မြူအုပ် || ဘာသာပြန်

အခန်း - ( ၅၆ )【 U 】

『 ရှစ်လော့ ၊ မင်းကဘယ်အခွင့်အရေးအထိထပ်လိုချင်သေးတာလဲ ？』

_________________________________

ရှစ်လော့သည်သူ့ခုံထံပြန်သွားပြီးနောက်တွင်သူ၏အရံအကောင့်မှာဂိမ်းစက်ထဲတွင်ရှိနေသေးဆဲဖြစ်ရာ ၊ အမြန်ပင်တန်းစီခြင်းကိုနှိပ်လိုက်ပြီးပွဲစဉ်ကိုလည်းအမြန်စလိုက်လေ၏။
သူသာတစ်စက္ကန့်မျှနောက်ကျသွားလျှင်တစ်စုံတစ်ခုဟာပေါ်သွားတော့မည်အားကြောက်နေမိလျက်။

ရှစ်လော့မှာအရံအကောင့်တွင်စိတ်လှုပ်ရှားစွာကစားနေကာ ၊ ထိုသူမမြင်သွားဟုတထစ်ချမယုံကြည်ရဲပေ။ ထို “ E ” မှာရိုက်ပင်ရိုက်ပြီးသွားပြီဖြစ်ရာယွီဆွေ့မှာထိုအချိန်၌အပေါ်ထပ်သို့ပြန်ရောက်ပြီးလောက်ပြီးမြင်သွားဖို့ကလည်းဖြစ်နိုင်ချေများလွန်းလှသည်။

သေချာပေါက်ကိုထိုသူမြင်သွားလျှင်လည်းရှစ်လော့သည်သူရိုက်လိုခဲ့သည်မှာ “ အင်း ”* ဖြစ်ကြောင်းနှင့်သတိမမူမိပဲစာလုံးအကြီးကိုရိုက်လိုက်မိကြောင်းရှင်းပြနိုင်ပေ၏။
ယင်းမှာအနည်းငယ်မျှတော့အဓိပ္ပါယ်ရှိသည်သာ။
[ * : pinyin လိုဆို en ပါ ၊ အဲ့ဒါကိုအသေးနဲ့ရေးရမှာကိုအကြီးနဲ့မှားရိုက်မိတယ်လို့​ရှင်းပြမယ်ဆိုတဲ့အဓိပ္ပါယ်။ ]

ရှစ်လော့အာရုံလွတ်သွားသည့်တခဏမှာပင်ခေါင်းပေးလိုက်ရတော့မတတ်ဖြစ်သွားပြီး ၊ ကျည်ဆံပြန်ဖြည့်ရန်ကတုတ်ကျင်းနောက်ကွယ်သို့ပုန်းကာသက်ပြင်းရှိုက်လိုက်မိသည်။
ဒါပေမဲ့မေးခွန်းက ၊ အခုအနေနဲ့အရေးကြီးဆုံးကယွီဆွေ့ကိုဘယ်လိုရှင်းပြရမလဲ ？

တီရှပ်ပါးပါး၏အောက်တွင်ရှစ်လော့၏ရင်အစုံမှာအလွန်အမင်းခုန်ပေါက်နေလျက်။
မဟုတ်ဘူး။

ယခုရှစ်လော့ဘဝကိုအသက်ရောက်နေဆုံးကိစ္စရပ်ကယင်းမဟုတ်ပေ။

ပရော်ဖက်ရှင်နယ်ကစားသမားများ - အထူးသဖြင့်နှစ်များစွာကစားခဲ့ကြပြီးသောပရော်ဖက်ရှင်နယ်ကစားသမားများမှာပထမဆုံးအနေဖြင့်မိမိကိုယ်ကိုဖော်ပြလိုလျှင်အမည်ရင်းကိုအသုံးပြုခြင်းမရှိကြတော့ဘဲ ၊ ပွဲစဉ်တို့ထက်မိမိအားအစဉ်အဖော်ပြုလျက်ရှိသောပရော်ဖက်ရှင်နယ်ကစားသမားအဖြစ်စာရင်းသွင်းထားသည့် ID အမည်ကိုသာအသုံးပြုကြတော့၏။
ရှစ်လော့အတွက်မှာမူ “ Evil ” နှင့်ယှဉ်လျှင် “ ရှစ်လော့ ” ဟူသည်အားပိုမိုလိုလားမှုရှိသည်။