعوا البنات عند دلال والحريم يدخلون ويطلعون والبنات كلهم مجتمعين يساعدون جود
مرّ الوقت وصارت الساعة 10:00 وباقي البنات ومن ضمنهم شّجن
رسل: والله اني احس قلبي برجلي من كثر مامشيت. عليها تنبض اكثر من قلبي الأصلي
أديم:ولدت وعذ بس ماحسيت زي كذا والله يأني انكرفت على وجهي
جود: عمى اي والله ساعدوني شوي
رسل مسكت المنديل وضربته برأسها: كل هالكرف وباقي تقولين ساعدوني صدق ان الجميل مايبين بعينتس
جود: اطلعي منها لااهبدتس
شّجن : بنات بسألكم ليش مامعكم جوالات؟
وعد: ذي عادتنا من يومنا وبعدين المتزوجات هنا معهم جوالات
شّجن: اي اذري بس استغربت يعني
رسل: ليه انتي معك جوال؟
شّجن طلعت جوالها: اي معي
جود: غريبه ابوتس مااخذه
شّجن عقدت حواجبها: ياخذه لييه ذي عاداتكم حنا شدخلنا
رسل: المهم بقوم اسوي لنا قهوة مو معقوله كيف الحريم نسفوا القهوة نسف ماشاءالله
كل البنات صاروا يضحكون عليها وعلى كلامها
رسل: اديم قومي معي
أديم ضحكت بسخرية: هههاي تخيلي بس تخيلي جنبتس تبطين عظم
رسل : كرييهه خلاص اروح لحالي
شّجن: بنات بدق على وليد ياخذني احد بيروح معي اوصله؟
البنات بصوت واحد: لا شكرًا
شّجن رفعت جوالها واتصلت على وليد : اوك
طلعت رسل وراحت للمطبخ وصار تسوي القهوة باللحظة ذي دخل هتان البيت وسمع صوتها تغني بخفه بالمطبخ دخل عليها وشافها بقمة الجمال كلمة أنيقة قليلة بحقها 
كانت لابسه فستان سماوي طويل بأكمام طويله وفتحه من عند الصدر
حست بخطوات وراها والتفت وشهقت: خرعتنييييي
هتان: اسم الله عليتس ماكان قصدي بس ماكنت بخرب جوتس
رسل: هتان
هتان بهيّام: روحه وعيونه ودنياه باللي فيها
رسل: اطلع برا لااحد يشوفنا البنات مجتمعين هنا
هتان : وانا وش علي من البنات انا علي منتس ياكل البنات بعيني
طلعت شّجن باللحظة ذي ومشت بتطلع وشدها أصواتهم واسمها بالنقاش
رسل: اي واضح كل البنات بعينك وشّجن نسيتها؟
هتان تنهد بضيق: الحين شدخل شّجن ومن قال اني احبها؟؟
شّجن انصدمت من الكلام وتجمعت الدموع بمحاجرها وهي فعلًا حبت هتان لانها سمعت ام عِنان تخطبها له وتسمع كلام البنات عنه وطاحت بحبه لكن انصدمت من كلامه حقدت مليون مره عليه وعلى رسل كرهتهم كرهه مو طبيعي طلعت جوالها وطلت مع الشباك وصورتهم كذا صوره وصورتهم لما هتان مسك يد رسل صورتهم وطلعت ركبت مع وليد وراحت وهي حالفه تدمرهم
اما عند هتان ورسل
هتان تقدم ومسك يدها: رسل يعلم الله اني احبتس انتي واني ماأكنّ لأي احد غيرتس حب من بعد اهلي
رسل سحبت يدينها من بين يديه : هتاننن بعددد عنييييي الطريقه ذي ماتعجبنيييي ماتربيت اقابل عيال عمامي ببيوتهم ومن ورا اهلي تبيني روح لاابوي لا تكرهني فيك بهالحركات
هتان ابتسم بخفه: ابشر ياحلو
التفت اخذت القهوة وطلعت للبنات وهو يعصبها كثيييرر
-
عند شّجن ووليد
التفت شافها تبكي استغرب منها : شفيتس؟
شّجن: ولاا شي
وليد: وهالدموع كلها؟
شّجن: ياخي مالك دخل امششش
وليد سكت وشّجن مقهوره من الموقف اللي صار
وصلوا للبيت ونزلت وراحت لغرفتها جلست على السرير وصار تبكي اكثر وتناظر لصور اللي صورتها وكيف عاشت أحلام وهمية مع هتان بمجرد انها سمعت امه تخطبها من امها انقهرت وصار تكسر أغراض حولها مسكت جوالها وتتأمل الصور وكيف ماسك يدها همست بحقد وكرهه: والله لااوريكم اذا ماكان نهاية هالعلاقة ذبح ولا زواج من غير هتان ومن غير رسل مااكون شّجن بنت ابوي مو انا اللي تعشمني وتخطبني وتقهرني والله لاادمرك ياهتان والله مااخليك يارسل
-
الرياض تحديدًا المستشفى
دخل الغرفه لما صحت وسمحوا له يدخل دخل وشافها تعدل شعرها وكانت تعبانه ومُرهقه جدًا تقدم وحضن رأسها ابتسمت لما حست عليه: الحمدلله على سلامتك ياحياتي والحمدلله على سلامة قمرنا
دلال ابتسمت: الله يسلمك يارب
سكت شوي وكملت: وينها بشوفها
حمد: شوي ويجيبونها
دلال: مافكرت بالاسم؟
حمد: اذا ماببالك اسم ودي بأسم لكن اذا ببالك سميها عادي والجاي علي
دلال: لا ماببالي اسم انت سمها
حمد: على بركة الله بسمها رتيِل
دلال ابتسمت: تم رتيِل رتيِل
بعد نص ساعة دخلوا عليهم البنت تقدم وشافها نزل يديه وشالها من السرير وقربها لوجهه وباسها وصار يأذن بأذنها وبعد ماخلص باسها وحطها بحضن دلال ابتسمت وتقدمت وباستها : ياحبيبي تجننن ماشاءالله
حمد تقدم وبأس راسها: عسل تشهبتس والله وصرت محظوظ ياحمد وصار عندك قمرين بدال القمر
ابتسمت دلال وصارت تتأملها بحب ...
-
الديره
بيت ابو حمد
كان جالس يلاعب عذّوب وجواله جنبه ووعد تتروش كان يشيلها بحضنه ويلاعبها ويبوسها وكان يعيش احلى اوقاته مع بنته وصلته صوت رسالة فتح جواله وشافه رقم غريب اول مره يشوفه نزل عذّوب بسريرها وفتح جواله وانصعق من اللي شافه انصدم صدمة عمره كيف كل هالاشياء تصير من وراه شاف الصور ومحتوى الرسالة اللي مكتوب تحتها" راجعوا تربيت اختكم المصون" 
قام والشر بعيونه وصار يصرخ بقوه بأسمها وبكت بنته ولكن ماالتفت لها ولا سكت عشانها كان يصرخ بأسم رسل وصوته عم البيت كله طلعت رسل وحنين خايفين من صراخ فواز الغريب اللي اول مره يسمعونه بعد ماتزوج طلعت وشافته قدامها جاء صفقها كف حست الدنيا دارت بعيونها من بعد مسك شعرها وصار يهمس بأذنها بصوت مسموع: حقيره ماتوقعتس كذاا ليييه حنا قصرنا بشي عشان تجازينا كذا ولا رديناتس عن شي عشان تقابلين من ورانا
شهقت حنين بهاللحظة : فواز تستهبل وش قاعد تقول وش تقابل من ورانااا!!!!!
طلعت وعد هاللحظة وهي خايفه وشايله عذّوب: فواز شفيييكك
فواز بصراخ: وعد روحي جيبي جوالي بسرعهههه
ركضت وعد وجابت الجوال وكلهم منصدمين ومو عارفين شي فتح الجوال وحطه بوجهها وشافت كل شي وكل الصور وانهارت بكي.....

اهلآ أحبابي وحشتوني🤍🤍🤍🤍🤍🤍
عطوني رأيكم العسل كيف البارت كله أحداث 🔥🔥🔥؟
اللي مستعجل ويبي البارتات تنزل بسرعه ترا انزلها انستا قبل الواتباد ف اللي يبي يشوف قبل هنا يجي انستا
"rwiiai1"
وعطوني توقعاتكم للجاي🫣