ချစ်ခင်ပွန်း ( ဘာသာပြန် ) [ ဒုတိယမြောက် ]

အပိုင်း ၁၄၅ ( Rogue Champion 21 )

ယန်ကျင်းဇီသည် ဝေ့လင်းရှိူ့ကို မှီထားသော်ငြား သူ့ကိုယ်အလေးချိန် အားလုံးကို ဝေ့လင်းရှိူ့အပေါ်သို့ မတင်ရဲပေ... ဝေ့လင်းရှိူ့ ပိသွားရင် ဘယ်လိုလုပ်မလဲ?

သူ့ခန္ဓာကိုယ်က အရမ်းလေးတယ်!

သို့သော် သူသည် ဝေ့လင်းရှိူ့ကို ဖမ်းဆွဲထားပြီး လက်မလွှတ်ပေးပေ။

ဝေ့လင်းရှိူ့ကလည်း လက်လွှတ်ရန် အစီအစဉ်မရှိချေ။ သူသည် ယန်ကျင်းဇီကို သယ်ပြီး ယန်ကျင်းဇီ၏အခန်းထဲသို့ ဝင်လိုက်သည်။

သူတို့သည် ရှင်းအန်းကျေးရွာရှိ အိမ်တွင် မနေသည်မှာ ကြာပြီဖြစ်သော်လည်း သူတို့သည် သုံ့ကူကောင်တီမှ မထွက်ခွာမီ ဆိုင်ရှင်ဝေ့ကို သော့ပေးထားခဲ့ပြီး အိမ်ကို ဂရုစိုက်ရန် ဆိုင်ရှင်ဝေ့အား စောင့်ရှောက်ခိုင်းခဲ့သည်။ ထို့ကြောင့် အိမ်က သန့်ရှင်းနေပြီး ခုတင်ပေါ်မှ အိပ်ရာခင်းကိုပင် သေ‌သပ်စွာ ဖုံးအုပ်ထားသည်။

ဆိုင်ရှင်ဝေ့က တကယ်ကို ဂရုစိုက်တတ်သည်။

အခန်းထဲသို့ ဝင်လာသောအခါ ယန်ကျင်းဇီ၏ နှလုံးခုန်သံမှာ မြန်သထက် မြန်လာသည်။ ဝေ့လင်းရှိူ့က သူ့ကို အိပ်ရာပေါ်သို့ ရောက်အောင် ကူညီပေးချိန်တွင် သူသည် ခလုတ်တိုက်မိပြန်ကာ ဝေ့လင်းရှိူ့ကို အိပ်ရာပေါ်သို့ တန်းတန်းမတ်မတ် တွန်းချလိုက်သည်။

သူ့အခန်းထဲမှ လက်ရှိခုတင်မှာလည်း အသစ် ဖြစ်သည်။ ၎င်းက ကြီးမားရုံသာမက ခိုင်မာသော်ငြား ဤကဲ့သို့ လူနှစ်ယောက်က လဲကျသောအခါတွင်မူ ၎င်းခုတင်ထံမှ ခပ်အုပ်အုပ် အသံထွက်လာသည်။

ယန်ကျင်းဇီ၏နှလုံးသားဟာ တဒိန်းဒိန်း ခုန်ပေါက်နေပြီး မူးဝေ၍ အသိမရှိဟန်ဆောင်လျက် အနည်းငယ် မျက်စိမှေးကာ သူ့ဘေးမှ ဝေ့လင်းရှိူ့ကို ဆုပ်ကိုင်လိုက်ရုံသာမက ဝေ့လင်းရှိူ့၏ မျက်နှာကိုလည်း နမ်းလိုက်သည်။

ဝေ့လင်းရှိူ့၏မျက်နှာသည် အလွန်နူးညံ့ပြီး နမ်းရသည်မှာ အတော်လေး ကောင်းမွန်သည်... ယန်ကျင်းဇီသည် နမ်းပြီးနောက် ဘေးတွင် လှဲချကာ ဝေ့လင်းရှိူ့၏ တုံ့ပြန်မှုကို တိတ်တဆိတ် လှမ်းကြည့်သည်။