فلتنحني لقلبي تذللا [ تتمة ]

‏‎‏‎‏𝑷𝑨𝑹𝑻★214

❥ ／فَلْتَــــنْــــحَـــنِي لِقَــلْـــبِــي تَــــذَلُلاَ／❥. 

الـــفــصــل الـثالـث و الاخــير : ^ أنـتِ بـدايـة روحـي ، و أنـتَ الـخـتـام ^.

بقلم ✎𝐖𝐢𝐣𝐨𝐮
<< أبـَليتَـني بِـالعِـشـق ثُـم تَـركتَـني و اَذقْـتَـني حُـلـوَ الـهَـوىٰ فَـقتَلتـني وهَـبْتـني قَـلبـاً يَـفِيـضُ تَـعاطُـفاً  ، يَـا خَـائِـنـاً بِـالـحُـبِ كَـيـف كَـسرْتَـني بِـرحيلِـك ، فَـهل مّـن عَـودةٍ ؟ فَـالـرُوح عَـلى مَـشـارِف اِخْـتتَامِـك >>

بقا واقف كيسول عمو على احواله واحوال عائلته تا كينطق عمو بعفوية ..

مصطفى:" ايوا اولد خويا ، اش كتعاود  اش خبار خويا وبنت عمي (تلفت لطونبيل ) هديك المرا ديالكاو".

آدم تلفت جهة هدى كيشوف فيها كيفاش حاضيها :" كلشي مزيان اعمي ،  ايه هذيك هي مرتي ".

خلى عمو ومشا لطونبيل منزل هدى وهز ولادو من روليكس وهوما ناعسين ،قربت باش تاخد من عندو واحد من دراري ولكن مبغاش يعطيها تهزه..

زادت هي وياه لعند عمو لي كان بادية عليه الفرحة بيهم ،غير وصلو لعندهم وهي يحرك راسو لهدى ناطق بترحيب :" مرحبا بمرت ولدنا عندنا بلادنا عاد نورت ..على سلامتك ابنيتي ".

هدى بتسمت لها ناطقة بهدوء:" ربي يخليك اعمي ..تشرفت بك ".

مصطفى :" الله يرضي عليك ابنيتي (قرب عند ادم كيشوف فولادو ) اتبارك على ولاد العزيز .. ادم صغيور ..وغا نتا محطوط منسوط ".

باس الدراري على راسهم وزاد داخل بيهم للفيرما  وهدى غير كتدور راسها كتشوف فيها قداش كبير وواسعة مكتحدش ..مشاو شحال عاد وصلو للدروج لي كيدخلو لدار ..

مصطفى وقف فالباب وبدا كيغوت على غفلة بالجهد مقفز هدى لي محستش تا شدت فذراع ادم  لي تلفتت كيشوف فيها وهو مبتسم ..

آدم :" غير ولفي كلشي هنا كيهدر بالغوات ".

مصطفى :" وا حليمة تي جيبي البنات وتعالي سلمي على ولد خويا ومرتو وولادو راهم وصلوو ".

نهى كلامو داير عند ادم ناطق بتساؤل موجه كلامو لادام :" تا اش سمية مرتك ".

ادم شاف فهدى ونطق :" سميتها هدى ".

مصطفى :" ايه زينة هودى ".

ادم بتسم على نطقه لسميتها وتلفت كيشوف فيها كيفاش كتدور عينيها ، ثواني تا سمعو الهراج والغوات والضحك كيقرب منهم تا كتبان ليهم جاية عندهم مراة كبيرة فعمر وموراها بنات بزاف ازيد من سبعة البنات كلهم تقادة وحدة ..

سلمو عليهم وحدة بوحدة عرفت انهم بنات عمو ،سكتت كتشوف فادم كيفاش كيهدر مع دوك البنات كيسول فاحوالهم ،تعجبت فطريقته كان مطلوق معاهم بزاف وكيضحك الشي لي معجبهاش وعاد زاد قلقها ملي شافت وحدة من البنات محيدتش عينيها من على ادم ملي وقفت وهي كتشوف فيه وتنغز فختها وتضحك ..