හිරිකඩක්

42

#හිරිකඩක්_42

ආපසු ලංකාවට යාමට වෙන් කළ ගුවන්යානය පිටත්වීමට තිබුණේ හෝරාවක් පමණක්ය. නුඝාද් රැගත් කුලීරථය ධාවනය වෙමින් තිබුණේ අතිශය තදබදයක් සහිත ලන්ඩනයේ වීදියක් ඔස්සේය.

දරුවාව එක් අතකින් අල්වාන හිස් බැල්මකින් වාහනයේ ශටරයන් එපිට බලාන හුන් නුඝාද්ගේ නෙතු වලට වීදි අයිනේ විවිධාකාර දෑ හසුවන්නට විය. එක්වරම දෙපා ඉදිරියට දිගු කරාන පදික වේදිකාවේ බිම වාඩි වී හිඳි වීදි සරන්නෙකුගේ නිරුවත් දෙපා ඔහු නෙතට හසුවූයේ කුලී රථය එම පුද්ගලයා හුන් ස්ථානය පසුකරගෙන ඉදිරියට ඇදෙද්දීය.

ඊට මොහොතකට පෙර හරස් වීදියේ පයින් ගමන් කරද්දී සෙනඟ වටකරාන හුන් අයෙකුගේ දෙපා මේ ආකාරයෙන්ම ඇස ගැටුණා ඔහුට සිහි විය. බිම වාඩි වී හිඳිනා කාන්තාවකගේ ඉදිරියට දිගු වී තිබූ දෙපා තම ඇස ගැටුණා ඔහුට සිහි විය. එම මොහොතේ තමාගේ හදවතට අමුතු හැඟීමක් දැනුණා මතකය. නමුදු ඒ මොහොතේ ඔහුගේ අවධානය ඇමතුමට යොමු වූ නිසාවෙන් එය ඔහුට වගක් නොමැති විය. නමුදු තමාට ඒ මොහොතේ එම දැනුණු හැඟීමට හේතුව ඔහුට පසක් විය.

"Stop the car!"
(වාහනේ නවත්තන්න!)

කලබලයෙන් නුඝාද් පවසාලූයේ රියදුරා හැරී බලද්දීය.

"Stop."
(නවත්තන්න.)

රියදුරාට හදිසියෙන් මුදල් ගෙවා නුඝාද් වාහනයෙන් බැසගත්තේ කලබලයෙන්ය. වටවී හුන් මිනිසුන්ගෙ දෙපා වල හිඩැස් අස්සෙන් ඔහු එම දෙපා දුටුවේ සමීපවය. දෑස ඒ මත නතරව ගිය තත්පරය තුළ ඔහු දෑසට යමක් හසු විය. ඒ  දුටු දෙය පිළිබඳ යම් හුරුවක් මෙන් හැඟීමක් ඒ මොහොතේ දැනුණද ඔහුගේ පූර්ණ අවධානය ඇමතුමට යොමුවූ නිසාවෙන් එය කුමක්දැයි ග්‍රහණය වූයේ නැතිය.

නමුදු ඔහුට එය පසුව ඉබේටම කල්පනා වූයේ දුටු දෙය යටිසිතෙහි තැන්පත්ව තිබූ නිසාවෙන්ය.

"ධූර්යා ඒ ඔයාද?"

ඇයගේ මහපටැඟිල්ලෙහි පැත්තම සිට යටිපතුළ දක්වා දිවෙන කැපුම් පහරක් විය. සති ගණනාවකට පෙර ගඟෙන් සොයාගත් ධූර්යා මෙන් සූදානම් කර තිබූ මිනියෙහි යටිපතුල් තුවාල වී තිබූ නිසාවෙන් ඔහුට එදා සැකයක් පැමිණියේ එය ඔවුන් සිතාමතාම කළ යමක් කියාය. නමුදු දැන් මොහොතකට පෙර දුටු ඒ කැළල සහිත දෙපා ධූර්යාගෙම බව ඔහු සිත කියන්නේය.