හිරිකඩක්

54

#හිරිකඩක්_54

"ද්..ධූර්..යා...?"

නුඝාද්ගේ වදන්ද පැටලෙන්නේය. නොසිතා කලබලව තමා සිදුකළ ක්‍රියාවේ බරපතලකම ඔහුට වැටහී හමාරය. නමුදු ඇය නැතිය. ආලින්දයේ, නිවස ඉදිරිපස, නිවසෙන් පිටත, මුළුතැන්ගෙයි, නානකාමරයේ, කුඩා කුටියේ මේ කිසිදු ස්ථානයක ඇය නොමැතිය.

"දෙයි..යනේ ධූර්..යා ඔ..යා කොහෙද?"

එහෙට මෙහෙට දුවා එක් ස්ථානයක නැවතෙමින් නුඝාද් මුමුණාගත්තේ දෑතින්ම හිසකේ පසුපසට ඇදගනිමින්ය. විසල් භීතියකින් පිරුණු සිතිවිලි එකින් එක ඔහු ළයට රිංගාගනී. නමුදු ඔහුව ශීතල කර දමනා සිතිවිල්ලක් ඔහු සිතට රිංගාගත්තේ නුඝාද්ගේ හුස්මත් මොහොතකට නතරව යද්දීය.

"නෑ.. ඒක වෙන්න බෑ... උන් ඔයාව අරන් ගිහින්ද?"

ඔහු ළය අභ්‍යන්තරය කිසියම් ගින්නකින් ඇවිලී යනවා මෙන් හැඟුමක් දැනෙන්නට විය. හිස යකාගේ කම්මලක් වැනිය. ඊළඟ මොහොතේ තදින් දෑස් පියාන නුඝාද් හුස්මක් ඉහළට ඇදගත්තේ සන්සුන් වන්නටය. තවත් මොහොතකින් ඔහු දිවගියේ කුඩා නිවස සමීපයෙහි වූ ඔහුගේ අනෙක් නිවසටය.

"ඡායා එයා ඉන්නවද?"

ඔහු නිවසට ඇතුළුවූයේ එසේ විමසාගෙනය. නමුදු සේවිකාවන් දෙදෙනාම පැවසූයේ ඇය එම නිවසේ නොමැති බවය. එක්වරම සිතට පැමිණි සිතිවිල්ලත් සමඟ නුඝාද් තම වේගවත් පියවර ඇහින්දේ කාර්යාල කාමරයේ පරිඝනකය අසලටය.

කලබලයෙන් ඔහු පරීක්ෂා කළේ සීසීටීවී දර්ශනයන්ය. තමා කෑ ගසාගෙන කුටියට පැමිණ දරුවාව වඩා ගනිද්දි ධූර්යා සෝපාව දෙසට බියෙන් ගුළිවනවාය. එම දසුන දකිද්දී නුඝාද්ගේ ළය හීරී ගියේ ඉබේටමය.

තමා පැමිණ දරුවාව රැගෙන හිටගනිද්දී තම දර්ශනය නිසාවෙන් කැමරාවට ධූර්යාව ආවරණය වනවාය. තමා කැමරාව දෙසට පියවර තබද්දී තිරය මත පෙනෙණා තමාගේත්, දරුවාගේත්, තමා අබියසට පැමිණි සේවිකාවගේත් දසුන් නිසාවෙන් ඊට පසුපසින් හිඳිනා ධූර්යා හුන් පෙදෙස ආවරණය වන්නේ අවාසනාවන්ත අයුරින්ය. තිරයෙහි ලොකුවට සමීපව දිස්වන තමාගේත්, දරුවාගේත්, සේවිකාවගේත් දර්ශනය හැරුණු කොට ස්ක්‍රීනයේ දෙපසින් පෙනෙන්නේ කුඩා ඉඩ ප්‍රමාණයක්ය. එම ඉඩ ප්‍රමාණයේ ධූර්යාගේ දසුනක් පෙනෙන්නේ නැතිය.