Ghosting လုပ်ခြင်းအား ခွင့်မပြု

Part 23 - commemoration of first business trip

ကျိုးချန်ရှန် စီစဉ်ပေးသည့် ဟော်တယ်မှာ အတော်‌လေး စိတ်ကျေနပ်စရာကောင်းလှသည်။ ၎င်းမှာ ဝန်ဆောင်မှု အလွန်ပြီးပြည့်စုံသော အသစ်စက်စက် ဟိုတယ်တစ်ခုဖြစ်လေရာ အခန်းတွင်း၌ သစ်ဟောင်းမှ ရတတ်သော မှိုနံ့ , သစ်ဆွေးနံ့များ လုံးဝ ကင်းရှင်းလေသည်။

ဖေယို့သည် သူ၏ ခရီးဆောင်အိတ်အား အခန်းတွင်းသို့ ဆွဲသွင်းလိုက်ကာ စိတ်သက်သာရာ ရဟန်ဖြင့် တံခါးအား ပိတ်လိုက်ပြီးနောက် သူ၏ ပခုံးများအား ဖြေလျော့လိုက်ကာ သက်ပြင်းတစ်ချက် ချလိုက်လေသည်။

တစ်ညလုံး လေကြောင်းဖြင့် တစ်မျိုး, ကားလမ်းဖြင့် တစ်သွယ် ခရီးထွက်လာပြီးနောက်တွင် သူ့လိုမျိုး ခရီးရှည်မကြာခဏ ထွက်တတ်သည့် လူမျိုးတောင်မှ အနည်းငယ် ခရီးဒဏ်သင့်သလို ခံစားနေရသည်။

သူသည် ဇက်ကြောရှိ ကြွက်သားများအား နှိပ်နယ်လိုက်ပြီးနောက် ခရီးဆောင်အိတ်၏ ဘေးဘက် အိတ်ကပ်ထဲမှ ကွန်ပျူတာ အိတ်အား ထုတ်လိုက်ကာ ဧည့်ခန်းထဲရှိ ဆိုဖာထက်သို့ ပစ်တင်လိုက်လေသည်။

အပြင်ဘက်တွင် မိုးမှာ ရွာသွန်းနေဆဲ ဖြစ်ကာ ဖေယို့၏ မျက်နှာထက်တွင် နွမ်းနယ်မှုအား အထင်သား မြင်တွေ့ရလေသည်။ သူသည် ဆိုဖာထက်၌ ထိုင်ချလိုက်ကာ သူ၏ နှာရိုးအား လက်ဖြင့် ဖျစ်ညှစ်လိုက်ပြီးနောက် သူ့ကွန်ပျူတာအိတ်၏ အပြင်ဘက် အိတ်ကပ်ထဲမှ ဘဏ္ဍာရေး အစီရင်ခံစာ တစ်ခုအား ထုတ်လိုက်သည်။

ဖေယို့မှာ သူ၏ နွေရာသီအားလပ်ရက် ပထမအပတ်တွင်းမှာ လုပ်စရာရှိသော အိမ်စာမှန်သမျှအား လက်စသတ်တတ်သော ကလေးမျိုး ဖြစ်လေသည်။ သူသည် အနားမယူခင် လုပ်စရာရှိသည့် အလုပ်များအား အရင် အပြီးသတ်တတ်သည်နှင့် ကျင့်သားရ၍နေရာ အခု ပင်ပန်းနေသော်မှ သူသည် မအိပ်စက်ခင် ပြင်ဆင်စရာရှိသည့် စာရွက်စာတမ်းများအား အချောသတ်လိုက်ချင်သေးသည်။

Dongjiang ကုမ္ပဏီ၏ ဘဏ္ဍာရေး အစီရင်ခံစာမှာ ဒေတာများ ဗြောက်သောက်ဖြင့် ရှုပ်ယှက်ခတ်နေကာ အရင်နှစ်များစွာက တချို့သော ကိန်းဂဏန်းများမှာလဲ ကိုက်ညီခြင်းအလျဉ်းမရှိပါချေ။ ကြည့်ရသည်မှာ အချိန်လုကာ ဖြစ်ကတတ်ဆန်း ရေးပို့ပေးလာသည်နှင့် တူပေသည်။