منار : وينك
عبدالرحمن بطفش: متصله كل هالاتصالات عشان تقولين وينك
تنهدت واردفت بهدوء : انا حامل
عبدالرحمن بصدمه : شلون!
منار تمسح دموعها: ميت بطني
عبدالرحمن براحه : مو مشكله نزليه
منار بعصبيه: انت مررريض مريض انت اقولك ميت بطني تقول مو مشكله المفروض تكون حولي بهالوقتت يانسان
عبدالرحمن : وش ودك اسوي مثلا انزله لك منار ترا قسم ماني فاضي لك ولا فاضي لسوالفك مات خلاص نزليه باقرب مستشفى
منار بصوت كله بكاء : انت وش غيرك قولي انا وش سويت لك ووش سوووويت احسك شخص ثاني مو الي اعرفه والله قفل الجوال
نزلت جوالها وقربت لاقرب كرسي تبكي بقهرر على كل شي مرت فيه تحس نفسها محرره لانها مو بالبيت ولا حولها احد ودها تطلع كل الضيق الي فيها كاتمته تحس اختنقت كثيرر
كل الي صار ماغاب عن عيون مشعل الي كان يسولف مع صاحبه واقفين عند البوابه بس داخل !
قفل من ابوه الي خبره ان العزيمه الليله ولازم يجي من بدري وقف عند اقرب حلاق وبدا يحلق وهو عاجز يطلعها من عقله ناظر بالكرسي الي جنبه قام عنه شخص وبدا الكرسي يدور وتذكرها يوم تدور ابوها وتبوسه ابتسم بقوه الى مابانت اسنانه انتبه لنفسه لما دق جواله
ناظر برقم وكان صقر
فيصل : هلا يالذيب
صقر : منجدك الليله عزيمتك
فيصل : اي والله تو دق ابوي يقول الشيبه اجزم انها اليوم
صقر : ياهالشيبه اسمع وينك الحيين
فيصل : احلق
صقر : بجيك ارسلي الموقع
————————
دخلت البيت وشافت الجادل بالمطبخ تغسل المواعين وسعود جالس على طاولة المطبخ يشرب حليب دخلت عندهم : السلام عليكم
لفت الجادل : وعليكم السلام مابغيتي
قربت لسعود تمسح على خده
ناظرت بالجادل : امي وينها
الجادل : فوق بغرفتها
هزت راسها منار ورقت فوق
دخلت بغرفه امها وكانت جالسه بجلال الصلاه : يمه
لفت ام صقر وناظرت بمنار : هلا يامي تعالي
دخلت وجلست جنب امها : يمه حضنتها بقوه مو قادره تتحمل بصدرها اكثر اول ما شافت امها انفجرت بكاء
ام صقر بخوف تمسح على ظهر منار: يامي منار وش فيك لاتخوفيني
رفعت راسها منار من حضن امها ومسحت دموعها بكمها: يمه اليوم كان عندي موعد ناظرت بامها : قالو اني حامل وميت بطني من اسبوعين بدموع :يمه خايفه
ضمتها ام صقر بقوه : بسيط يامي انتي بسيط من يومك تروحين ويخلصون عمليتك لاتشيلين هم ولاتخافين
منار : روح بداخلي ماحافضت عليها
ام صقر : هذا شي مكتوب واذا هو راح يجي غيره
حطت راسها على رجل امها وبدت تقرا ام صقر بعد مده هدت منار ووقفت ولفت لسؤال امها : بعد يومين موعدي
هزت راسها ام صقر ووقفت مع منار وطلعو
أنت تقرأ
"خذني على قد الوله واشتياقي ترا الكرم بالحب حاجة عظيمة"
Short Storyمعرفتي الاولى بتكون جداً مختلفة وتمس بعض من الواقع لا كثيراً ..اذا كان فيه تشابة لأي رواية او أسماء أبطال فهذا من باب الصدف لا اكثر 🤍.. مهم مهم "لا ابيح ولا اسامح النقل او الاقتباس"
