မြူအုပ် || ဘာသာပြန်

အခန်း - ( ၆၃ )【 U 】

『 အဖွဲ့လိုက်စကားပြောခန်းဖွဲ့လိုက် ၊ အဖွဲ့ထဲကို Saint နဲ့ယီကျန့်တို့ပါထည့်လိုက်။ လာ ၊ ဆဲနေကြသူတွေနဲ့တစ်ပွဲလောက်နွှဲလိုက်ရအောင်။ 』

__________________________________

စားသောက်ဆိုင်သို့သွားသည့်အချိန်တွင်အမှောင်ထုကြီးစိုးနေပြီဖြစ်ရာ ၊ မည်သည်ကမှကလည်းမီးမဖွင့်ထားသဖြင့်သဲသဲကွဲကွဲမမြင်နိုင်ပေ။ ယွီဆွေ့မှာလည်းလက်များကိုပြန်မရုတ်ခဲ့ ၊ ရှစ်လော့၏လက်ဖဝါးထက်တွင်သာစာလုံးများဆက်တိုက်ရေးနေလျက်။

ကနဦးတွင်တရုတ်စာများသာရေးနေခဲ့သော်လည်း ၊ နောက်ပိုင်းတွင်အင်္ဂလိပ်စာလုံးများပါပါလာခဲ့တော့သည်။ ရှစ်လော့မှာကားအသင်းသားတွေဆီကမိသွားမှာစိုးနေလေရာယွီဆွေ့ကိုမကြည့်ရဲခဲ့ ၊ သူ၏ဘယ်ခြေပေါ်တွင်ဘယ်လက်တင်ထားလျက်ယွီဆွေ့ကိုစာဆက်ရေးနေစေပြီးညာလက်ပေါ်တွင်ခေါင်းမှီကာအပြင်သို့ပြတင်းပေါက်မှတဆင့်ငေးနေကာအမူအရာမှာအေးဆေးတည်ငြိမ်နေသော်ငြားနှလုံးအိမ်နှင့်လက်ဖဝါးထက်တွင်တော့ယားယံမှုလေးဖြစ်ပေါ်နေလျက်။

သို့နှင့်ယွီဆွေ့ရေးနေသည်များမှာအင်္ဂလိပ်စာလုံးများဖြစ်နေခြင်းကိုရှစ်လော့သတိထားမိသွားချိန်၌စိတ်ထဲတွင်တိတ်တဆိတ်ညည်းညူမိရတော့၏။ ဒီနှစ်ပိုင်းတွေထဲမှာ CET-4* မှမအောင်ထားရင်တိတ်တခိုးအချစ်ရေးတောင်ထားခွင့်မရှိတော့ဘူးလား ？
[ * : College English Test / တရုတ်တက္ကသိုလ်တွေမှာအင်္ဂလိပ်မေဂျာကမဟုတ်တဲ့သူတွေအတွက်မဖြစ်မနေဖြေဆိုရတဲ့စာမေးပွဲပါ။ ]

ရှစ်လော့သည်သူလျှောက်ထားသည့်တက္ကသိုလ်တွင်ခွင့်ယူထားဆဲဖြစ်ပြီး ၊ ဤအလုပ်ကိုစတင်လုပ်ကိုင်ပြီးစဉ်တည်းကတက္ကသိုလ်သို့သွားကာ CET-4 စာမေးပွဲကိုဖြေဆိုရန်အခွင့်မကြုံသေးချေ။ သို့ပေတည့်မည်သို့ပင်ဆိုစေကာမူသူသည်ရွှယ်ပါ့*တစ်ဦးဖြစ်ရာ ၊ နေ့စဉ်သုံးအင်္ဂလိပ်စာလုံးများကိုတော့နားလည်နေနိုင်ဆဲပင်။
[ * : ထိပ်တန်းကျောင်းသား။ ]

သို့နှင့်စိတ်အစုံနှစ်လျက်ယွီဆွေ့ရေးနေသည့်စာလုံးတိုင်းကိုစဉ်းစားကြည့်ပါသည့်တိုင် ....
ရှစ်လော့သည်မျက်မှောင်ကျုံ့လိုက်မိကာယွီဆွေ့ကိုလှည့်ကြည့်လိုက်မိပြီး ၊ မျက်နှာတွင်လည်းစိတ်ရှုပ်ထွေးမှုအပြည့်။