معا حتى النهاية (المراهقة الفاتنة 3)

البارت 20

جالسين فقاعة الاجتماعات فالشركة ديالهم، الأب مترأسها وولادو بجوج حداه واحد على اليمين ولاخور اليسار، تايتناقش معاهم وكل واحد كايعطي الفكرة ديالو على المشروع لي خدامين عليه والأب كايشوفيهم بنظرة افتخار، سالاو وجمعو الأوراق وجاو ينوضو فحالهم ..
فؤاد : جلسو بيت ندوي معاكم
جلسو تاني وانتابهو ليه وهو تكا على يديه فوق الطبلة وحجبانو معقودين وباينا الموضوع لي بغاهم فيه مهم الشيء لي خلاهم يشوفو فبعضياتهم باستفهام ..
فؤاد : تايبان ليا جا الوقت لي تعرف الحقيقة كلها اولادي، خاص جدكم يعرفك ا أشرف ماشي موظف هنا فالشركة وإنما كحفيد ليه
سلطان : متافق معاك الواليد، شحال غانبقاو مخبيين هادشي؟
أشرف : ولكن الواليد صعيبة القضية ويلا وقعات ليه شي حاجة؟
فؤاد : كلشي ديال الله اولدي، المهم عندي دخل للفيلا والشركة وراسك مرفوع، كلشي يعرفك ولدي ووريث تانتا بحالك بحال خوك الكبير وتا الواليدة ديالك خاصها تعرف ويتعطاها حقها وكلشي يدير ليها اعتبار، ماغانبقاش مخبيكم مازال واخا تعطلت باش تاخذت هاد القرار
سلطان : تعطلنا بزاف الواليد، ولكن ماشي مشكل دابا ندركو الأمر
فؤاد : عولو على العشا غايكون فالفيلا، أشرف علم الأم ديالك ووجدو راسكم غير نتاصل بيكم شدو الطريق
أشرف : واخا الواليد مايكون غير خاطرك ويكون خير ان شاء الله
فؤاد : تقدر تمشي دابا فحالك تا الليل ونتلاقاو ونتا اسلطان بقا مازال بيتك
استأذن منهم أشرف وسلم على باه وخوه وخرج من القاعة فرحان حيت وأخيرا جا الفرج وغايتعرف شكون هو بالنسبة لعائلة النجاري، سنين وهادشي مخبي وجا الوقت يتفضح، وخلا خوه وباه جالسين كايفكرو كيفاش يقولوها للجد ..
سلطان : شنو غادير الواليد؟ أنا معاك فاشما احتاجيتيني
فؤاد (ربت على كتفو) : عااارف اولدي، داكشي علاش تانعاود ليك كلشي ودايرك بئر أسراري وصاحبي ماشي غير ولدي فقط، نتا الكبير وسندي ويدي اليمنى، معول عليك
سلطان : لهلا يحاشمنا الواليد والله يخليك لينا
فؤاد : المشكلة بقات فمك، لسانها سليط ومبري منها ومن سابع المستحيلات تقبل الأمر ودوزو على خير معاشرها وعرفها مزيان
سلطان : الصراحة الواليدة صعيبة وعادي ماتقبلش راك فهمتيني شنو تانعني ولكن خليني أنا ندوي معاها ونمهد ليها الأمر ماتجيهاش على غفلة وتخليها تايتجمع كلشي وطلقها
فؤاد : لي مسلك ديرو اولدي
سلطان : ماتشطنش بالك الواليد كلشي غايكون مزيان ونتا مادرتي تا حاجة حرام تزوجتي على سنة الله ورسوله وولدتي عااادي كايبقى الاشكال غير فانك خبيتي عليهم وصافي
فؤاد : هنا فين بقات، المهم يالاه نمشيو للدار غايكونو تايتسناونا للغدا ومنها نقوليهم باش يتجمعو فالليل ونتاصل تا بعمتك راوية تحضر
سلطان : واخا
وقفو بجوج وفؤاد رامي يديه على كتف ولدو لي مفتاخر بيه بلا قياس وفرحان بيه ..
فؤاد : أنا فخور بيك اولدي، حياتي ماكان ليها طعم تا تزاديتي نتا ودخلتي ليها الفرحة، بلا بيك مانسوا والو
سلطان (باس ليه يده) : الله يحفظك ليا وتانا بلا بيك والو الواليد
خرجو من الشركة معانقين وفرحانين ببعضياتهم، ركب الأب فالسيارة مع الشيفور وسلطان فسيارتو الخاصة وتوجهو للفيلا ..
---------------------------
فيلا النجاري لي الدنيا مقلوبة فيها والصداع نايض بين جلال وسعدية ودنيا وسطهم ماكرهات تقتلهم بجوج خاصة فاش عرفات بلي ليليان كانت غاطيح فالحرام مع خوها ..
دنيا : لا لا نتوما بزاااااااااف والله 😢 شنو ربحتو دابا من هادشي شنووو؟ بنت ختي بغات خوها وعلى نقشة كانو غا غايي **
سكتات ماقدراتش تكملها جاتها ثقيلة فلسانها ووحلات فيه، جلال من شدة ندمو تمنا الأرض تشق وتبلعو ولا يتحط فهاد الموقف وسعدية ماهمها والو من غير ولدها وحفيدها لي قربو يعرفو الحقيقة ودك الساعة غايدمرو والعائلة ديالهم تشتت بعدما دارت المستحيل باش تبقا مجموعة ومتماسكة، مالقات مادير من غير تركع عند رجلين جلال ..
سعدية : هئهئ كانترجاااك اولد خالي تمشي من هنا وتنسا هادشي عااافاك الله يخليك دير غير بحق الدم لي بيناتنا وسير ماتفضحنيش، مادمرش ليا عائلتي الله يخليك، خلينا عايشين مرتاحين ماتنغصهاش علينا و وأنا تانواعدك حفيدي غايعطي تيساع لحفيدتك وعمرو يجي لجتها ويلا اضطريت نزوجو
دنيا : واش نتي حمقة ولا شنووووو؟ راك كاطلبي المستحيل سمعتي، واخا ولد خالك تبقاي فيه ويبغي يسكت أنا مستحيل نسكت، مايمكنش نعرف هادشي ونسد فمي، حتي خاصها تعرف الحقيقة وتعرف بلي ولدها مازال حي وتاهو يعرف كلشي، يعرف انكم ماشي عائلتو الحقيقية، ولدنا غايرجع لينا حنااااا ونتوما الله ياخذ فيكم الحق
عند هاد الحد وسعدية فقدات عقلها وطارت على دنيا قجاتها كاتهددها يلا نطقات بحرف تقتلها والاخرى كاتحاول تبعد راسها من يدين ديك الطاغية وجلال ماعندو صحة يدخل بيناتهم وبقا فبلاصتو تايتفرج ويبكي، الخدامة جات تفك وهي تسمع الصونيت فالباب وخرجات تاتجري تحلو وهي عارفا شكون جا وهاديك وقتهم لي تايرجعو فيها ..