بسم الله الرحمن الرحيم
نطقت " رحيق " باستفسار و قد تجلت تعابير الفضول على وجهها :
_ طيب شغال أي ده ؟
حرك رأسه يمينًا و يسارًا بعدما شعر ببعض الألم في عنقه إثر العمل لساعاتٍ طويلة ثم نبس :
_ مهندس شغال في شركة
سألت " رحيق " مجددًا :
_ اسمه أي طيب؟ و شافها فين؟
استأنف " داوود " حديثه ليبث لها كل ما يعلمه من معلومات :
_ اسمه وليد، و مقالش شافها فين صراحة، هي ممكن ترفضه يعني؟
رفعت كلا كتفيها لأعلي بأنها لا تعرف بينما تنبس :
_ صراحة معرفش، بس اتوقع يعني لازم تشوف شخصيته و طباعه الأول، و طبعًا موافقة أصيل، فعشان يعرف ياخد خطوة صح اديله رقم بابا اول حاجة وهو يكلمه يعني و يحددوا معاد
حك " داوود " عنقه بينما يبتسم ابتسامة صفراء :
_ هو قالي أنه جاي بكرة و انا سقطت المعاد و لسة فاكر دلوقتي
نطقت " رحيق " و قد تفاجئت بشدة من حديثه :
_ أي ده هو قالك من امتى! و ازاي يا دوك وافقت من غير ما ناخد موافقة بابا ده هيزعل جدًا
نطق " داوود " بضحك :
_ لا اخوكي خلي زعله عليا، بعدين انا والله ما بلغتوش أنه وافق ع المعاد حتى، الواد باينله مستعجل أصلا، فكلمني من اسبوع و قالي اقول لأهل البنت أنه هيقابلهم الساعة ٨ بعد اسبوع بالظبط، اللي هو المفروض بكرة يعني، و انا نسيت المعاد، ما علينا، بلغي أصيل ولو رفض انا هقول لوليد و متخافيش مش هيكون فيه أي حرج بجد
هزت " رحيق " رأسها بابتسام ثم قالت :
_ عيوني هروح اكلمها حالًا
نهضت " رحيق " سريعًا من موضعها و تقدمت خطوتين نحو الهاتف، لكنها عادت للحظة عندما لاحظت ألم " داوود " مما جعلها تنطق :
_ مالك يا حبيبي؟
تبسم " داوود " ضاحكًا بينما يقول :
_ مليش حق اشتكي بعد حبيبي دي والله، ده انتي كنتي منشفة ريقي، الله يعزك يا رحيق
ضيقت عينيها ثم قالت :
_ انت قلبك اسود يلا! ما علينا يا دودي مالك أي اللي تاعبك؟
أشار نحو رأسه و عنقه قائلًا :
_ معرفش ليه راسي و رقبتي واجعيني بقالهم شوية، اعتقد بسبب اني اخرت و تعبت في الشغل
ابتسمت ثم قالت :
_ اعتقد ده صداع عصبي
هز رأسه نافيًا بينما يقول :
_ لا لا احنا دارسينه، أنا عارف أعراضه، مفروض القيء و نوبة شبه نوبة الصداع النصفي و كدا، بس ده إجهاد مش اكتر، متشغليش بالك يا لب القلب بس
٭*★٭*★٭*★٭*★٭*★٭*
أمسك " أصيل " هاتفه مبتسمًا عندما ورده اتصال من شقيقته، أجاب على الفور اثر اشتياقه لسماع صوتها :
_ ازيك يا عمري، عاملة أي؟ كويسة؟
ابتسمت الأخرى على الطرف الآخر من المحادثة بينما تقول :
_ الحمدلله يا بابا بخير طول ما انت بخير
أنت تقرأ
قل مات عمر
Action- " أيتها الزهرة الخلابة، يا ذات النظرة الأخاذة، يا من أسرت ذاك القلب بتلك العينان الحسناء، سرقت سطوري الغزلية، و فصوص عقلي الذهنية، فتلك اليد ما كتبت الا عنكِ، و تلك العين ما رأت سواكِ، و ذاك القلب يهواكِ، فهل بعد ذلك لا اكون أسير حبك ؟ "
