صوتهم واصل لراس الدوار، مخشيين فبيتهم وبين يديهم كسوة مدابزين عليها كل وحدا تاتجر من جهة تا تقطعات وشهقو بجوجات بصدمة لي تحولات لغضب كبير، رماوها فالأرض وطارو على بعضياتهم كل وحدة منين شادة الاخرى، ماماهم سمعات غواتهم وخرجات كاتجري من الكوزينة وتدعي ..
فرحة : واااااا المسخوووطاااات، سيرو بيت ليكم غفاااااص (دعوة كنت نسمع جدا تگولها ولحد دابا ماعرفت معناها 😂) ديما مشوهيني يغبركم عليا
دخلات عليهم للبيت ولقاتهم مفرشين فالأرض ومشانقين، ووحدة لاوية رجليها ع الأخرى وناتفاها والثانية حاتية عليها بعضة وظفارها مغروسين فذراعها، جلسات حداهم وبدات تفك فيهم وهوما لاصقات فبعضهم كي العلقات ..
فرحة : رصااااااو، واااتي زگااي حيدي من شعر ختك بيت ليك موصيبة ويلي ويلي على صوبيصة الخرى حيدي سنانك غاطيري ليها اللحم يعطيك الجهل
بقات تاتفك فيهم بيديها ورجليها تا عيات وتكحزات اللور تاتنهج وشعرها طلق من الخرقة ووجها حماار بالعصب والعيا ..
صفاء : اننننن والله تانقرع لمك هاد زغبات اعععععع
مروى : وانا نحيد ليك اللحمة اعععععع هاكي شدي
فرحة : سيرو يشدكم بوغطاط مايطلقكم (تاتنهج) الله ياربي وشبيني وبين شي ولاد اححح اميمتي غايقتلوني
استراحات شويا وناضت ثاني عندهم وهاد المرة تاهي بدات ضرب فيهم وتغوت تافرقاتهم وطاحت حدا رجليهم ..
فرحة : لا لا هادشي بزااااف ااااووو مالي على حالتي والله ويجي باكم تانگولها ليه يلقا ليا معاكم حل، يلا بقيت معاكم هاكا طرطقو ليا مراااارتي
صفاء : وارا ماما هي لي جبداتني، شو كسوتي كي دارت ليها
مروى : لا عداك اماما هاديك كسوتي أنا وكنت غانلبسها للمدرسة وگلعاتها ليا
فرحة : ياك كل وحدة شرينا ليها وحدا وكلشي عندكم بحال بحال باش ماتفرعو ليا مخي
صفاء : واه هادي ديالي نقية والموسخة هي ديالها
مروى : المسخة ديالك نتي خانزة بريحتك هاكاك زفرة
صفاء : حاشاك واخا نكون مصننة بحالك نتي
فرحة : سكتوووووووووو يسكت لجد باباكم الحس
على اثر صرختها كان داخل ولدها للدار وسمعها وداز عندهم للبيت حل الباب وطل عليهم، لقا مو مفرشة فالأرض وخواتاتو واقفين على راسها وكل وحدة فيهم حالتها بالنتيف وحناكهم حمرين بالدق وكايتهامسو بالسبان عرفهم مزبلينها ثاني ..
ادريس : مي مالكي؟ ومال هاد البرهوشات مريشين كي الدجاج
صفاء ومروى : حاشاك الدحش
فرحة : حشمووو 😠، شوف اوليدي جابك الله غاتهزهم بجوجات وتديهم لباك سمعتي، گوليه سيفطاتهم ليك مي شدهم حداك را غايخرجو ليها عقلها، شوف اوليدي حالتي كي دايرا را باو يحمقوني مافيهاش
ادريس : هاي هاي على بروسليات، شتكم مابقيتو تحشمو هاا بيتو نهلك جدكم ثاني
دخل عندهم وشنق عليهم بجوجات من گفاهم وهوما تايتنترو ..
ادريس : زيدو گدامي نديكم لبا هو لي يعرف ليكم زيدو تحركو
خرجهم بزز مقاتل معاهم وهوما تايزلقو ليه ويعاود يهزهم وفرحة تبعاتهم من اللور تاتنگر تا وصلات للكوزينة وكملات شقاها والراديو حداها مطلوق تاتغني معاه تا رجع ادريس ..
ادريس : مي كاين مايتكال
فرحة : هانا فيه، ديتيهم ليه؟
ادريس : ماوصلتهم تا سخفت، بيت ها نعرف علاياش كنتي توحمي فاش كنتي حاملة بيهم را بزاااف دوك الساطات امي
فرحة : شتي نتا راسك مطفرو غا جيتي وكبرتي مادرتي ضسارة ماوالو گاع كيف كيف، ايييه شحال توحشت بنيتي مسيكينة لي كانت تفهمني وتحن عليا وترضيني وعمرها ماهزات فيا عينيها ولا نهصراتني مرضية بنيتي ماشي بحالكم المساخط
ادريس : والا تبدايش ثاني تگولي هازين عليك عصا ونظلو نصوطو فيك
فرحة : داااكشي لي بقا نيت ومادرتوه
ادريس : دابا امي من هاد اللغا واش كاين مانحنجر ولا نمشي لعند عمتي ناكل
فرحة : شتك نتا غا لاصق عند ديك عمتك ياك لاباس هاا ولداتك ونساتك ولا شنو
ادريس (هز راسو الفوق وقاد كول قميجتو) : وا را تاندير بلاصتي تما امي ومانعاودش ليك على نصيب عد ديك الباتول
فرحة : اهاااه هي الباتول ولات طيب حسن مني يانا هاا، اوا سير عندها
ادريس : ولاش نمشي وهي هاتجي لهنا ياك مرات ولدك هاديك هاتغيري منها امي
فرحة : سير سير تلعب بقا لك غا الزواج كلشي درتيه، مادوا فيه ولد عمك لي راجل وسيد رجال قرا وتوظف وولا بوليسي وباقي مافكر
ادريس : هاداك يلا بقا تابع ديك ختي غايبقى بلا ولاد
فرحة : وا بيني وبينك اوليدي والله ماكرهتو ليها، مالقاش حسن من أمين يتهلا فيها غا هي الله يهديها وخلاص، فكرتيني نيت فاش تكون غادي عند الباتول تجغدد دوز على عمتك خدوج وگوليها تسيفط ليا ياقوت بيتها
ادريس : ولاش بيتيها؟
فرحة : غانسيفطها لعند ختك وبنت عمك تبقا معاهم تما تعاونهم، دابا وصلو الامتحانات وغايتلهاو بالحفاظة، بعدا يلقاو لي يطيب ليهم ويجمع ليهم روينتهم
ادريس : واهوما لي فنيانات مايعرفو يسلقو تا بيضة يشوفو الباتول الحداگة
فرحة : دريييس 😡 غادرگ عليا زلافتك نتا وديك الباتول ديالك ولا نخرگ عليك هاد الگصعة
ادريس : هاهو خارج كلمة الحق مابيتوها ..
أنت تقرأ
معا حتى النهاية (المراهقة الفاتنة 3)
Romanceالجزء الثالث والأخير من القصة الشهيرة المراهقة الفاتنة .. جزء رومانسي درامي بامتياز
