හිරිකඩක්

26

#හිරිකඩක්_26 (පොඩි කොටසක්... අනිත් කොටස දීර්ඝව ගේන්නම්)

ධූර්යා එදින ඇය රැකියාව වේලාසන නිමකර අවන්හලෙන් පිටව ගියේ පසුපස දොරටුවෙන්ය. අන් දින වල රාත්‍රී එකොළහට පමණ රැකියාව අවසන් කරන ඈ අද දින පිටත්ව යන්නේ රාත්‍රී දහය හමාරට පමණය.

සුපුරුදු වේලාවට පෙර පිටත් වූ නිසාවෙනුත් අවන්හළෙහි පසුපස දොරටුවෙන් පිටතට පැමිණි නිසාවෙනුත් ඇයට අවට යොදවා තිබූ නුඝාද්ගේ ආරක්ෂකයින්ගේ ඇස් වසන්නට එතරම් අපහසු වූයේ නැතිය. නුඝාද් වුවද ඇය ගැන සොයාබලන්නේ ඇය වෙනත් කොහේ හෝ ගියහොත් පමණක්ය.

වෙනත් මාර්ගයකට අවතීර්ණ වූ ධූර්යා මාර්ගය දිගේ තරමක දුරක් ඇවිද ගොස් නතර වූයේ හාඩ්වෙයාර් උපාංග සහ ඉලෙක්ට්‍රොනික උපාංග සහිත විසල් වෙළඳසලක් තුලය. ඇය ඇවිද යන්නට වූයේ ආත්මාරක්ෂාව සඳහා අද ලෝකයේ භාවිතා කරනා උපාංග සහිත පෙදෙසටය.

ටේසර් තුවක්කු, ස්ටන් තුවක්කු ආදී උපකරණ ඇය පිරික්සන්නට වූවාය. Taser gun සහ Stun gun යනු වර්තමාන ලෝකයෙහි ආත්මාරක්ෂාව සඳහා සතුරාට පහරදීමට භාවිතා කළ හැකි උපකරණයක්ය. මෙම උපකරණ අද ලෝකයේ බහුලව භාවිතා කරන්නේ කාන්තාවන් විසින්ය.

“Do you need any assist maam?”
(ඔයාට සහයෝගයක් ඕනෙද මෑම්?)

ටේසර් ගන් වල වෝල්ටේජ් ප්‍රමාණයක් පිරික්සමින් හුන් ධූර්යාගේ අවධානය බිඳුණේ වෙළඳ සේවිකාවකගේ හඬින්ය.

“No I'm good. Thank you.”
(නෑ ස්තුතියි..)

එලෙස පවසා වෙළඳ සේවිකාව පිටත්වන තුරු බලාන හුන් ධූර්යා එහි වූ වෝල්ටීයතාවය වැඩි ස්ටන් ගන් එකක් ගෙන මුදල් ගෙවීමේ කවුන්ටරය අබියසට ඇවිද ගියේ හදිසියෙන්ය.

එය ක්‍රියාත්මක කරනා ආකාරය පිළිබඳ කෙටියෙන් විමසා දැනගත් ධූර්යා වෙළඳසලින් පිටත්ව ගොස් අවතීර්ණ වූයේ තරමක් පාළු ස්වභාවයක් ඉසිලූ මාර්ගයකටය. එම මාර්ගය ඔස්සේ දුරක් ඇවිද ආ ධූර්යා අවසන නැවතීගත්තේ ගං ඉවුර අබියසය.

“ප්ලීස් මේක හරියන්න!”

ඉඳින් එය හුදෙක් අත්හදාබැලීමක්ය. දෙවරක් නොසිතාම ධූර්යා එය ක්‍රියාත්මක කර තම බාහුවෙහි වැලමිටට මදක් මෙහාපසින් චිප් එක තිබූ ස්ථානයට තැබූයේ ස්ටන් ගන් එකෙහි විදුලිය ඈ සිරුරට ඇතුළු වද්දිය.